(ភ្នំពេញ)៖ ក្រុមហ៊ុន Royal Group និងក្រុមហ៊ុន HLH Development Pte Ltd បានចុះហត្ថលេខាលើកិច្ចព្រមព្រៀង វិនិយោគរួមគ្នាទ្វេភាគី សាងសង់អគារពាណិជ្ជកម្ម និងខុនដូ ដ៏ទំនើបខ្ពស់មួយ ក្នុងតំបន់ទួលគោក ដែលនឹងលេចរូបរាងដ៏ឆាប់ខាងមុខនេះ ។
ក្នុងឱកាសចុះហត្ថលេខាលើកិច្ចព្រមព្រៀងនេះ បានធ្វើឡើងនៅសណ្ឋាគារកាំបូឌីយ៉ាណា នៅថ្ងៃទី០១ ខែវិច្ឆិកា ឆ្នាំ២០១៨នេះ ដោយមានវត្ដមានលោកអ្នកឧកញ៉ា គិត ម៉េង ដែលប្រធានក្រុមប្រឹក្សាភិបាលនៃក្រុមហ៊ុន Royal Group រួមទាំងភ្ញៀវកិត្តិយសជាច្រើនរូបទៀត។
លោក Hanna Mark នាយកផ្នែកហិរញ្ញវត្ថុ (CFO) នៃក្រុមហ៊ុន Royal Group បានថ្លែងឲ្យដឹងថា «បន្ទាប់ពីរក្រុមហ៊ុនយើងទាំងពីរបានចុះកិច្ចព្រមព្រៀងហើយនោះ នៅ៣ខែខាងមុខទៀត យើងនឹងចាប់ផ្ដើមសាងសង់ អគារ-ខុនដូដ៏ទំនើប ដែលមានកម្ពស់រហូតដល់ទៅ១២ជាន់ ស្ថិតនៅចំកណ្ដាលទីក្រុងភ្នំពេញតែម្ដង នៅម្ដុំទួលគោក ដែលគ្របដណ្តប់លើផ្ទៃដីប្រហែលទំហំ ៨,២២១ម៉ែត្រក្រឡា និងទំហំផ្ទៃអគារប្រមាណ ៨០,០០០ម៉ែត្រក្រឡា»។
លោកបន្ដថា គម្រោងសាងសង់ដ៏ទំនើប ដែលរួមមានសំណង់ពាណិជ្ជកម្ម និងខុនដូនេះ នឹងបញ្ចប់ការសាងសង់ជាស្ថាពរក្នុងរយៈពេលពីរឆ្នាំទៀត សម្រាប់ទុនវិនិយោគកំពុងសិក្សានៅឡើយ។
ទន្ទឹមនឹងនោះ លោក Ryan Ong អគ្គនាយក Hong Lai Huat Group Limited បានថ្លែងថា «ខ្ញុំពិតជាមានកិត្តិយស និងសេចក្តីសោមនស្សរីករាយ ដែលបានអញ្ជើញមកចូលរួមក្នុងពិធីចុះកិច្ចព្រមព្រៀងអភិវឌ្ឍន៍រួម រវាងក្រុមហ៊ុន HLH Development Pte Ltd និងក្រុមហ៊ុន Royal Group»។
លោកបន្ដថា Hong Lai Huat Group Limited «ជាក្រុមហ៊ុនចុះបញ្ជីមកពីសិង្ហបុរី មានបទពិសោធន៍យូរឆ្នាំ ក្នុងវិស័យអភិវឌ្ឍន៍សំណង់ ក៏ដូចជាអចលនទ្រព្យនៅប្រទេសសិង្ហបុរី ចាប់តាំងពីឆ្នាំ១៩៨៨មក។ ក្រុមហ៊ុនយើងប្តេជ្ញានាំយកមកនូវឯកទេស និងជំនាញវិជ្ជាជីវៈដែលមានស្តង់ដាខ្ពស់ មកអភិវឌ្ឍនៅប្រទេសកម្ពុជា។ ដូច្នេះហើយ ពួកយើងអាចកំណត់ថា សំណង់នៃការអភិវឌ្ឍន៍ នឹងត្រូវសាងសង់ឡើងប្រកបដោយគុណភាព ដែលមានការធានា និងមានស្តង់ដាសាងសង់លក្ខណៈអន្តរជាតិ»។
លោកបន្ដថា ដោយបានឈានជើងចូលក្នុងប្រទេសកម្ពុជាកាលពី១១ឆ្នាំមុន បានមើលឃើញថា សំន្ទុះ គួរឲ្យកត់សម្គាល់នៃវិស័យឧស្សាហកម្មសំណង់អគារខ្ពស់នៅទីក្រុងភ្នំពេញ និងការទទួលយកជីវភាពរស់នៅ តាមបែបជាអគារខុនដូ បានកំពុងតែបន្តរីកសាយកាន់តែច្រើន ។ដូចនេះ ក្រុមហ៊ុន HLH ប្តេជ្ញាផ្តល់បរិស្ថានរស់នៅ ដែលមានសុវត្ថិភាព និងគុណភាពខ្ពស់ ដោយគួបផ្សំជាមួយកន្លែងស្នាក់នៅដ៏ទំនើបៗជូនដល់ប្រជាជនកម្ពុជា។
លោកជឿជាក់ថា ការអភិវឌ្ឍថ្មីនេះបូករួមជាមួយឯកទេសដ៏ទំលំទូលាយ រវាងក្រុមហ៊ុន HLH និង Royal Group ក្នុងវិស័យអភិវឌ្ឍន៍អចលនទ្រព្យនោះ នឹងផ្តល់អត្ថប្រយោជន៍យ៉ាងល្អប្រសើរ ដល់អតិថិជន ហើយនឹងបន្តលើកកម្ពស់ស្តង់ដារស់នៅសម្រាប់ប្រជាជនកម្ពុជា។ ពិសេស ការអភិវឌ្ឍនេះ នឹងឆ្លើយតបតាមតំរូវការរបស់អតិថិជន ដែលកំពុងបន្តស្វែងរកសំណង់អគារ ដែលមានការធានាគុណភាពលក្ខណៈអន្តរជាតិ និងតម្លៃសាកសមបំផុត នៅក្នុងខណ្ឌទួលគោក ៕
