(ភ្នំពេញ)៖ អតីតអ្នករស់នៅលើអគារប៊ូឌិញ ចង់គោរពអញ្ជើញឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ចូលរួមក្នុងពិធីឡើងគេហដ្ឋានថ្មីរបស់ខ្លួន ដើម្បីជាការតបស្នងសងគុណ។

លោក វុទ្ធី ដែលជាអ្នកធ្លាប់រស់នៅអគារប៊ូឌិញ បានលើកឡើងថា ដោយសារតែមានការដោះស្រាយយ៉ាងល្អ ពីលោកឧបនាយករដ្ឋមន្ត្រី ជា សុផារ៉ា ទើបធ្វើឲ្យលោកទទួលបានសំណងពីការដោះដូរអគារប៊ូឌិញ ហើយមានថវិកាទៅទិញផ្ទះថ្មី។

លោក វុទ្ធី បានគូសបញ្ជាក់នៅលើទំព័រ Facebook របស់លោកថា «ជាថ្មីម្តងទៀតខ្ញុំសូមអរគុណដល់ឯកឧត្តម ជា សុផារ៉ា ដែលបានជួយដោះស្រាយយ៉ាងល្អ ទើបខ្ញុំទិញផ្ទះមួយនេះបាន។ ខ្ញុំចង់អញ្ជើញគាត់ចូលរួមពិធីឡើងផ្ទះថ្មីនេះណាស់ តែមិនដឹងអញ្ជើញគាត់តាមរបៀបណាទេ? បងប្អូនណាដឹងជួយប្រាប់ផង ពីពលរដ្ឋធ្លាប់រស់នៅអគារប៊ូឌិញ»។

សូមបញ្ជាក់ថា កាលឆ្នាំ២០១៧ ប្រជាពលរដ្ឋប្រមាណជា ៤៩៣គ្រួសារ បានសម្រេចចិត្តចាកចេញពីកន្លែងស្នាក់នៅពោរពេញដោយស្លាកស្នាមអនុស្សាវរីយ៍ជាច្រើនរបស់ពួកគេនៅក្នុងអគារប៊ូឌិញ (សាងសង់ឡើងក្នុងឆ្នាំ១៩៦៤) ជាមួយការព្រមព្រៀងកន្លែងស្នាក់នៅក្នុងមួយម៉ែត្រការ៉េប្រមាណ ១,៤០០ដុល្លារ ទៅឲ្យក្រុមហ៊ុនជប៉ុន Arakawa សិក្សាអភិឌ្ឍន៍ទៅជាអគារពាណិជ្ជកម្មបែបទំនើប។

លោកឧបនាយករដ្ឋមន្ត្រី ជា សុផារ៉ា គឺជាតួអង្គដ៏សំខាន់ជួយសម្របសម្រួលក្នុងការដោះស្រាយរវាងប្រជាពលរដ្ឋ និងក្រុមហ៊ុន រហូតប្រជាពលរដ្ឋព្រមចាកចេញពីកន្លែងស្នាក់នៅជាទីស្រឡាញ់របស់ពួកគេ ទៅរកកន្លែងស្នាក់នៅថ្មី។ មានការលើកឡើងថា ក្រៅពីលោកឧបនាយករដ្ឋមន្ត្រី ជា សុផារ៉ា ការដោះដូរអគារប៊ូឌិញ ប្រហែលជាមិនអាចទទួលបានជោគជ័យនោះឡើយ៕