(ភ្នំពេញ)៖ ព្រះអង្គម្ចាស់ Ahmed Dalmook Al Maktoum សមាជិករាជវង្សអារ៉ាប់រួមអេមីរ៉េត និងសហការី ដឹកនាំដោយលោក អូស្មាន ហាស្សាន់ ទេសរដ្ឋមន្រ្តី ទទួលបន្ទុកបេសកកម្មពិសេស បានអញ្ជើញទស្សនាសមិទ្ធផលសាសនាសំខាន់ៗ នៅរាជធានីភ្នំពេញ ដែលជាអំណោយរបស់សប្បុរសជនប្រទេសអារ៉ាប់រួម ហើយត្រូវបានអញ្ជើញផ្តល់កិត្តិយស ក្នុងការសម្ពោធដាក់ឲ្យប្រើប្រាស់ដោយ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា។
គណៈប្រតិភូបានអញ្ជើញទស្សនា ព្រះវិហារឥស្លាម អាំម៉ើត ពិនយ៉ាសៀត នៅគីឡូម៉ែត្រលេខ៩ សង្កាត់ច្រាំងចំរេះ១ ខណ្ឌឬស្សីកែវ ជាបដិភាគថវិការបស់លោក ខាឡេត សារ៉ាហិល នៅក្រុងឌូបៃ ដែលសម្ពោធដាក់ឲ្យប្រើប្រាស់ជាផ្លូវការ នៅថ្ងៃទី២០ ខែតុលា ឆ្នាំ១៩៩៧ ដោយសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ហើយព្រះវិហារឥស្លាមដំបូងគេបង្អស់ ដែលសម្ដេចតេជោនាយករដ្ឋមន្រ្តី បានអញ្ជើញសម្ពោធ។
គួរបញ្ជាក់ថា នៅជាប់របងព្រះវិហារមួយនេះ គឺជាសាលារៀនឌូបៃឥស្លាមភ្នំពេញ ដែលជាការឧបត្ថម្ភរបស់សប្បុរសជនអារ៉ាប់រួមផងដែរ ដែលមានចំនួន១០បន្ទប់ ដោយឃើញថាសាលារៀនមួយនេះ មានសភាពចាស់ឌ្រុតឌ្រោម កាលពីថ្ងៃទី២៣ ខែមិថុនា ឆ្នាំ២០១៧ ក្នុងឱកាសអញ្ជើញទទួលទានអាហារស្រាយបួសរ៉ាម៉ាឌន របស់សាសនិកឥស្លាម សម្តេចតេជោ ហ៊ុន សែន បានប្រគល់អគារសិក្សាថ្មីជំនួសវិញ មានចំនួន២៤បន្ទប់ ដែលបានសាងសង់ ហើយពេលនេះជិតរួចរាល់ជាស្ថាពរ។
បន្ថែមពីនេះ គណៈប្រតិភូក៏បានទស្សនា ព្រះវិហារឥស្លាម ហាជះ ម៉ារ៉ីយ៉ុ នៅគីឡូម៉ែត្រលេខ៨ សង្កាត់ច្រាំងចំរេះ២ ខណ្ឌឬស្សីកែវ អំណោយរបស់លោក អាប់ឌុល ហ្គាហ្វា អាល់ឃូរី នៅទីក្រុង អាពូដាពី ដែលសម្ដេចតេជោ និងសម្ដេចកិត្តិព្រឹទ្ធបណ្ឌិត បានសម្ពោធនៅថ្ងៃទី១៥ ខែឧសភា ឆ្នាំ២០០៨។
ដោយឡែក ព្រះវិហារធំអាល់សារកាល់ នៅសង្កាត់បឹងកក់ ខណ្ឌដូនពេញ អំណោយរបស់លោក អ៊ីសា ពិនណាសៀត អាល់សារកាល់ នៅទីក្រុងឌូបៃ ដែលសម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត បានសម្ពោធដាក់ឲ្យប្រើប្រាស់ជាផ្លូវការ នៅថ្ងៃទី២៧ ខែមីនា ឆ្នាំ២០១៥៕
