(ព្រៃវែង)៖ មន្ត្រីជំនាញកាំកុងត្រូលសាខាខេត្តព្រៃវែង ដឹកនាំដោយលោក អ៊ុត សុភាព ប្រធានសាខានៅថ្ងៃទី១៧ ខែធ្នូ ឆ្នាំ២០១៨នេះ សហការជាមួយមន្ទីរពាណិកម្មខេត្ត និងអាជ្ញាធរដែនដី បានចុះបំពេញភារកិច្ចត្រួតពិនិត្យសុវត្ថិ ភាពម្ហូបអាហារ ដែលដាក់តាំងលក់នៅផ្សារពោធិ៍កន្លែងស្ថិតនៅភូមិវាំង ឃុំជីផុច ស្រុកមេសាង ខេត្តព្រៃវែង។

លោក អ៊ុត សុភាព បានឲ្យដឹងថា ក្នុងការត្រួតពិនិត្យ​ មន្រ្តីជំនាញបានធ្វើវិភាគបឋមទៅលើសរសៃគុយទាវ នំបញ្ចុក នំបាញ់ហយ ត្រីងៀត ស្ករត្នោត សណ្តែកបណ្តុះ ត្រពាំងជ្រក់ លតស្វិត ដំណាប់ល្ហុង សរុបបាន ១៥ គំរូ ដែលលទ្ធផល​ មន្ត្រីជំនាញបានរកឃើញ​មានវត្តមានសារធាតុគីមីហាមឃាត់ ប៉ូរ៉ាក់ (Borax) ក្នុងផលិតផលគុយទាវ ចំនួន ៤.៦គីឡូក្រាម និងគុយទាវឆា ០.៥ គីឡូក្រាម បន្ទាប់មកមន្ត្រីកាំកុងត្រូលបានធ្វើការណែនាំនិងធ្វើកិច្ចសន្យា ផ្តិតមេដៃ ដល់អ្នកធ្វើគុយទាវចំនួន២រូប ដែលការផលិតមានលក្ខណ:គ្រួសារ ដោយផលិត ពី ៤ ទៅ ១០ គីឡូក្រាម ក្នុង ១ ថ្ងៃ ដើម្បីឲ្យធ្វើការកែប្រែឡើងវិញ និងបានធ្វើកំណត់ហេតុដកហូតគុយទាវយកទៅកំទេចចោល។

លោកប្រធានសាខាបាន​បន្តថា ក្រៅពីការវិភាគ មន្ត្រីជំនាញក៏បានរកឃើញទំនិញខូចគុណភាព ហួសថ្ងៃកំណត់ប្រើប្រាស់ដូចជា៖ ទឹកក្រូចចំរុះ១០៤ ដប, នំកន្ទួក៦ថង់, កាពិត៦ដប សរុបស្មើ៥២.៥ គីឡូក្រាម និងទឹកបរិសុទ្ធម៉ាកអូគិថាណា ចំណុះ៥០០មីលីលីត្រ ពុំមានអាស័យដ្ឋានច្បាស់លាស់ និងពុំមានកាលបរិចេ្ឆទប្រើប្រាស់ត្រឹមត្រូវឲ្យស្របតាមច្បាប់កំណត់ ចំនួន៧២ដបផងដែរ។

ឆ្លៀតឱកាសនោះដែរ ក្រុមកាងារ ក៏បានចែកផ្សាយរូបភាព Poster និងផ្សព្វផ្សាយដល់ អាជីវករអ្នកលក់ដូរ និងអ្នកប្រើប្រាស់នៅផ្សារឈើកាច់ ដើម្បីឲ្យពួកគាត់ បានយល់ដឹងអំពីផលវិបាក ដែលបណ្តាលមកពីការបរិភោគអាហារហួសកាលបរិច្ឆេទ ប្រើប្រាស់ និងការដាក់លាយបន្ថែមសារធាតុគីមី ក្នុងម្ហូបអាហារ៕