(សៀមរាប)៖ ​សហភាពសហព័ន្ធយុវជនកម្ពុជា (ស.ស.យ.ក) ខេត្តសៀមរាប នៅថ្ងៃទី០១ ខែធ្នូ ឆ្នាំ២០១៨ សហការជាមួយអង្គការមនុស្សធម៌ដើម្បីកុមារ និងស្ត្រី បានរៀបចំកម្មវិធី «ជិះកង់ដើម្បីកុមារ» លើកទី១៣ នៅតំបន់អង្គរ ដែលមានអ្នកចូលរួមជនជាតិ-អន្តរជាតិ ជាង​៥០០នាក់ ស្ថិតក្នុងអធិបតីភាពរបស់លោក ពៅ ពិសិដ្ឋ អភិបាលរងខេត្តសៀមរាប, លោក ស៊ុ ម៉ាប់ អគ្គនាយកអាជ្ញាធរជាតិអប្សរា និងលោកស្រី ​ម៉ននី រង្សី អនុប្រធាន ស.ស.យ.ក ខេត្តសៀមរាប។

លោកស្រី ម៉ននី រង្សី បានឲ្យដឹងថា ឆ្នាំនេះជាលើកទី២ហើយ ដែល​ស.ស.យ.ក ខេត្ត បានចូលរួមសហការជាមួយអង្គការមនុស្សធម៌ដើម្បីកុមារ និងស្ត្រី, អាជ្ញាជាតិអប្សរា, ក្រុមហ៊ុន និងអង្គភាពពាក់ព័ន្ធនានា រៀបចំព្រឹត្តិការណ៍ «ជិះកង់ដើម្បីកុមារ» នៅលើទឹកដីអង្គរ​ ដែលពិធីនេះ​មានអ្នកចូលរួមជាយុវជន មនុស្សចាស់ ក្មេងៗកុមារ ទាំងប្រុស ទាំងស្រី និងមានលោកតាវ័យ ៨៦ឆ្នាំម្នាក់ បានចូលរួមជិះក្នុងចម្ងាយ​១១៧គីឡូម៉ែត្រ​ផងដែរ ពិសេសលោកតា តែងតែចូលរួមជិះកង់នៅតំបន់អង្គរស្ទើរគ្រប់ពេល ដោយមិនបានបោះបង់ការជិះកង់ពាក់កណ្ដាលទី​ម្ដងណាឡើយ។

លោកស្រី បានបញ្ជាក់ថា កម្មវិធីនេះ នឹងបើកឱកាសឲ្យ​​ប្រជាពលរដ្ឋ ជាពិសេសប្អូនៗយុវជន បានចូលរួមចំណែកលើកស្ទួយវិស័យកីឡាកម្ពុជា តាមរយៈការជិះកង់ជាលក្ខណៈមិត្តភាព និងដើម្បីប្រមូលថវិកា ដែលនៅសល់ពីការចំណាយក្នុងកម្មវិធីនេះ ទៅជួយដល់កុមារ និងស្រ្ដីដែលរស់នៅក្នុងពន្ធនាគារ និងចែកកង់ សម្ភារៈសិក្សា ជូនប្អូនៗសិស្សានុសិស្ស ដែលមានបំណងចង់បន្តការសិក្សា តែខ្វះមធ្យោបាយ ដែលនេះជាផ្នែកមួយក្នុងការជួយលើកកម្ពស់ និងជំរុញការសិក្សារបស់កុមារ ដែលមានជីវភាពខ្វះខាត់ មានឱកាសសិក្សា​ដូចកុមារទូទៅ។

សូមបញ្ជាក់​ថា រយៈចម្ងាយនៃការជិះកង់ មាន​៣ប្រភេទ គឺទី១៖ កាជិះកង់រយៈចម្ងាយ​១៧គីឡូម៉ែត្រ ជាលក្ខណៈកម្សាន្ត, ទី២៖ ការជិះកង់រយៈចម្ងាយ ៣៧គីឡូម៉ែត្រ ជាការជិះកង់មានលក្ខណៈប្រកួតប្រជែង ដោយប្រើប្រាស់កង់ភ្នំ និងទី៣៖ ការជិះកង់រយៈចម្ងាយ ១១៧ គីឡូម៉ែត្រ ជាការជិះកង់មានលក្ខណៈប្រកួតប្រជែងដោយប្រើប្រាស់កង់គួក។

លោកស្រីបានបន្ថែមទៀតថា កាលពីឆ្នាំ២០១៧​កន្លងទៅ គឺមានអ្នកចូលរួមសរុប​៥៥៤នាក់ ក្នុងនោះមានបរទេស ចំនួន ២៣១នាក់ ហើយថវិកា​ដែលនៅសល់ ពីការរៀបចំកម្មវិធីក្នុងឆ្នាំ២០១៧ បានទិញកង់ជួយឧត្ថម្ភ ចំនួន​៥០កង់ ដល់សិស្សានុសិស្សក្រីក្រ នៅសាលាបឋមសិក្សាព្រៃទទឹង ក្នុងខេត្តសៀមរាប និងកង់មួយចំនួនទៀតដល់សិស្សានុសិស្ស នៅក្នុងខេត្តព្រៃវែង។

ក្នុងនោះឧត្ថម្ភថវិកា​ទៅដល់អង្គការ IL NODO ដែលជាអង្គការក្នុងស្រុកមួយដែលធ្វើការជួយទៅដល់កុមារ ដែលរស់នៅក្នុងពន្ធនាគាជាមួយម្ដាយ និងស្រ្តីដែលរស់នៅក្នុងពន្ធនាគារជាមួយម្ដាយ និងស្រ្ដីដែលរស់នៅក្នុងពន្ធនាគារ នៅកម្ពុជា។

បន្ថែមពីនេះ លោក ពៅ ពិសិដ្ឋ ក៏បានលើកឡើងថា សម្រាប់អាជ្ញាធរខេត្ត ​នឹងគាំទ្រ សហការ នូវការរៀបចំកម្មវិធី​ដើម្បីសកម្មភាពមនុស្សធម៌ «ជិះកង់ដើម្បីកុមារ» ហើយថវិកា​ដែលទទួលបាន គឺជួយដល់កុមារ និងស្រ្ដីដែលរស់នៅក្នុងពន្ធនាគារ រួមនិងចែកកង់ សម្ភារសិក្សា ជូនសិស្សានុសិស្ស ដែលនេះជាផ្នែកមួយក្នុងការជួយលើកកម្ពស់ និងជំរុញការសិក្សារបស់កុមារ​ផងដែរ៕