(បន្ទាយមានជ័យ)៖ នៅលើស្ពានមិត្តភាព ច្រកទ្វារអន្តរជាតិប៉ោយប៉ែត នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍កម្ពុជា, ឧត្តមសេនីយ៍ត្រី សុរៈសេដ ផាតផាន អគ្គនាយកអន្តោប្រវេសន៍ថៃ, លោក សាន ស៊ានហូអភិបាលក្រុងប៉ោយប៉ែត និងលោកឧត្តមសេនីយ៍ត្រី ស៊ឹម សំអាត ប្រធានប៉ុស្តិ៍នគរបាលអន្តោប្រវេសន៍ ច្រកទ្វារប៉ោយប៉ែត បានជួបប្រជុំគ្នាស្តីពីបញ្ហាឆ្លងដែន។
ក្នុងកិច្ចសំណេះសំណាលគ្នា នាថ្ងៃទី៣០ ខែតុលា ឆ្នាំ២០១៨នោះ ភាគីទាំងពីរមានគោលបំណង ធ្វើកិច្ចសហប្រតិបត្តិការនៅតាមបន្ទាត់ព្រំដែន ដើម្បីទប់ស្កាត់បទល្មើសជួញដូរគ្រឿងញៀនឆ្លងដែន,ទំនិញគេចពន្ធ, ឃាតកម្ម និងភេរវកម្មឆ្លងដែន និងកិច្ចសហការរួមគ្នាផងដែរ។
នាយឧត្តមសេនីយ៍ គៀត ច័ន្ទថារិទ្ធ បានថ្លែងថា ការពង្រឹងសម្ព័ន្ធភាពរវាងមន្ត្រីនគរបាលអន្តោប្រវេសន៍ ក៏ដូចជាការផ្លាស់ប្តូរបទពិសោធន៍រវាងភាគីទាំងពីរ មានគោលបំណងរក្សាសន្តិសុខ សណ្តាប់ធ្នាប់ ធ្វើសហប្រតិបត្តិការទប់ស្កាត់បទល្មើសឆ្លងដែនដូចជា ភេរវកម្មឆ្លងដែន ឧក្រិដ្ឋកម្មឆ្លងដែន ការជួញដូរមនុស្សឆ្លងដែន ជួញដូរគ្រឿងញៀនឆ្លងដែន ទំនិញគេចពន្ធឆ្លងដែន និងទប់ស្កាត់ពលករចំណាកស្រុកខុសច្បាប់។
នាយឧត្តមសេនីយ៍បន្តថា ក្នុងកិច្ចជំនួបរវាងភាគីទាំងពីរ ធ្វើយ៉ាងណាដើម្បីការពារសុខសុវត្ថិភាព ជូនប្រជាជន រាល់ដំណើរឆ្លងកាត់ទៅមក ទាំងកិច្ចការងារធុរកិច្ចវិយោគ ទេសចរណ៍ និងដើម្បីជំរុញឲ្យនាយប៉ុស្តិ៍ទាំងពីរភាគី បង្កើតការជួបគ្នាដើម្បីផ្តល់ព័ត៌មាន ការគ្រប់គ្រងស្ថានភាពពង្រឹងការងារអន្តោប្រវេសន៍ នៅតាមច្រកនីមួយៗ ឲ្យបានកាន់តែប្រសើរឡើងទៅថ្ងៃអនាគត។
ដោយឡែក ចំពោះប្រជាពលរដ្ឋដែលលួចឆ្លងដែនមិនស្របច្បាប់ នាយឧត្តមសេនីយ៍បានបញ្ជាក់ថា ត្រូវតែលើកកម្ពស់ការយល់ដឹងរបស់ពួកគាត់ និងពន្យល់អប់រំណែនាំឲ្យដឹងច្បាស់ពីគុណវិបត្តិ នៃភាពមិនស្របច្បាប់ ហើយចំពោះកិច្ចការងារនេះ ក្រសួងស្ថាប័នពាក់ព័ន្ធ បានលើកទឹកចិត្តក្រុមហ៊ុន ដែលនាំពលករទៅក្រៅប្រទេស ដើម្បីឲ្យក្រុមហ៊ុនមានសន្ទុះបំផុសណែនាំពលករ ឲ្យឆ្លងដែនទៅរកការងារធ្វើនៅបរទេស ដោយស្របច្បាប់វិញ៕
