(បន្ទាយមានជ័យ)៖ លោកឧត្តមសេនីយ៍ឯក លឹម សុខារស្មី ប្រធាននាយកដ្ឋានគ្រប់គ្រងសន្ដិសុខឯកជន នៃអគ្គស្នងការដ្ឋាននគរបាលជាតិ បានអំពាវនាវដល់ ភ្នាក់ងារសន្ដិសុខឯកជន ដែលឆ្លងកាត់វគ្គបណ្ដុះបណ្ដាល ត្រូវយកចំណេះដឹងទៅអនុវត្តដើម្បីបុព្វហេតុជាតិជាធំ បម្រើផលប្រយោជន៍សង្គមជាតិក្នុងផ្លូវវិជ្ជមាន ស្របតាមក្របសីលធម៌ វិជ្ជាជីវៈរបស់សន្ដិសុខ និងអនុលោមទៅច្បាប់របស់កម្ពុជា។
ការអំពាវនាវរបស់លោកឧត្តមសេនីយ៍ លឹម សុខារស្មី ធ្វើឡើងក្នុងឱកាសបិទវគ្គបំប៉នជំនាញច្បាប់ ដល់ភ្នាក់ងារសន្ដិសុខឯកជន និងប្រគល់វិញ្ញាបនបត្របញ្ជាក់ការសិក្សា ជូនភ្នាក់ងារសន្ដិសុខឯកជន នៅខេត្តបន្ទាយមានជ័យ នាថ្ងៃទី១១ ខែធ្នូ ឆ្នាំ២០១៨។
បន្ថែមពីនេះ លោកឧត្តមសេនីយ៍ឯក លឹម សុខារស្មី ក៏បានលើកទឹកចិត្តឲ្យភ្នាក់ងារសន្ដិសុខឯកជន យកចំណេះដឹងដែលទទួលបាននៅពេលនេះ ទៅផ្សព្វផ្សាយ និងចែករំលែកបន្ដដល់សហសេវិករបស់ខ្លួន ឬប្រជាពលរដ្ឋដទៃទៀតឲ្យបានយល់ដឹងអំពីសារសំខាន់ នៃការថែរក្សា សុវត្ថិភាព សណ្ដាប់ធ្នាប់ សន្ដិសុខសង្គម ដើម្បីចូលរួមចំណែកអនុវត្តគោលនយោបាយភូមិឃុំមានសុវត្ថិភាព របស់រាជរដ្ឋាភិបាល។
បើតាមលោកឧត្តមសេនីយ៍ប្រធាននាយកដ្ឋាន ក្រុមហ៊ុនសន្តិសុខទាំងអស់ ត្រូវតែជ្រាបគ្រប់គ្នាថា សន្តិសុខឯកជនពុំមែនមានតួរនាទីត្រឹមតែជាអ្នកការពារ ទ្រព្យសម្បត្តិឯកជន ឬក៏សហគ្រាសគ្រឹះស្ថានឯកជនប៉ុណ្ណោះទេ តែក៏មានកាតព្វកិច្ចចូលរួមការពារសាធារណៈសន្តិសុខ សង្គម និងអាយុជីវិត របស់ប្រជាពលរដ្ឋផងដែរ ជាពិសេសមានតួនាទីជាកម្លាំងជំនួយដ៏សំខាន់ ដល់អាជ្ញាធរមានសមត្ថកិច្ច។
លោកឧត្តមសេនីយ៍ បានបន្តទៀតថា ប្រទេសកម្ពុជាមានការអភិវឌ្ឍលើគ្រប់វិស័យ ក្រោមការដឹកនាំរបស់ សម្ដេចតេជោ ហ៊ុន សែន ធ្វើឲ្យប្រទេសជាតិយើង ទទួលបានសុខសន្តិភាពស្ថិរភាពសង្គម។ ហេតុនេះបានធ្វើឲ្យទាក់ទាញអ្នកវិនិយោគជាច្រើន មកបណ្តាក់ទន់ស្ទើរគ្រប់វិស័យ ក្នុងនោះវិស័យសន្តិសុខឯកជន គឺជាវិស័យដ៏សំខាន់មួយដែលត្រូវចូលរួមចំណែកយ៉ាងសកម្មក្នុងការថែរក្សាសន្តិសុខ សណ្តាប់ធ្នាប់ ទ្រព្យសម្បត្តិ សុវត្ថិភាព អាយុជីវិត ជូនប្រជាពលរដ្ឋអ្នកវិនិយោគ ភ្ញៀវទេសចរជាតិ អន្តរជាតិផង។
ហេតុដូច្នេះហើយទើបរាជរដ្ឋាភិបាល ជាពិសេសក្រសួងមហាផ្ទៃ តែងតែយកចិត្តទុកដាក់ជំរុញ និងលើកទឹកចិត្តដល់វិស័យសន្តិសុខឯកជន នៅក្នុងប្រទេសកម្ពុជា ឲ្យទទួលបានទំនុកចិត្តក្នុងការប្រកបអាជីវកម្មរបស់ខ្លួន ដោយសុខស្ថិរភាព និងនិត្យានុកូលភាព។ ជាក់ស្តែករាជរដ្ឋាភិបាលកម្ពុជា បានសម្រេចបង្កើត នាយកដ្ឋានគ្រប់គ្រងសន្តិសុខឯកជន កាលពីឆ្នាំ២០១៦កន្លងទៅនេះ គឺដើម្បីគ្រប់គ្រង គាំពារសហការ និងផ្តល់និត្យានុកូលភាពដល់ក្រុមហ៊ុនផ្តល់សេវា សន្តិសុខឯកជន និងសហគ្រាសគ្រឹះស្ថាន ដែលប្រើប្រាស់សន្តិសុខឯកជនទូទាំងប្រទេសកម្ពុជា។
លោកបានបន្តទៀតថា ស្តែងចេញពីការយកចិត្តទុកដាក់នេះហើយ ទើបធ្វើឲ្យយើងទាំងអស់គ្នាបានជួបជុំគ្នានៅទីនេះ ក្នុងពិធីបើកវគ្គបំប៉នជំនាញ ភ្នាក់ងារសន្តិសុខឯកជន នាឱកាសនេះ។ ដោយយោងតាមស្មារតីសេចក្តីណែនាំ របស់ក្រសួងមហាផ្ទៃ និងពិនិត្យឃើញថា ភ្នាក់ងារសន្តិសុខឯកជន បានចូលរួមចំណែកយ៉ាងសកម្ម ក្នុងការថែរក្សាសន្តិសុខសណ្តាប់ធ្នាប់ ទ្រព្យសម្បត្តិសុវត្ថិភាព អាយុជីវិត ជូនប្រជាពករដ្ឋ អ្នកវិនិយោគភ្ញៀវទេសចរជាតិ អន្តរជាតិ៕
