(ស្វាយរៀង)៖ ក្រុមអាជីវករដែលរកស៊ីកាប់សាច់ជ្រូក និងសាច់គោនៅផ្សារវាលយន្ត ក្រុងស្វាយរៀង ខេត្តស្វាយរៀង បានទទូចស្មើសុំដល់លោកស្រី ម៉ែន ​សំអន ឧបនាយករដ្ឋមន្រ្តី រដ្ឋមន្រ្តីក្រសួង ទំនាក់ទំនងរដ្ឋសភា ព្រឹទ្ធសភា និងអធិការកិច្ច និងជាប្រធានក្រុមការងារថ្នាក់ជាតិចុះជួយខេត្តស្វាយរៀង, នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងលោក ឌី វិជ្ជា ប្រធានសហភាពសហព័ន្ធយុវជនកម្ពុជាខេត្តស្វាយរៀង ដើម្បីស្វែងរកអន្តរាគមន៍ដោះស្រាយបញ្ចប់បញ្ហាជូនពួកគាត់ ជាមួយម្ចាស់ឡសត្តឃាត ដែលបានអូសបន្លាយក្នុងរយៈពេលជាង១០ឆ្នាំមកហើយ។

កាលពីថ្ងៃទី១៥ ខែធ្នូ ឆ្នាំ២០១៨កន្លងទៅនេះ ក្រុមអាជីវកររកស៊ីកាប់លក់សាច់ជ្រូក និងសាច់គោ ចន្លោះពី២០ទៅ៣០នាក់ នៅផ្សារវាលយន្ត ក្រុង-ខេត្តស្វាយរៀង បាននាំគ្នាផ្ទុះការតវ៉ាម្តងទៀត ដើម្បីទាមទារឲ្យម្ចាស់ឡសត្តឃាត បញ្ឈប់ការយកលុយសម្រាប់ការបង់ថ្លៃឡ ដែលរហូតមកដល់ពេលនេះ ម្ចាស់ឡបានតម្រូវឲ្យបង់ក្នុងរយៈពេល១០ឆ្នាំមកហើយ និងម្យ៉ាងទៀត ឡសត្តឃាតនេះ ត្រូវបានក្លាយជារបស់រដ្ឋទៅហើយ។ ពោលពួកគាត់សុំត្រឹមការបង់ភាស៊ីឡ និងថ្លៃពេទ្យសត្វប៉ុណ្ណោះ ដែលជាការបង់ប្រចាំថ្ងៃ ហើយក៏មិនចង់បង់ឲ្យស្ថាប័នផ្សេងទៀតនោះដែរ។

ថ្លែងប្រាប់អង្គភាពព័ត៌មាន Fresh News នៅថ្ងៃទី១៧ ខែធ្នូ ឆ្នាំ២០១៨នេះ អ្នកស្រី កេត សឿន អ្នករកស៊ីកាប់សាច់ជ្រូកនៅក្នុងផ្សារវាលយន្ត បានឲ្យដឹងថា​ រាល់ថ្ងៃក្រុមអាជីវករទាំងអស់ បានបង់ថ្លៃឡសត្វឃាតមួយក្បាលជ្រូក និងគោ​ចាប់ពី៣០០០រៀល ទៅ៤០០០រៀល ខណៈពេទ្យសត្វត្រូវបង់ចំនួន១៥០០រៀល រួមទាំងស្ថាប័នផ្សេងទៀត។ អ្នកស្រីបានបន្តថា ឡសត្តឃាតត្រូវបានបង្កើត តាំងពីឆ្នាំ១៩៩៨មកម្ល៉េះ នៅលើទន្លេវៃគោ ដោយចាប់ពីពេលនោះ មកក្រុមអាជីវករត្រូវបង់ថ្លៃឡ​ ថ្លៃភាស៊ី ប៉ុន្តែនៅឆ្នាំ២០០៨ ឡសត្តឃាតត្រូវបានចាត់បញ្ចុលជារបស់រដ្ឋ ដូច្នេះមិនតម្រូវឲ្យបង់ថ្លៃឡទៅទៀតឡើយ។

បើតាមអ្នកស្រី បើទោះបីក្លាយជារបស់រដ្ឋ និងតម្រូវមិនឲ្យថ្លៃឡនោះក៏ដោយ ប៉ុន្តែអ្នកគ្រប់គ្រងឡ នៅតែឲ្យក្រុមអាជីវករបង់ដដែល រហូតពួកគាត់កាលពីដើមឆ្នាំ ក៏នាំគ្នាធ្វើការតវ៉ាតែម្តង។ រហូតមកដល់ះពេលនេះ ការតវ៉ាទាំងប៉ុន្មានលើកមកនោះ ពុំដែលមានដំណោះស្រាយដែលអាចទទួលយកបានឡើយ។

អ្នកស្រី កេត សឿត បានបន្តទៀតថា ក្រុមអាជីវករទាំងអស់សុំស្នើចំនួន៣ចំណុចរួមមាន៖

*ទី១៖ ចង់ឲ្យអ្នកគ្រប់គ្រងឡបញ្ឈប់ការយកថ្លៃឡ ដែលមួយក្បាលជ្រូក និងគោ មិនតិចជាង២០០០រៀលនោះទេ
*ទី២៖ ចង់ឲ្យមានការផ្លាស់ប្តូរអ្នកគ្រប់គ្រងឡ ដោយចង់ដាក់អ្នកថ្មីជំនួសវិញ ដោយសារអ្នកគ្រប់គ្រងបច្ចុប្បន្នប្រើពាក្យមើលងាយដល់ក្រុមអាជីវករ
*ទី៣៖ ចង់ឲ្យពេទ្យសត្វ យកថ្លៃត្រឹម១០០០រៀលបានហើយ ដូចកាលពីអតីតកាល ដោយសារបច្ចុប្បន្នយកថ្លៃ១៥០០រៀលក្នុងមួយក្បាល។

ចំពោះបញ្ហាទាំងនេះ អង្គភាពព័ត៌មាន Fresh News មិនទាន់អាចស្វែងរកការបកស្រាយពីម្ចាស់ឡសត្តឃាតបាននោះទេ ខណៈមន្រ្តីអាជ្ញាធរ ក៏បាននិងកំពុងពិនិត្យបញ្ហានេះ​ដើម្បីដោះស្រាយជូន។

ក្រុមអាជីវករបានសំណូមពរដល់អាជ្ញាធរ ដែលពាក់ព័ន្ធមេត្តាជួយសម្រួល ដល់ពួកគាត់ផង ដោយសុំឲ្យពួកគាត់បង់តែភាស៊ី និងពេទ្យសត្វ ព្រោះមិនអាចបង់ឲ្យស្ថាបន័ផ្សេងៗទៀតបានទេ។

ចំពោះករណីខាងនេះ មន្ត្រីម្នាក់បានបង្ហើបឲ្យដឹងថា អាជីវករខ្លះគាត់កាប់ជ្រូក-គោ នៅផ្ទះពុំបានយកចូលក្នុងឡសត្តឃាតនោះទេ ហើយម្ចាស់ឡ និងពេទ្យសត្វ ទៅយកលុយដល់ផ្ទះ ឬដល់តូបលក់តែម្តង ដោយពុំបានពិនិត្យសុខភាពសត្វឲ្យបានត្រឹមត្រូវនោះទេ៕