(ភ្នំពេញ)៖ លោក អោក បូរ៉ា ប្រតិភូរាជរដ្ឋាភិបាល ទទួលបន្ទុកជាអគ្គនាយកប្រៃសណីយ៍កម្ពុជា បានថ្លែងថា ត្រឹមតែរយៈពេល១១ខែ ក្នុងឆ្នាំ២០១៨នេះ ប្រៃសណីយ៍កម្ពុជា រកចំណូលបានជាង១០លានដុល្លារអាមេរិក។ បើតាមលោក អោក បូរ៉ា នៅឆ្នាំ២០១៧ ប្រៃសណីយ៍កម្ពុជា រកចំណូលបានត្រឹមតែ ៨លាន៥សែន ដុល្លារអាមេរិកតែប៉ុណ្ណោះ។
អគ្គនាយកប្រៃសណីយ៍កម្ពុជា បានថ្លែងបែបនេះ នៅរសៀលថ្ងៃទី២៤ ខែធ្នូ ឆ្នាំ២០១៨ ក្នុងឱកាសដែលលោក អញ្ជើញជាអធិបតី ពិធីសម្ពោធដាក់ឱ្យប្រើប្រាស់ជាផ្លូវការ សាខាទី៦២នៃប្រៃសណីយ៍កម្ពុជា ទីតាំងផ្សារទំនើបអ៉ីអនម៉ល២ ខណ្ឌសែនសុខ។
លោក អោក បូរ៉ា បានបញ្ជាក់យ៉ាងដូច្នេះថា៖ «មកដល់២០១៨នេះ ទើបតែ១១ខែ យើងទទួលបានប្រាក់ចំណូលពីសេវានេះ ១០លានកន្លះហើយ។ អញ្ចឹងនៅ១ខែទៀត យើងអាចថា ប្រហាក់ប្រហែលជាជិត ១២លានដុល្លារ នៅឆ្នាំ២០១៨»។
លោកបានបន្តថា៖ «ឆ្នាំ២០១៧ ចំណូលយើងបាន ៨លានកន្លះទេ តែឆ្នាំនេះយើងមានការកើនឡើង ដោយសារបញ្ញើ E-Commerce មានន័យថា យើងចែកដៃគូរលើពិភពលោក។ អតិថិជននៅស្រុកខ្មែរទិញតាម Online អញ្ចឹងយើងអាចចែកបញ្ញើ E-Commerce បានមានការកើនឡើង ដោយសារការបញ្ជាទិញតាម Online មានការកើនឡើង»។
លោក អោក បូរ៉ា បានគូសបញ្ជាក់ដែរថា ប្រៃសណីយ៍កម្ពុជា មានចំណូលកើនឡើងជារៀងរាល់ឆ្នាំ ឥតឈប់ឈរ ហើយការពង្រីកសាខាថ្មី នៅផ្សារទំនើបអ៉ីអនម៉ល២នេះ គឺដើម្បីរំកិលសេវាឲ្យកាន់តែខិតជិតអតិថិជន។ លោកថា គិតមកដល់ពេលនេះ ប្រៃសណីយ៍កម្ពុជាមាន៦២សាខាហើយ នៅទូទាំងប្រទេស។
សូមជំរាបថា ប្រៃសណីយ៍កម្ពុជា គឺជាសមាជិករបស់ប្រៃសណីយ៍លើពិភពលោក ដែលមាន១៩២ប្រទេស ជាសមាជិក៕
