(ឧត្តរមានជ័យ)៖ ទេសរដ្ឋមន្រ្តី គន់ គីម អគ្គលេខាធិការសមាគមអតីតយុទ្ធជនកម្ពុជា អមដំណើរដោយលោក ស ថាវី អភិបាលខេត្តឧត្តរមានជ័យ បានអញ្ជើញប្រគល់ផ្ទះចំនួន៦ខ្នង ធ្វើពីឈើ ប្រក់សង្ក័សី ទំហំ៥ម៉ែត្រ គុណ៥ម៉ែត្រ និងតសំយ៉ាបសង្ក័សី៣ម៉ែត្រ ជាអំណោយរបស់សម្តេចតេជោ ហ៊ុន សែន និងអណ្តូងទឹក១២ ជាអំណោយរបស់សម្តេចកតិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់អតីតយុទ្ធជនស្ថិតក្នុងភូមិបាត់កាវ ឃុំចុងកាល់ ស្រុកចុងកាល់ នៅថ្ងៃទី០២ ខែវិច្ឆិកា ឆ្នាំ២០១៨នេះ។
ថ្លែងក្នុងឱកាសនោះ ទេសរដ្ឋមន្ដ្រី គន់ គីម ក៏បាននាំនូវការផ្តាំផ្ញើសួរសុខទុក្ខពីសម្តេចតេជោ ហ៊ុន សែន ជូនដល់អតីតយុទ្ធជន បន្ទាប់មកទេសរដ្ឋមន្ដ្រី បានផ្តាំផ្ញើដល់សមាជិកដែលមករស់នៅទីនេះ ត្រូវរក្សាអនាម័យ ដើម្បីបង្ការជំងឺ និងត្រូវចេះថែរក្សាផ្ទះសម្បែងដែលបានទទួល។
ជាមួយគ្នានោះ ទេសរដ្ឋមន្រ្តីអគ្គលេខាធិការ បានណែនាំលោកអភិបាលខេត្ត ចាត់តាំងតាមមន្ទីរការិយាល័យជុំវិញខេត្ត ចែកគ្នាជួយឧបត្ថម្ភសមាជិកអតីតយុទ្ធជន ក្នុងដំណាក់កាលដែលពួកគាត់ទើបមកនៅថ្មី។
ដោយមានសំណូមពរពីសមាជិក ដែលមកនៅទីនេះគ្មានដីបង្កើនផល ក្នុងកាលនោះ លោកទេសរដ្ឋមន្រ្តី គន់ គីម បានស្នើសុំសម្តេចតេជោ ហ៊ុន សែន ហើយត្រូវបានសម្តេចអនុញ្ញាតដោះស្រាយដីដែលមានស្រាប់ជូនក្នុងមួយគ្រួសារ២ហិកតា។
សមាជិកអតីតយុទ្ធជនទាំង៦គ្រួសារ សូមសំដែងការដឹងគុណយ៉ាងជ្រាលជ្រៅចំពោះ សម្តេចតេជោ ហ៊ុន សែន នាយករដ្ឋមន្ត្រី និងជាប្រធានសមាគមអតីតយុទ្ធជនកម្ពុជា ដែលជានិច្ចកាលបានគិតគូរពីសុខទុក្ខរបស់ពួកគាត់ទាំងជីវភាពរស់នៅ ទាំងសុខភាព ផ្តល់ផ្ទះផ្តល់ដីដល់ពួកគាត់ដែលមានជីវភាពខ្វះខាត ផ្តល់ប័ណ្ណ ប.ស.ស សម្រាប់ព្យាបាលជំងឺនៅតាមមន្ទីរពេទ្យដោយមិនអស់ប្រាក់ និងសូមជូនពរឲ្យសម្តេចទាំងពីរ ព្រមទាំងក្រុមគ្រួសារបានសុខសប្បាយ សុខភាពរឹងមាំ បន្តដឹកនាំប្រទេសកម្ពុជា ជារៀងរហូត។
សូមបញ្ជក់ថា នៅទីនេះផ្ទះអំណោយរបស់សម្តេចតេជោ ហ៊ុន សែន មានចំនួន៥១ខ្នង កំពុងសាងសង់សម្រាប់ផ្តល់ជូនសមាជិកសមាគមអតីតយុទ្ធជនកម្ពុជា ដែលមានជីវភាពខ្សត់ខ្សោយ៕
