(ស្វាយរៀង)៖ ក្រោយពេលផឹកស្រាស្រវឹងជោក បុរសចិត្តកំណាចម្នាក់ បានបង្កការទាស់ពាក្យសម្ដីគ្នា ជាមួយប្រពន្ធខ្លួនឯង ហើយបានទាញស្នប់សប់កង់វាយប្រពន្ធ បណ្ដាលឲ្យសន្លប់ស្ដូកស្ដឹង។ ហេតុការណ៍នេះ បានកើតឡើង កាលពីវេលាម៉ោង៨៖២០នាទីយប់ ថ្ងៃទី១១ ខែវិច្ឆិកា ឆ្នាំ២០១៨ ស្ថិតក្នុងភូមិព្រៃទទឹង ឃុំប្រសត្រ ស្រុកស្វាយទាប ខេត្តស្វាយរៀង។
សមត្ថកិច្ចនគរបាលស្រុកស្វាយទាប បានឲ្យដឹងថា ស្រ្តីរងគ្រោះឈ្មោះ ស៉ីវ ស្រី អាយុ៣២ឆ្នាំ មុខរបរកសិករ រស់នៅភូមិព្រៃទទឹង ឃុំប្រសូត្រ ស្រុកស្វាយទាប ខេត្តស្វាយរៀង។ ចំណែកប្ដីកំហូចឈ្មោះ ញ៉ែម មករា អាយុ៣៥ឆ្នាំ មុខរបរកសិករ រស់នៅភូមិឃុំកើតហេតុជាមួយគ្នា។
បើតាមសមត្ថកិច្ច ប្តីបានស្រវឹងស្រា ហើយបានយកស្នប់សប់កង់ វាយមកលើប្រពន្ធ ត្រូវត្រង់ថ្គាមខាងឆ្វេង និងកន្លែងមួយចំនួនទៀត បណ្ដាលឱ្យសន្លប់នៅនឹងកន្លែងតែម្តង។ បន្ទាប់ពីកើតហេតុ ប្ដីបានរត់គេចខ្លួនបាត់។
បច្ចុប្បន្នស្រ្តីរងគ្រោះ ត្រូវបានក្រុមគ្រួសារបញ្ជូនទៅសម្រាកនៅមន្ទីរពេទ្យបង្អែក ស្រុកស្វាយទាប៕
