(ភ្នំពេញ)៖ ប្រធានស្ថាប័នសិទ្ធិមនុស្សនៅកម្ពុជា លោក កែវ រ៉េមី នៅថ្ងៃទី២២ ខែវិច្ឆិកា ឆ្នាំ២០១៨នេះ កំពុងតែសម្ដែងការងឿង​ឆ្ងល់ថា ហេតុអ្វីបានលោកសុំទិដ្ឋាការ (Visa) ទៅសហរដ្ឋអាមេរិក ដើម្បីទៅលេងកូនមិនបាន ហើយចោទសួរថា «តើសិទ្ធិមនុស្សនៅឯណា​?»។

លោក កែវ រ៉េមី បានលើកឡើងទៀតថា កាលពីពេលកន្លងទៅលោកស្នើសុំទិដ្ឋាការ មិនដែលខកខាននោះទេ ប៉ុន្ដែអ្វីបានជាពេលនេះប្លែកគេពន្យាពេលរហូតដល់៣សប្ដាហ៍ ទើបបញ្ជាក់ឲ្យទិដ្ឋាការ ឬមិនឲ្យទិដ្ឋាការ ខណៈដែលមកដល់ថ្ងៃនេះជិត១០ថ្ងៃទៅហើយ នៅឡើយមិនទាន់ទទួលបានដំណឹង។

តាមរយៈ Facebook ផ្លូវការប្រធានស្ថាប័នសិទ្ធិមនុស្សរូបនេះ បានសរសេរយ៉ាងដូច្នេះថា «នឹកកូនពេក រត់ទៅសុំ VISA អាមេរិក។ ពីមុនសុំបានៗ តែពេលនេះប្លែក គេពន្យាពេល៣សប្តាហ៍ ថាឲ្យ ឬមិនឲ្យ។ ចូលជិត១​០ថ្ងៃហើយ នៅមិនទាន់ទទួលដំណឹង។ នៅសល់តែ​២ថ្ងៃទៀ​ត ទោះជាឲ្យក៏ទៅមិនបានដែរពីព្រោះរវល់ខ្លាំង។ សិទ្ធិមនុស្សនៅឯណា?»។

ប៉ុន្ដែទោះជាយ៉ាងណា លោក កែវ រ៉េមី មិនបានបញ្ជាក់អំពីមូលហេតុអ្វីនោះទេ បានជាស្ថានទូតអាមេរិកប្រចាំនៅកម្ពុជា មិនបានផ្ដល់ទិដ្ឋាការជូនរូបលោក យ៉ាងដូច្នេះ ខណៈរាល់លើកមិនដែលមានបញ្ហាបែបនេះឡើយ៕​