(កំពង់ធំ)៖ លោកឧត្តមសេនីយ៍ទោ សោម ស៊ុន មេបញ្ជាការរងយោធភូមិភាគទី៤ មេបញ្ជាការតំបន់ប្រតិបត្តិការសឹករងកំពង់ធំ បានដឹកនាំសហការី រួមជាមួយក្រុមយ៉េនឌ័រ ទៅសួរសុខទុក្ខយោធិន និងគ្រួសារយោធិន ដែលកំពុងសម្រាកព្យាបាលជំងឺ នៅក្នុងគិលានដ្ឋាន តំបន់ប្រតិបត្តិការសឹករងកំពង់ធំ។
លោក សោម ស៊ុន និងក្រុមយ៉េនឌ័រ នៅថ្ងៃទី៣១ ខែតុលា ឆ្នាំ២០១៨ បានឧបត្ថម្ភអ្នកជំងឺកំពុងសម្រាកព្យាបាល ដោយជំងឺផ្សេងៗគ្នាចំនួន០៥នាក់ រួមមាន៖ មីយើងចំនួន០៥កេស, ទឹកផ្លែឈើចំនួន០៥កេស, ទឹកដោះគោឆៅ០២យួរ និងថវិកា៥០០,០០០រៀលផងដែរ។
ល្ងាចថ្ងៃដដែល ឧត្តមសេនីយ៍ទោ សោម ស៊ុន បានបន្តដំណើរដឹកនាំក្រុមយ៉េនឌ័រ រួមជាមួយអាជ្ញាធរដែនដី ទៅសំណេះសំណាលសាកសួរសុខទុក្ខប្រជាពលរដ្ឋទីទ័លក្រ ចំនួន០២គ្រួសារទៀត ដែលរស់នៅភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ រួមមាន៖
១៖ លោកស្រី ញីវ អឹម អាយុ៥៣ឆ្នាំ ជាស្ត្រីមេម៉ាយ ប្តីទទួលមរណភាពចោល ដោយសារធ្លាក់ពីលើរថយន្ត ក្នុងពេលកំពុងធ្វើកម្មករលីស្រូវដាក់លើរថយន្ត ហើយធ្លាក់ពីលើរថយន្ត ត្រូវបាវស្រូវសង្កត់លើបណ្តាលឲ្យស្លាប់ នៅអំឡុងឆ្នាំ២០០៦។ គាត់មានកូន០២នាក់ នៅក្នុងបន្ទុកម្នាក់ និងម្នាក់ទៀតទៅរស់នៅទីឆ្ងាយបោះបង់គាត់ចោល។ សព្វថ្ងៃលោកស្រី មានជំងឺសរសៃប្រាសាទ រស់នៅដោយការជួយផ្តល់ម្ហូបអាហារពីអ្នកជិតខាង និងប្រធានភូមិ។
២៖ លោកស្រី ជឹម ភាព អាយុ៤៨ឆ្នាំ ត្រូវបានស្វាមីបោះបង់ចោលនៅឆ្នាំ ២០០៥កន្លងមក ហើយមានកូន២នាក់ បច្ចុប្បន្នមិនដឹងជាទៅរស់នៅទីណា។ ថ្វីត្បិតជាស្ត្រីមេម៉ាយ តែដើម្បីតស៊ូក្នុងជីវិត លោកស្រីប្រកបមុខរបរជាអ្នកនេសាទត្រី ដាក់មងចងសន្ទូច និងធ្វើជាកម្មករលីសែង បោកគក់សម្លៀកបំពាក់ឲ្យគេ និងជាអ្នកស៉ីឈ្នួលលាងចានឲ្យគេ តាមកម្មវិធីបុណ្យទាន រោងការ។
ឧត្តមសេនីយ៍ទោ សោម ស៊ុន បាននាំអំណោយរបស់សម្តេចតេជោ ហ៊ុន សែន តាមរយៈលោក ហ៊ុន ម៉ាណែត ជួយឧបត្ថម្ភជូនប្រជាពលរដ្ឋទីទ័លក្រ ក្នុងមួយគ្រួសារទទួលបាន៖ អង្ករ៥០គីឡូក្រាម, មីយើង០២កេស, ទឹកត្រីទឹកស៊ីអ៊ីវ០២យួរ និងថវិកា១០០,០០០រៀលផងដែរ៕
