(ភ្នំពេញ)៖ ក្រោយបញ្ចប់ការទស្សនាការតាំងពិព័រណ៍បង្ហាញការហោះហើរឧទ្ធម្ភាគចក្រប្រភេទ Ansat និង MI-171A2 របស់រុស្ស៉ី នៅថ្ងៃទី២០ ខែវិច្ឆិកា ឆ្នាំ២១៨នេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ បានបង្ហាញក្តីរំពឹងថា នៅថ្ងៃអនាគតកម្ពុជា នឹងប្រើប្រាស់ឧទ្ធម្ភាគចក្រប្រភេទ Ansat និង MI-171A2 របស់ក្រុមហ៊ុន RUSSIAN HELICOPTER ដើម្បីសម្រួលដល់កិច្ចការមួយចំនួន។

រដ្ឋមន្ត្រីការពារជាតិកម្ពុជារូបនេះ បានថ្លែងយ៉ាងដូច្នេះថា៖ «អនាគតប្រហែលមានការប្រើប្រាស់យន្តហោះប្រភេទនេះជាមិនខាន នេះជាការចាប់អារម្មណ៍របស់ខ្ញុំ ការមើលថ្ងៃនេះ ក៏បានដឹងពីគុណភាព ប្រសិទ្ធភាព បន្ទាប់ពីក្រុមហ៊ុនធ្វើការឧទ្ទេសនាម យើងមានការពេញចិត្តខ្លាំងណាស់ អនាគតយើងមានក្តីសង្ឃឹមយ៉ាងមុតមាំថា នឹងមានវត្តមាននៅក្នុងប្រទេសយើង»។

ជាមួយគ្នានេះដែរ សម្តេចពិជ័យសេនា ទៀ បាញ់ ក៏បានកោតសសើរពីឧទ្ធម្ភាគចក្រប្រភេទ Ansat និង MI-171A2 ទាំងគុណភាព រូបរាង ប្រព័ន្ធសុវត្ថិភាព និងមានភាពរហ័សរហួន ព្រមទាំងបំពាក់ទៅដោយប្រព័ន្ធបច្ចេកវិទ្យា ដ៏ទំនើបចុងក្រោយនេះ ដែលមានវត្តមានផ្ទាល់នៅទឹកដី ព្រះរាជាណាចក្រកម្ពុជា នៅពេលនេះទោះបីកម្ពុជា មិនទាន់បានប្រើប្រាស់ផ្ទាល់យ៉ាងណាក៏ដោយ។

សម្ដេច ទៀ បាញ់ បានបន្ថែមយ៉ាងដូច្នេះថា៖ «ខ្ញុំនឹងសំណូមពរ ឱ្យពួកគាត់ (ក្រុមហ៊ុន) ងាកមកមើល បើសិនមានលទ្ធភាព ក្នុងការប្រើប្រាស់ ឧទ្ធម្ភាគចក្រ ដើម្បីបម្រើឱ្យការងារដែលខ្លួនមានលទ្ធភាពបាន គឺឱ្យគាត់ចាប់អារម្មណ៍។ ចាប់អារម្មណ៍យកយន្ដហោះប្រភេទនេះ Ansat និង MI-171A2 ប្រសើរជាង»។

សូមរំលឹកថា ឧស្សាហកម្មផលិតយន្តហោះរបស់សហព័ន្ធរុស្ស៉ី បាននាំយកឧទ្ធម្ភាគចក្រប្រភេទថ្មីទាំងនេះ ទៅចូលរួមហោះហើរបង្ហាញខ្លួន ក្នុងពិព័រណ៍អាកាស និងអវកាសនៅខេត្តស៊ូហៃ ប្រទេសចិន ដោយទទួលបានការគាំទ្រ និងការបញ្ជាទិញពីប្រទេសចិនផងដែរ កាលពីពេលថ្មីៗនេះមុននាំមកហោះហើរបង្អួតខ្លួននៅប្រទេសកម្ពុជា៕