(ភ្នំពេញ)៖ ទូកទាំង២៩៥ ស្មើនឹង១៤៨គូ ដែលចូលរួមប្រកួតថ្ងៃទី១ នឹងត្រូវប្រកួតឡើងវិញនៅថ្ងៃទី២នេះ ដោយគ្រាន់តែដូរគូប៉ុណ្ណោះ ពោលទូកឈ្នះប្រកួតជាមួយទូកឈ្នះ ទូកចាញ់ប្រកូតជាមួយទូកចាញ់។ នេះបើយោងតាមលោក ប៊ូ​ ជុំ​សេរី អនុប្រធានគណៈកម្មការបច្ចេកទេស និងជាប្រធានគណៈមេប្រយោគការប្រកួតទូក។

ថ្លែងប្រាប់ Fresh News នៅព្រឹកថ្ងៃទី២២​ ខែវិច្ឆិកា​នេះ​ លោក ប៊ូ ជុំសេរី បានបញ្ជាក់យ៉ាងដូច្នេះថា «អុំទាំងអស់គ្នាឡើងវិញ ប៉ុន្តមិនមែនប៉ះគូដដែលទេ។ កាលណាថ្ងៃទី១ ទូកលេខ១ប៉ះទូកលេខ២៥ អញ្ចឹងថ្ងៃទី២ ទូកលេខ១ប៉ះលេខ៣ទៅ លេខ៥ប៉ះលេខ៧ទៅ​ តាមឈ្នះតាមចាញ់។ យកទូកឈ្នះម្សិលមិញ គូជាមួយទូកឈ្នះ ទូកចាញ់ជាមួយទូកចាញ់»។

សូមជម្រាបថា យោងតាមគណៈកម្មាធិការជាតិ រៀបចំបុណ្យជាតិ-អន្តរជាតិ បានបង្ហាញបញ្ជីផ្គូទូក ក្នុងពិធីប្រណាំងទូក នៃឱកាសព្រះរាជពិធីបុណ្យអុំទូក​ បណ្តែតប្រទីប និងសំពះព្រះខែ ឲ្យដឹងថា មានទូកចំនួន២៩៥ ស្នើនឹង១៤៨គូសម្រាប់ប្រកួត។ ទូកទាំង២៩៥នេះ មានចំណុះទូក ១៩,០១៧នាក់ ហើយក្នុងនោះទូកអុំនារី១, អុំបុរសមាន ១៦៣ទូក, ទូកចែវនារី ១ទូក ចែវបុរសមាន៣២ និងទូកខ្នាតអន្តរជាតិនារី២ និងខ្នាតអន្តរជាតិបុរសមានចំនួន៩៦៕