(ភ្នំពេញ)៖ នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ នៅព្រឹកថ្ងៃទី០៦ ខែវិច្ឆិកា ឆ្នាំ២០១៨នេះ ដឹកនាំកិច្ចប្រជុំផែនការការពារសន្ដិសុខ សណ្ដាប់ធ្នាប់ ក្នុងឱកាសប្រារព្ធពិធីបុណ្យខួបឯករាជ្យជាតិ ០៩វិច្ឆិកា លើកទី៦៥។

កិច្ចប្រជុំដ៏មានសារសំខាន់នេះ ក៏មានការចូលរួមពី ថ្នាក់ដឹកនាំតំណាងក្រសួង ស្ថាប័ន និងអង្គភាពពាក់ព័ន្ធជាច្រើនរូបទៀតផងដែរ។

នាយឧត្តមសេនីយ៍ ទូច ណារ៉ុថ អគ្គស្នងការរងនគរបាលជាតិ និងជាប្រធាននាយកដ្ឋានអង្គរក្សបានថ្លែងថា ពិធីបុណ្យឯករាជ្យនៅឆ្នាំនេះ នឹងប្រារព្ធធ្វើឡើងធំជាងបណ្ដាឆ្នាំកន្លងទៅ ដូច្នេះកម្លាំងសមត្ថកិច្ចទាំងអស់ ត្រូវមានផែនការការពារសន្ដិសុខ និងសណ្ដាប់ធ្នាប់ឲ្យបានច្បាស់លាស់។

​បុណ្យខួប​អនុស្សាវរីយ៍​លើក​ទី​៦៥ នៃ​ទិវា​បុណ្យ​ឯករាជ្យ​ជាតិ គឺជា​ទិវា​ប្រវត្តិសាស្ត្រ ដែល​កម្លាំង​សាមគ្គី​ជាតិ​ទាំងមូល ដណ្ដើមបាន​ទាំងស្រុង​មកវិញ​ពី​អាណានិគមនិយម​បារាំង នៅ​ថ្ងៃទី០​៩ វិច្ឆិកា ឆ្នាំ​១៩៥៣ ក្រោម​ព្រះរាជ​បូជនីយកិច្ច ​ព្រះបាទ​នរោត្តម​សីហនុ ព្រះ​បរម​រតន​កោដ្ឋ​៕