(ភ្នំពេញ)៖ លោក សួន សេរីរដ្ឋា អតីតប្រធានគណបក្សអំណាចខ្មែរ នៅថ្ងៃទី១៥ ខែវិច្ឆិកា ឆ្នាំ២០១៨នេះ បានប្រកាសបបួលលោក សម រង្ស៉ី អតីតប្រធានគណបក្សប្រឆាំង ភ្នាល់ដាក់ជីវិតនយោបាយ។

ក្នុងការភ្នាល់នេះលោក សួន សេរីរដ្ឋា បានជឿជាក់ថា លោក សម រង្ស៉ី នឹងភ្នាល់ចាញ់សម្តេចតេជោ ហ៊ុន សែន ហើយនឹងមិនហ៊ានចូលស្រុកជារៀងរហូតដរាបណា គ្មានការស្នើលើកលែងទោសពីសម្តេចតេជោ ហ៊ុន សែន។ ក្នុងករណីនេះ លោកបានដាក់លក្ខខណ្ឌក្នុងការភ្នាល់ថា បើលោកសម រង្ស៉ី ហ៊ានចូលស្រុកដោយគ្មានការលើកលែងទោស លោក សួន សេរីរដ្ឋា សុខចិត្តបញ្ចប់ជីវិតនយោបាយ តែបើលោកមិនហ៊ានវិញ លោក សម រង្ស៉ី ត្រូវតែបញ្ចប់ជីវិតនយោបាយរបស់ខ្លួនវិញ។

លោក សួន សេរីរដ្ឋា បានថ្លែងយ៉ាងដូច្នេះថា៖ «ខ្ញុំថា សំផឹងនយោបាយដូច សម រង្ស៉ី បើលោក ហ៊ុន សែន មិនធ្វើសំណើសុំលើកលែងទោសឱ្យទេ គឺមិនហ៊ានវិលចូលស្រុកជារៀងរហូត ហើយបានត្រឹមតែឡែៗនៅក្រៅស្រុកប៉ុណ្ណឹង។ ទោះជាចាញ់ភ្នាល់ជាមួយនឹង លោក ហ៊ុន សែន ក៏ សម រង្ស៉ី មិនគោរពពាក្យសម្តីដែរ»។

លោកបានបន្តទៀតថា «ខ្ញុំ ប្រើពាក្យ "ជារៀងរហូត" គឺសំផឹងនយោបាយដូច សម រង្ស៉ី នេះមិនហ៊ានចូលស្រុក ដោយគ្មានសំណើសុំលើកលែងទោសពីលោក ហ៊ុន សែន ទេ។ ខ្ញុំ ភ្នាល់ដាក់ជីវិតនយោបាយ បើខាងណាចាញ់ គឺឈប់ធ្វើនយោបាយ ! ហើយការភ្នាល់នេះគ្មានកំរឹតពេលវេលាទេ។ ហ៊ាន ឬមិនហ៊ាន?»។

សូមបញ្ជាក់ថា ការចេញមុខភ្នាល់របស់ លោក សួន សេរីរដ្ឋា បានធ្វើឡើងបន្ទាប់ពី លោក សម រង្ស៉ី កាលពីថ្ងៃទី០៩ ខែវិច្ឆិកា ឆ្នាំ២០១៨ កន្លងទៅ បានយកជីវិតនយោបាយរបស់ លោក កឹម សុខា ទៅបបួលសម្តេចតេជោ ហ៊ុន សែន ភ្នាល់គ្នា។

ដោយអះអាងថា សម្ពាធបរទេសនឹងធ្វើឱ្យសម្តេចលើកលែងទោសដល់ លោក កឹម សុខានោះ លោក សម រង្ស៉ី បានកំណត់ការភ្នាល់ថា «បើសិនមានការដោះលែង កឹម សុខា នៅថ្ងៃទី២៩ ខែធ្នូ ឆ្នាំ២០១៨ ឬយ៉ាងយូរថ្ងៃទី០៣ ខែមីនា ឆ្នាំ២០១៩ ខាងមុខនោះ សម្តេចតេជោត្រូវចុះចេញពីតំណែង តែបើសិនមិនមានការដោះលែងទេ លោក សម រង្ស៊ី ស្ម័គ្រចិត្តប្រឈមចំពោះមុខច្បាប់ដោយចូលឲ្យសមត្ថកិច្ចចាប់ខ្លួន ដើម្បីអនុវត្តទោសក្នុងពន្ធនាគារ»។

ភ្លាមៗឆ្លើយតបនឹងការបបួលនេះ នៅព្រលប់ថ្ងៃទី០៩ ខែវិច្ឆិកា ឆ្នាំ២០១៨ ដដែលនោះ សម្តេចតេជោ ហ៊ុន សែន បានប្រកាសតាមរយៈបណ្តាញព័ត៌មាន Fresh News ដោយសម្រេចភ្នាល់ជាមួយលោក សម រង្ស៊ី តែម្តង។ សម្តេចបានកំណត់ថា ប្រសិនសម រង្ស៊ី ចាញ់ក្នុងការភ្នាល់លើកនេះ ត្រូវហ៊ានចូលឲ្យចាប់ខ្លួនដើម្បីអនវុត្តទោស បន្ទាប់ពីបញ្ចប់ការភ្នាល់ភ្លាមៗ៕