(ភ្នំពេញ)៖ បន្ទាប់ពីបើកសវនាការមុនអង្គសេចក្តី នៅព្រឹកថ្ងៃទី១១ ខែធ្នូ ឆ្នាំ២០១៨នេះ លោក សេង រិទ្ធី ប្រធានក្រុមប្រឹក្សាចៅក្រមជំនុំជម្រះ នៃសាលាដំបូងរាជធានីភ្នំពេញ បានប្រកាសសាលក្រមសម្រេចរឹបអូសយកគ្រឿងញៀន ប្រភេទអ៊ិចស្តាហ្ស៊ី (MD និង MA) ចំនួន១,០០៨.៣៧ក្រាម (ជាង១០គីឡូ) ដែលសមត្ថកិច្ចដកហូតបានពីជនជាប់ចោទ ជាជនជាតិចិន២នាក់ ទុកបំផ្លាញចោល។
នៅក្នុងសវនាការមុនអង្គសេចក្តីនេះ ជនជាប់ចោទឈ្មោះ Lin chin chai ភេទប្រុស អាយុ២៤ឆ្នាំ ជនជាតិចិនដីគោគ និងឈ្មោះ Lai kuan yu ភេទប្រុស អាយុ២៥ឆ្នាំ ជនជាតិចិនតៃវ៉ាន់ បានបដិសេធថា គ្រឿងញៀនទាំងអស់នោះមិនមែន ជារបស់ពួកគេនោះទេ ហើយគ្រឿងញៀនទាំងអស់នោះ ជារបស់ឈ្មោះ Daniva ផ្ញើមកពីប្រទេសអាល្លឺម៉ង់ ប្រាប់ឲ្យពួកគេទៅទទួល តែពួកគេអត់ដឹងថា វាជាគ្រឿងញៀនឡើយ។
គួររំលឹកថា ជនជាប់ចោទទាំង២នាក់ខាងលើ ត្រូវបានសមត្ថកិច្ចនាយកដ្ឋានសន្តិសុខផ្ទៃក្នុង ឃាត់ខ្លួនកាលពីថ្ងៃទី១០ ខែកក្កដា ឆ្នាំ២០១៨ នៅប៉ុស្តិ៍ប្រៃសណីកម្ពុជា សង្កាត់វត្តភ្នំ ខណ្ឌដូនពេញ ហើយនៅពេលឃាត់ខ្លួន ជនជាប់ចោទ ឈ្មោះ Lin chin chai សមត្ថកិច្ចបានរកឃើញគ្រឿងញៀន ចំនួន១,០០៨.៣៧ក្រាម ដែលច្រកក្នុងកេសបិតជិត។
ក្រោយឃាត់ខ្លួន ជនជាប់ចោទឈ្មោះ Lin chin chai បានអះអាងថា ខ្លួនទៅទទួលឥវ៉ាន់នោះ ជំនួសជនជាប់ចោទឈ្មោះ Lai kuan yu ហើយក្រោយមកទើបសមត្ថកិច្ចឈានដល់ការឃាត់ខ្លួន ជនជាប់ចោទឈ្មោះ Lai kuan yu ដើម្បីកសាងសំណុំរឿងបញ្ជូនទៅតុលាការ៕
