(កំពង់ចាម)៖ ក្រុមហ៊ុន ប៉េង ហួត គ្រុប បានដង្ហែរអង្គកឋិន ទៅកាន់វត្ដជ័យមង្គល ស្ថិតក្នុងភូមិព្រែកឪជ្រឹង ឃុំព្រែករំដេង នៅស្រុកស្រីសន្ធរ ខេត្ដកំពង់ចាម ដោយប្រមូលបច្ច័យទៅកសាងសមិទ្ធផលនានាក្នុងវត្ដអារាម ។
បុណ្យកឋិន ជាពិធីបុណ្យប្រពៃណីមួយ ដែលចាប់ផ្ដើមធ្វើបន្ទាប់ពីបុណ្យចេញវស្សា ហើយបុណ្យកឋិននេះ តែងត្រូវបានដង្ហែរចូលគ្រប់ទីអារាមទាំងអស់ ចាប់ពីថ្ងៃ ១រោច ខែអស្សុជដល់ថ្ងៃទី១៥កើត ខែកត្តិក។
នៅថ្ងៃទី១៩ ខែវិច្ឆិកា ឆ្នាំ២០១៨ ក្រុមហ៊ុន ប៉េង ហួត គ្រុប ក៏បានរៀបចំអង្គកឋិនទានមួយ ដែលបានដង្ហែរវេរប្រគេនព្រះសង្ឃ គង់ចាំព្រះវស្សា ក្នុងពុទ្ធសីមា នៅវត្តជ័យមង្គល
ដោយថ្នាក់ដឹកនាំ ប៉េង ហួត គ្រុប បានប្រគេននូវទេយ្យទាន និងបច្ច័យដល់ព្រះសង្ឃ យាយជី តាជី ព្រមទាំងចែកអំណោយ ជូនដល់ប្រជាពលរដ្ឋ សិស្សានុសិស្ស លោកគ្រូអ្នកគ្រូ ផងដែរ។
លើសពីនោះ ដើម្បីចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍវិស័យព្រះពុទ្ធសាសនា ដែលជាសាសនារបស់រដ្ឋ ឲ្យកាន់តែរីកចម្រើនបន្ថែមទៀតនោះ ក្រុមហ៊ុន ប៉េង ហួត គ្រុប បានរៀបចំ អង្គកឋិនទាន និងផ្តល់ជូននូវសមិទ្ធិផលនានាជាច្រើនផ្សេងទៀត ក្នុងវត្តជ័យមង្គល រួមមានព្រះវិហារ របង ខ្លោងទ្វារវត្ត ចាក់បេតុងផ្លូវចូលវត្ត ប្រវែង១,១០០ម៉ែត្រ ចាក់បេតុងជុំវិញព្រះវិហារ ប្រវែង៥០០ម៉ែត្រ ដងទង់ចំនួន២ដើម សួនផ្កាលំអ បុស្សសាបុក ខឿនរង្វង់មូល និងក្រាលការ៉ូឡាជាដើម ៕
