(ព្រះវិហារ)៖ ប្រជាពលរដ្ឋរងគ្រោះ ដោយសារភ្លើងឆេះផ្ទះមួយគ្រួសារ រស់នៅភូមិស្វាយប៉ាត ឃុំរំដោះ ស្រុករវៀង ខេត្តព្រះវិហារ បានទទួលអំណោយសង្គ្រោះបន្ទាន់ ពីកាកបាទក្រហមកម្ពុជានៅថ្ងៃទី១៦ ខែធ្នូ ឆ្នាំ២០១៨។
លោក ហោ ប៊ុនហ៊ួរ អភិបាលស្រុករវៀង ខេត្តព្រះវិហារ និងជាប្រធានកិត្តិយសអនុសាខា កាកបាទក្រហមកម្ពុជាស្រុក បានសំដែងនូវការសោកស្តាយ ជាមួយគ្រួសាររងគ្រោះ ចំពោះឧបត្តិវហេតុនេះ។ ជាមួយគ្នានេះដែរ លោកក៏បានលើកទឹកចិត្តដល់គ្រួសាររងគ្រោះ សូមកុំអស់សង្ឃឹម ព្រោះមានកាកបាទក្រហមកម្ពុជា ក្រោមការដឹកនាំ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជាប្រធានកាកបាទក្រហមកម្ពុជា តែងតែមានការគិតគូរយកចិត្តទុកដាក់ជានិច្ច ចំពោះប្រជាពលរដ្ឋ ដែលរងគ្រោះផ្សេងៗ។
លោក ហោ ប៊ុនហ៊ួរ បានអំពាវនាវដល់ប្រជាពលរដ្ឋ ត្រូវមានការប្រុងប្រយត្ន័ ចំពោះភ្លើងឆេះព្រៃ ព្រោះគ្រួសាររងគ្រោះខាងលើនេះ គឺផ្ទះគាត់ត្រូវភ្លើងព្រៃ ឆេះរាលមក ហើយស្របពេលដែល គាត់មិននៅផ្ទះ នៅតែកូនតូចមិនអាចជួយពន្លត់បាន។ ម៉្យាងទៀតនៅភូមិកំពត និងភូមិថ្កែង ក្នុងឃុំរហ័ស ក៏មានករណីភ្លើងឆេះព្រៃ រាលដាលជិតដល់ភូមិប្រជាពលរដ្ឋដែរ។ ដូច្នេះសូមប្រជាពលរដ្ឋ ត្រូវមានការប្រុងប្រយ័ត្នទាំងអស់គ្នា។
សូមបញ្ជាក់ថាសម្ភារ ដែលបានផ្តល់ជូនគ្រួសាររងគ្រោះ ក្នុងពេលនោះរួមមាន៖ អង្ករ ២៥ គីឡូក្រាម, មី ១កេស, ត្រីខ ១០កំប៉ុង, ទឹកត្រីទឹកស៊ីអ៉ីវ១យួរ, តង់១, សារុង១, ក្រមា១, មុង១, ភួយ១, សម្ភារមួយចំនួនទៀត និងថវិកាមួយចំនួនរួមនឹងថវិការបស់សប្បុរសជនសរុបចំនួន ១,៣៨០,០០០រៀលផងដែរ៕
