(ភ្នំពេញ)៖ មានករណីគ្រោះថ្នាក់ចរាចរណ៍មួយបានកើតឡើង ដោយរថយន្តដឹកទំនិញធុនធំមួយគ្រឿង បានបើកបុករះរថយន្តចំនួន៥គ្រឿង ហើយបន្តទៅបុកម៉ូតូ២គ្រឿង រួចបន្តទៅបុកចូលផ្ទះប្រជាពលរដ្ឋចំនួន៣ល្វែង និងបណ្តាលឲ្យមនុស្សចំនួន៥នាក់រងរបួសធ្ងន់ស្រាល។
ហេតុការណ៍នេះបានកតើឡើងនៅព្រឹកថ្ងៃទី០៩ ខែវិចិ្ឆកា ឆ្នាំ២០១៨នេះ ស្ថិតនៅតាមផ្លូវវេងស្រេង ភូមិដំណាក់ធំ៥ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ។
ដំបូងឡើងគេឃើញរថយន្តទឹកទំនិញមួយគ្រឿង បានធ្វើដំណើរតាមបណ្តោយផ្លូវវែងស្រេង ដោយបើកបរក្នុងទិសដៅពីលិចទៅកើត ខណៈពេលដែលធ្វើដំណើរមកដល់ចំណុចស្តុបលូ៥ ស្រាប់តែរថយន្តខាងលើ បានជ្រុលចង្កូតបុករះជាបន្តបន្ទាប់ ហើយបានបន្ដបុកម៉ូតូកង់បីឥណ្ឌា និងជ្រុលចូលផ្ទះប្រជាពលរដ្ឋអស់៣ល្វែងថែមទៀត ទើបធ្វើឲ្យរថយន្តបង្កខាងលើបើកទៅមុខលែងរួច។
ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ និងបានទាក់ទងទៅសមត្ថកិច្ចជំនាញផ្នែកចរាចរណ៍ ដើម្បីធ្វើការវាស់វែង និងស្ទូចយករថយន្តបង្ក ព្រមទាំងរថយន្តរងគ្រោះ និងម៉ូតូទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយគ្នាតាមផ្លូវច្បាប់៕
