(ភ្នំពេញ)៖ នាយឧត្ដមសេនីយ៍ ជួន សុវណ្ណ អនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានអំពាវនាវសិស្សានុសិស្សចូលរួម និងគាំទ្រទាំងអស់គ្នា ក្នុងការបង្ការ និងទប់ស្កាត់ បញ្ហាដែលមានការពាក់ព័ន្ធគ្រឿងញៀន ព្រោះការប្រើប្រាស់ ឬការពាក់ព័ន្ធនឹងគ្រឿងញៀន មិនត្រឹមតែប៉ះពាល់ធ្ងន់ធ្ងរដល់សុខភាព ជីវភាព និងសុវត្ថិភាពរបស់បុគ្គលប៉ុណ្ណោះទេ តែវានឹងប៉ះពាល់ដល់គ្រួសារ សហគមន៍ និងសង្គមជាតិទាំងមូលផងដែរ។
ការថ្លែងបែបនេះរបស់នាយឧត្តមសេនីយ៍ ជួន សុវណ្ណ ត្រូវបានធ្វើឡើងក្នុងឱកាសអញ្ជើញជាតំណាងឧបនាយករដ្ឋមន្ដ្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន នៅព្រឹកថ្ងៃទី០១ ខែវិច្ឆិកា ឆ្នាំ២០១៨នេះ អញ្ជើញជាអធិបតីបើកបវេសនកាលឆ្នាំសិក្សាថ្មី នៅវិទ្យាល័យឥន្រ្ទទេវី ដោយមានការអញ្ជើញចូលរួមពីលោក លោកស្រី មាតាបិតាសិស្ស លោកគ្រូ អ្នកគ្រូ គណគ្រប់គ្រងសាលា សិស្សនុសិស្ស សរុប៥០០នាក់។
ក្នុងឱកាសនោះ លោក នាក់ សុទ្ធា នាយកតំណាងគណគ្រប់គ្រងសាលា បានថ្លែងស្វាគមន៍ អរគុណដល់គណអធិបតី ភ្ញៀវកិត្តិយស និងរបាយការណ៍ពីវឌ្ឍនភាព ការរីកចម្រើន របស់សាលាទាំងផ្នែកហេដ្ឋារចនាសម្ព័ន្ធ កីឡា និងបរិស្ថានស្អាត សំដៅបម្រើដល់ការរីកចម្រើនផ្នែកបញ្ញា សុខភាព ដល់សិស្សានុសិស្ស។
លោក ប៉ាង លីដា តំណាងគណកម្មាធិការត្រួតពិនិត្យគ្រឿងញៀនខណ្ឌទួលគោក ក៏បានអាននូវសាររបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានថ្លែងអំណរគុណដល់ក្រសួង ស្ថាប័ន អង្គការជាតិ អន្តរជាតិ ដៃគូអភិវឌ្ឍ អាជ្ញាធរដែនដីគ្រប់លំដាប់ថ្នាក់សប្បុរសជននានា ព្រះសង្ឃ ចាស់ព្រឹទ្ធាចារ្យ បុព្វជិតសាសនា ដែលបាននឹងកំពុងជួយឧបត្ថម្ភគាំទ្រយ៉ាងសកម្មដល់ការងារអប់រំ និងបានផ្តាំផ្ញើដល់សិស្សានុសិស្ស យុវជន យុវនារីទាំងអស់ ត្រូវខិតខំរៀនសូត្រឲ្យបានខ្ជាប់ខ្ជួន ព្រមទាំងចូលរួមគ្រប់សកម្មភាពសង្គមនានា ដើម្បីគាំទ្រដំណើរការអភិវឌ្ឍសាលារៀន និងសង្គមជាតិ ហើយត្រូវចងចាំថា បើស្រឡាញ់ខ្លួនយើង ឪពុកម្តាយ ស្រឡាញ់អនាគតរុងរឿងក្មួយៗ ត្រូវនៅឲ្យឆ្ងាយពីគ្រឿងញៀន អំពើអបាយមុខផ្សេងៗនិងអំពើអសកម្មនានា។
ក្នុងនាមឧបនាយករដ្ឋមន្ដ្រី កែ គឹមយ៉ាន, នាយឧត្តមសេនីយ៍ ជួន សុវណ្ណ បានថ្លែងការកោតសសើរដល់ការរីកចម្រើនរបស់សាលា សំដៅប្រសិទ្ធភាពគុណភាព សិក្សារបស់សិស្ស និងបានសំដែងនូវមនោសញ្ចេតនាសប្បាយរីករាយក្រៃលែង ជាមួយលោក លោកស្រី លោកគ្រូអ្នកគ្រូ និងក្មួយៗជាសិស្សានុសិស្សទាំងអស់ ក្នុងពិធីបើកបវេសនកាលឆ្នាំសិក្សា២០១៨-២០១៩។
ក្រៅពីការអំពាវនាវ និងណែនាំអំពីបញ្ហាគ្រឿងញៀនហើយនោះ នាយឧត្តមសេនីយ៍ ជួន សុវណ្ណ ក៏បានគូសបញ្ជាក់ថា អំពីច្បាប់ស្តីពីការត្រួតពិនិត្យគ្រឿងញឿន ដែលមិនលើកលែងដល់ជនទាំងឡាយណា ដែលមានការពាក់ព័ន្ធគ្រឿងញៀន គឺត្រូវផ្តន្ទាទោសទាំងអស់ ហើយក្នុងករណីធ្ងន់ធ្ងរ គឺត្រូវផ្តន្ទាទោស ដាក់ពន្ធនាគារអស់មួយជីវិត និងអាចរឹបអូសរាល់ទ្រព្យសម្បត្តិ ដែលមានការពាក់ព័ន្ធបទល្មើសនេះផងដែរ។ ហេតុនេះ សូមក្មួយៗ ស្វែងយល់ឲ្យបានច្បាស់ និងសូមឲ្យមានការប្រុងប្រយ័ត្នខ្ពស់ កុំឲ្យវាចូលមកក្នុងជិវិត និងបំផ្លាញអនាគតដ៏ស្រស់ថ្លារបស់ក្មួយៗ។
ក្នុងឱកាសនោះ នាយឧត្តមសេនីយ៍ ជួន សុវណ្ណ បាននាំយកអំណោយរបស់ ឧបនាយករដ្ឋមន្រ្តី កែ គឹមយ៉ាន និងលោកស្រី ម៉ៅ ម៉ាល័យ ឧបត្ថម្ភជូនគ្រូចូលនិវត្តន៍ ៤៤នាក់ ក្នុងម្នាក់ទទួលបាន សារុង១ និងថវិកា៥ម៉ឺនរៀល, សិស្សនិទ្ទេស A ម្នាក់ទទួលបាន៥០ម៉ឺនរៀល, យុវជនកាយរិទ្ធ១លានរៀល, យុវជនកាកបាទក្រហម ថវិកា១លានរៀល, វិទ្យាល័យឥន្ទ្រទេវី ថវិកា២លានរៀល, សិស្សពូកែចំនួន១៨៦នាក់ ក្នុងម្នាក់ទទួលបានសៀវភៅសរសេរ៥ក្បាល និងប៊ិច២ដើម និងថវិកា២ម៉ឺនរៀល, សិស្សជួបការលំបាកផ្នែកជីវភាព ចំនួន២១នាក់ ក្នុងម្នាក់ទទួលបានកាបូប១ និងសម្ភារសិក្សា និងកសាងតារាងបាល់បោះ ថវិកា៨,០០០ដុល្លារ៕
