(ព្រៃ​វែង)៖ មន្រ្តីសាខាកាំកុងត្រូលខេត្តព្រៃវែង នៅថ្ងៃទី៦ ខែធ្នូ ឆ្នាំ២០១៨នេះ ​បានសហការជាមួយមន្រ្តីមន្ទីរពាណិជ្ជកម្ម និងគណៈកម្មការផ្សារ បន្តចុះត្រួតពិនិត្យទំនិញ ដែលដាក់តាំងលក់ នៅផ្សារទានភ្លើង ស្ថិតនៅតាមបណ្តោយផ្លូវជាតិលេខ៨ ក្នុងភូមិទានភ្លើង ឃុំស្មោងខាងជើង ស្រុកកំចាយមា ខេត្តព្រៃវែង។

មន្រ្តីសាខាកាំកុងត្រូលខេត្តព្រៃវែង បានឲ្យដឹងថា ក្នុងការត្រួតពិនិត្យ​ មន្រ្តីជំនាញបានធ្វើវិភាគបឋម រកសារធាតុគីមីហាមឃាត់ ទៅលើ នំបញ្ចុក, ប្រហិតសាច់គោ, ប្រហិតត្រី, ទឹកខ្មេះជូផ្តែម, គល់ស្លឹកគ្រៃហាន់, ស្ពៃជ្រក់ សរុបបាន៧គំរូ ដែលលទ្ធផល មន្ត្រីជំនាញរកពុំឃើញ​វត្តមានសារធាតុគីមីហាមឃាត់ទេ។

ក្រៅពីការវិភាគ មន្ត្រីជំនាញក៏បានរកឃើញទំនិញខូចគុណភាព ហួសថ្ងៃកំណត់ប្រើប្រាស់ ដោយបានធ្វើកំណត់ ដកហូតទំនិញចំនួន៩មុខ សរុប៦៧.៨គីឡូក្រាម ទុកដុតកម្ទេចចោលដូចជា៖ ស្ករគ្រាប់, ទឹកក្រូច, សណ្តែកខៀវកំប៉ុង, តៅហ៊ូ, ប៊ឺ , ត្រីខកំប៉ុង , ម៉សៅបំពងស្រួយ , នំស្រួយ និងចាហ៊ួយដូង (ថាញ់ប៊ិញ)។

ក្នុងឱកាសនោះ ​ក្រុមការងារ ក៏បានផ្សព្វផ្សាយអប់រំណែនាំដល់អាជីវករ ឲ្យដឹងអំពីសុវត្ថិភាពម្ហូបអាហារ ដោយបានចែក និងបិទផ្ទាំងរូបភាពផ្សព្វផ្សាយ «Poster» ផងដែរ។

មន្រ្តីកាំកុងត្រូល ក៏បានណែនាំអាជីវករឲ្យយល់ដឹងពីអនាម័យ ការរៀបចំទំនិញលក់ដូរ ឲ្យមានសណ្តាប់ធ្នាប់ ទៅតាមប្រភេទទំនិញហូបចុក និងទំនិញប្រើប្រាស់ផ្សេងៗ ដាក់ដាច់ដោយឡែកៗពីគ្នា ចៀសវៀងការដាក់តាំងលក់ទំនិញ ហួសកាលបរិច្ឆេទប្រើប្រាស់ កំប៉ុងកំពិត ប៉ោង ច្រេះស៊ី និងទំនិញដែលមានសារធាតុគីមីហាមឃាត់៕