(ភ្នំពេញ)៖ លោក គង់ គាំ អតីតប្រធានគណបក្សសមរង្ស៉ី និងជាមនុស្សជំនិតរបស់ លោក សម រង្ស៉ី នៅថ្ងៃទី១៣ ខែធ្នូ ឆ្នាំ២០១៨នេះ បានចាត់ទុកថា ចំណាត់ការរបស់ លោក សម រង្ស៉ី ដែលហាមមិនឱ្យអតីតថ្នាក់ដឹកនាំនៃអតីតគណបក្សសង្រ្គោះជាតិទទួលយកសិទ្ធិធ្វើនយោបាយឡើងវិញ គឺជាអំពើឃោរឃៅ និងផ្តាច់ការ។

ប្រតិកម្មរបស់ លោក គង់ គាំ បានធ្វើឡើងបន្ទាប់ពី លោក សម រង្ស៉ី មេចលនាសង្រ្គោះជាតិ បានព្រមានដល់អតីតថ្នាក់ដឹកនាំ នៃអតីតគណបក្សសង្រ្គោះជាតិ មិនឱ្យទទួលយកការដកបម្រាមសិទ្ធិនយោបាយឡើងវិញឡើយ ហើយប្រកាសថា បើសិនជាមាននរណាម្នាក់ ទទួលយកការដកបម្រាមនេះ អ្នកនោះគឺជាជនក្បត់បក្សតែម្តង។

លោក គង់ គាំ បានបង្ហោះនៅលើ Facebook របស់លោក យ៉ាងដូច្នេះថា៖ «អនុវត្តច្បាប់គណបក្ស​នយោបាយ លោក សម រង្សុី បានលាចេញពី​ CNRP (ទាំងតួនាទីប្រធាន​ ទាំងសមាជិកភាព)។ CNRP ដែលឈប់ប្រើរូបសញ្ញា (សម​ រង្សុី-កឹម សុខា ចាប់ដៃគ្នា) ក៏ទទួលស្គាល់ថារូបទណ្ឌិតមិនអាចប្រើបាន។ ដូចនេះ តួនាទីប្រធានចលនាសង្គ្រោះជាតិ​ និងប្រធានស្តីទី CNRP របស់លោក សម រង្សុី (សាមីខ្លួនទទួលស្គាល់ថា ប្រធានចលនាមិនអាចប្រើជាមួយអន្តរជាតិបាន​ ហើយតួនាទីប្រធានស្តីទីដែលផ្ទៃក្នុងមិនទទួលយក ដូចនេះអន្តរជាតិកាន់តែមិនអាចទុកជាផ្លូវការ​ និងស្របច្បាប់បានទៀត)»។

លោកបានបន្តថា «ភាពឯកជនឯកោរបស់ សម រង្សុី កាន់តែប្រឹងភ្ជាប់ជាមួយ​ CNRP កាន់តែបង្ហាញនូវចេតនាបំផ្លាញគេឯងដែលមិនរួមគំនិតជាមួយខ្លួន។​ មួយចំនួននៃ ១១៨ ដែលជាប់បម្រាមថា៖ ការអំពាវនាវរបស់លោក សម រង្សុី គឺឃោឃៅ និងផ្តាច់ការ»។

លោកបានបន្តទៀតថា លោក សម រង្សុី ដែលធ្លាប់ទទួលការលើកលែងទោសពីព្រះមហាក្សត្រ ស្របតាមសំណើនាយករដ្ឋមន្ត្រី មិនដែលទទួលថា ខ្លួនក្បត់នឹងអ្នកបាត់បង់ជីវិតពីការគប់គ្រាប់បែកបួនគ្រាប់នៅជិតអតីតរដ្ឋសភា តាមរយៈការទម្លាក់ចោលបណ្តឹងទេ​​ និងក្បត់អ្នកប្រជាធិបតេយ្យ និងប្រជាពលរដ្ឋ ដោយព្រមធ្វើវិសោធនកម្មរដ្ឋធម្មនុញ្ញ ពីសំឡេងពីរភាគបីមកត្រឹមហាសិបបូកមួយនោះឡើយ៕