(សៀមរាប)៖ មន្រ្តីសាខាកាំកុត្រូលខេត្តសៀមរាប និងអាកាសយាន្តដ្ឋានអន្តរជាតិខេត្តសៀមរាប នៅព្រឹកថ្ងៃទី​២៧ ខែវិច្ឆិកា ឆ្នាំ២០១៨នេះ បានសហការជាមួយ មន្រ្តីមន្ទីរ​ពាណិជ្ជកម្ម គណៈកម្មការផ្សារ​ បានចុះត្រួតពិនិត្យទំនិញដែលដាក់តាំងលក់នៅក្នុង ផ្សារញ៉ែ (តាភុល) ដែលមានទីតាំងនៅ ភូមិតាភុល ឃុំ ស្វាយដង្គុំ ក្រុងសៀមរាប ខេត្តសៀមរាប។​

លោក​ ព្រៅ ខេមរិទ្ធ ប្រធានសាខាកាំកុត្រូល​ខេត្តសៀមរាប និងអាកាសយាន្តដ្ឋានអន្តរជាតិខេត្តសៀមរាប បានឲ្យដឹងថា នៅក្នុងឱកាសចុះអង្កេតទំនិញ នៅផ្សារញ៉ែ (តាភុល) មន្រ្ដីរបស់លោក​បានធ្វើការវិភាគជាបឋម ដោយប្រើតេស្ដឃីត លើផលិតផលម្ហូបអាហារ​ បន្លែ និងផ្លែឈើ ចំនួន១៣​គំរូ ដូចជា សណ្តែកបណ្តុះ, លត, គុយទាវភ្នំពេញ, ជ្រក់ស្ពៃ, តៅហ៊ូ, ជ្រក់មម៉ាញ, ខ្ញីហាន់, ផ្អក, នំបញ្ចុក, ទំពាំងបាយជូ, មៀន, ឡុងកុង, សាវម៉ាវ​។ ជាលទ្ធផល មន្រ្ដីរបស់លោក​រកពុំឃើញមានវត្តមានសារធាតុគីមី​ហាមឃាត់ ក្នុងផលិតផលទាំងនោះឡើយ។

ឆ្លៀតឱកាសនោះដែរ ក្រុមកាងារក៏បានចែកផ្សាយនូវ រូបភាព Poster និងផ្សព្វផ្សាយដល់អាជីវករអ្នកលក់ដូរ និងអ្នកប្រើប្រាស់​ឲ្យបានយល់ ដឹងអំពីផលវិបាក ដែលបណ្តាលមកពី​ការបរិភោគអាហារហួសកាលបរិច្ឆេទ ប្រើប្រាស់ និងការដាក់លាយបន្ថែម សារធាតុគីមី​ហាមឃាត់ចូលក្នុងម្ហូបអាហារ។

ជាមួយគ្នានោះ មន្រ្តីជំនាញបានធ្វើការណែនាំដល់អាជីវករឲ្យយល់ដឹងអំពី សុវត្ថិភាពម្ហូបអាហារ ពិសេស​ សូមកុំផលិត ឬយកទំនិញគ្មានគុណភាព ឬ​មានសារធាតុគីមីហាមឃាត់ មកដាក់តាំងលក់ ព្រោះនាំឲ្យប៉ះពាល់ដល់សុខភាពរបស់អ្នកប្រើប្រាស់៕​