(ម៉ាឡេស៊ី)៖ ​ឆ្លៀតឱកាសដំណើរទស្សនកិច្ចការងារនៅប្រទេសម៉ាឡេស៊ី លោក អូស្មាន ហាស្សាន់ ទេសរដ្ឋមន្រ្តីទទួលបន្ទុកបេសកកម្មពិសេស បានចូលជួបសំណេះសំណាល និង​ពិភាក្សាការងារកិច្ចសហប្រតិបត្តិការការងារមនុស្សធម៍ ជាមួយលោក YB Datuk Seri Dr. Mujahid bin Yusof ​រដ្ឋមន្រ្តី​ទីស្តី​ការ​គណៈរដ្ឋមន្រ្តី ទទួលបន្ទុក​កិច្ច​ការសាសនាម៉ាឡេស៊ី។

ក្នុងជំនួបដែលធ្វើឡើងនៅការិយាល័យរដ្ឋបាលរាជរដ្ឋាភិបាលទីក្រុង Putrajaya នៅថ្ងៃទី០៩ ខែវិច្ឆិកា ឆ្នាំ២០១៨ លោកទេសរដ្ឋមន្ដ្រី អូស្មាន ហាស្សាន់ ក៏បានជួបជាមួយលោក Datuk Haji Mohd Nordin Ibrahim ប្រធានអគ្គនាយកដ្ឋានអភិវឌ្ឍន៍ឥស្លាម(JAKIM) រួមនឹងថ្នាក់ដឹកនាំឥស្លាមសំខាន់ៗម៉ាឡេស៊ីផងដែរ។

បើតាមលោកទេសរដ្ឋមន្ដ្រី អូស្មាន ហាស្សាន់ ថ្នាក់ដឹកនាំទាំងអស់នោះ ជាអ្នក​គ្រប់គ្រងកិច្ចការឥស្លាម និងការងារមនុស្សធម៌ទូទាំងប្រទេសម៉ាឡេស៊ី គន្លងមកបានឧបត្ថម្ភថវិកាជាច្រើនដល់កម្ពុជា ក្នុងការសាងសង់ វិហារ សូរ៉ាវ វិទ្យាស្ថាន សាលា អន្តេវាសិកដ្ឋានសិស្ស ទិញដីពង្រីកទីធ្លាសាលា សិក្ខាសាលា វគ្គបណ្តុះបណ្តាលបច្ចេកទេស កម្មពិធីស្រាយបួស កុមារកំព្រា ចាស់ជរា គូរបាន និងជំនួយគ្រោះធម្មជាតិ ជាដើម តាមរយៈគណៈដឹកនាំជាន់ខ្ពស់ នៃសាសនាឥស្លាមកម្ពុជា និង អង្គការមូលនិធិអភិវឌ្ឃន៍ឥស្លាមកម្ពុជា៕