(ភ្នំពេញ)៖ ​ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន នៅព្រឹកថ្ងៃទី១០ ខែវិច្ឆិកា ឆ្នាំ២០១៨នេះ បានអនុញ្ញាតឲ្យលោក SUENAGA Noriyoshi និងសហការរីចូលជួបសំដែងការគួរសម និងពិភាក្សាការងារ ក្នុងឱកាសដែលលោកទើបត្រូវបានតែងតាំងជាតំណាងអង្គការ JMAS ប្រចាំនៅកម្ពុជា។

ក្នុងជំនួបនេះដែរ ​ទេសរដ្ឋមន្ត្រី លី ធុជ បានស្នើសុំឲ្យអង្គការ JMAS បន្តកិច្ចសហប្រតិបត្តិជាមួយអាជ្ញា​ធរមីន ដើម្បីជួយដល់វិស័យសកម្មភាពមីននៅកម្ពុជា ឈានទៅសម្រេចបាននូវគោលដៅកម្ពុជាមួយ គ្មានមីននៅឆ្នាំ២០២៥ខាងមុខ។ ឆ្លើយតបនឹងសំណើនេះ អង្គការ JMAS បានសន្យាពង្រឹងកិច្ចសហប្រតិបត្តិការ កាន់តែជិតស្និទ្ធជាមួយអាជ្ញាធរមីន។

ទេសរដ្ឋមន្ត្រី លី ធុជ ក្នុងនាមសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាជ្ញាធរមីន បានថ្លែងអំណរគុណយ៉ាងជ្រាលជ្រៅ ដល់រាជរដ្ឋាភិបាលប្រទេសជប៉ុន ដែលបាននឹងកំពុងជួយដល់វិស័យបោសសម្អាតមីននៅកម្ពុជា និងសូមសំដែងនូវការកោតសរសើរចំពោះអង្គការ JMAS ដែលបាននឹងកំពុងបន្តជួយដល់ការងារបោសសម្អាតគ្រាប់មិនទាន់ផ្ទុះនៅកម្ពុជា៕