(ភ្នំពេញ)៖ ក្នុងនាមជាប្រធានសមាគមបញ្ញវន្តមុស្លិមកម្ពុជា ដែលហៅកាត់ថា (ស.ប.ម.ក) លោក អូស្មាន ហាស្សាន់ ទេសរដ្ឋមន្រ្តីទទួលបន្ទុកបេសកកម្មពិសេស នៅព្រឹកថ្ងៃទី០៦ ខែធ្នូ ឆ្នាំ២០១៨​នេះ បានដឹកនាំគណៈប្រតិភូ១៧នាក់ តំណាងបញ្ញវន្តមុស្លិមកម្ពុជា រួមមាន៖ សមាជិក សមាជិការដ្ឋសភា ថ្នាក់ដឹកនាំក្រសួងនានា ចេញដំណើរទៅចូលរួម កិច្ចប្រជុំបង្កើតសមាគមបញ្ញវន្តមុស្លិមអាស៊ីអាគ្នេយ៍ (ICMA) នៅទីក្រុង Lampung កោះស៊ូម៉ាត្រា សាធារណៈរដ្ឋឥណ្ឌូនេស៊ី។​

កិច្ចប្រជុំនេះ នឹងធ្វើឡើងចាប់ពីថ្ងៃទី០៧ ដល់ទី០៩ ខែធ្នូ ២០១៨ ក្រោមអធិបតីភាព លោក YTH Bapak Ir. H. Joko Widodo ប្រធានាធិបតី នៃសាធារណរដ្ឋឥណ្ឌូនេស៊ី។

ទេសរដ្ឋមន្ដ្រី អូស្មាន ហាស្សាន់ បានបញ្ជាក់ថា កិច្ចប្រជុំនេះ គឺធ្វើឡើងក្នុងគោលបំណងបង្រួបបង្រួមបញ្ញវន្តមុស្លិមទូទាំងបណ្តាប្រទេស សមាជិកអាស៊ាន ឲ្យក្លាយទៅជាសមាគមសម្ព័ន្ធបញ្ញវន្តមុស្លិម អាស៊ីអាគ្នេយ៍ ដែលហៅកាត់ថា ICMA។ កិច្ចប្រជុំនេះ នឹងមានការអញ្ជើញចូលរួមពីសំណាក់បញ្ញវន្តមុស្លិម តំណាងមកពី​១១ប្រទេស រួមមាន ឥណ្ឌូនេស៊ី ម៉ាឡេស៊ី ប្រុយណេ ថៃ សិង្ហបុរី ហ្វីលីពីន កម្ពុជា វៀតណាម ឡាវ មីយ៉ាន់ម៉ា និងទីម័រខាងកើត។​

គួរបញ្ជាក់ថា ក្រោយបញ្ចប់កិច្ចប្រជុំនៅឥណ្ឌូនេស៊ី ​ទេសរដ្ឋមន្រ្តី អូស្មាន ហាស្សាន់ នឹងបន្តបេសកកម្មក្រៅប្រទេស ទៅកាន់ប្រទេសអារ៉ាប៊ីសាអូឌីត នៅថ្ងៃទី១០ ខែធ្នូ ឆ្នាំ ២០១៨ ដើម្បីទៅចូលរួម​សន្និសីទអន្តរជាតិ ស្តីអំពី សាមគ្គីភាពឥស្លាម គ្រោះថ្នាក់នៃការលាបពណ៌ និងអបរិយាបណ្ណ ក្រោមការរៀបចំរបស់អង្គការសម្ព័ន្ធ ឥស្លាមពិភពលោក (Rabita) ដែលនឹងត្រូវធ្វើឡើង នៅថ្ងៃទី១២ និង១៣ ខែធ្នូ ឆ្នាំ២០១៨ នៅទីក្រុងម៉ាក្កះ។

ក្នុងឱកាសនេះដែរ ​ទេសរដ្ឋមន្រ្តី អូស្មាន ហាស្សាន់ នឹងអញ្ជើញជួបពិភាក្សាការងារជាមួយ Sheikh Abdullatif bin Abdulaziz Al-Sheikh រដ្ឋមន្រ្តីក្រសួងកិច្ចការសាសនាអារ៉ាប៊ីសាអូឌីត នៅទីក្រុងរីយ៉ាដផងដែរ។ នេះបើតាមការបញ្ជាក់ឲ្យដឹងពីលោក កៅ អ៊ីមរ៉ន អនុរដ្ឋលេខាធិការក្រសួងព័ត៌មាន ដែលអមដំណើរជាមួយគណៈប្រតិភូ៕​