(ក្រចេះ)៖ អង្គកឋិនទានដែលផ្តួចផ្តើមដោយ លោកឧត្ដមសេនីយ៍ឯក ឈួន ថាវរិន្ទ មេបញ្ជាការរងកងទ័ពជើងអាកាស និងជាសមាជិកគណកម្មាធិការកណ្ដាលគណបក្សប្រជាជនកម្ពុជា អនុប្រធានក្រុមការងារចុះជួយខេត្តក្រចេះ និងអនុប្រធានក្រុមការងារចុះជួយស្រុកព្រែកប្រសព្វ បានដង្ហែទៅកាន់វត្តពោធិ ហាន់ជ័យ និងវត្តសាលាវេទី នៅស្រុកឆ្លូង ខេត្តក្រចេះ នាថ្ងៃទី០៤ ខែវិច្ឆិកា ឆ្នាំ២០១៨នេះ ដោយប្រមូលបច្ច័យសម្រាប់កសាងសមទ្ធិផលនានាក្នុងវត្ត បានចំនួន៨០លានរៀល និងសម្ភារផ្សេងៗជាច្រើនទៀត។
លោក ឈួន ថាវរិន្ទ បានលើកឡើងពីអត្ថន័យបុណ្យកឋិនថា ហេតុដែលនាំឲ្យមានបុណ្យនេះ គឺមាន៣យ៉ាង ទី១៖ មានសេចក្ដីសធាជ្រះថ្លាជឿព្រះពុទ្ធព្រះធម៌ ព្រះសង, ទី២៖ធ្វើឲ្យមានសេចក្ដីសង្វេកតុកស្លុក និងទី៣៖ស្អាតស្អំដោយកាយវិការចិត្ត មិនធ្វើអំពើបាប មិនកាប់សម្លាប់មិនលួច មិនប្លន់ មិនចេះភរកុហក បោកប្រាស់គេ មិនចងគំនុំ។
ពិធីបុណ្យកឋិនជាពីបុណ្យមួយចាប់ផ្ដើម ធ្វើបន្ទាប់ពីបុណ្យចេញវស្សា បុណ្យកឋិនតែងតែដង្ហែចូលគ្រប់ទីអារាមទាំងអស់ ពុំមានទំនេរវត្ដណាមួយ ត្រូវបានខកខានឡើយ ដូច្នេះគេតែងតែឃើញ ក្បួនកឋិនទានតែងបានដង្ហែទៅកាន់ទីអារាមរៀងៗ ខ្លួនចាប់ពីថ្ងៃទី១រោច ខែអស្សុជ ដល់ថ្ងៃទី១៥កើត ខែកក្តិក ហើយបើទីអារាមណាមួយ មិនមានកឋិនណាមួយហែចូលទេ ទីអារាមនោះ ក៏ត្រូវតែរៀបចំជាកឋិនជើងវត្តដែរ។
ពិធីហែអង្គកឋិនទៅកាន់ទីអារាមនីមួយៗ គេរៀបចំធ្វើឡើងយ៉ាងអធិកអធម្ម សប្បាយរីករាយយ៉ាងក្រៃលែង អ្នកផ្ដើមបុណ្យបានរៀបចំបរិក្ខាកឋិនមានត្រៃចីវរ ចិវរ សង្ឃាដិ ស្បង់ ព្រមដោយទេយ្យទានផ្សេងៗទៀត ដូចជា បាត ចានស្រាក់ កាំបិតចេស ម្ជុល ថង់យាម ឆ័ត្រជាដើម សព្វគ្រប់អស់ហើយ គេនាំគ្នាហែទៅទីអារាម ដែលបានកំណត់ទុក។ បើកឋិននោះដង្ហែទៅវត្តឆ្ងាយ គេជួបជុំគ្នាពីព្រលឹមរួចនាំគ្នាឡើងរថយន្តសំដៅទៅវត្តនោះ បើវត្ត នៅតាមដងទន្លេ គេជិះទូករឺ កប៉ាល់៕
