(កំពង់ធំ)៖ នៅល្ងាចថ្ងៃទី៣០ ខែតុលា ឆ្នាំ២០១៨ លោកឧត្តមសេនីយ៍ទោ សោម ស៊ុន មេបញ្ជាការរងយោធភូមិភាគទី៤ មេបញ្ជាការតំបន់ប្រតិបត្តិការសឹករងកំពង់ធំ និងជាប្រធានសមាគមអតីត យុទ្ធជនកម្ពុជា ខេត្តកំពង់ធំ បានដឹកនាំសហការី រួមជាមួយអាជ្ញាធរដែនដីភូមិ-ឃុំប្រជាពលរដ្ឋ និងព្រះសង្ឃ ព្រះគ្រូចៅអធិការវត្តត្នោតជុំ បានអញ្ជើញ និងនិមន្តទៅប្រគល់ផ្ទះខ្នង ទំហំ ៤មx៦ម សាងសង់អំពីឈើ ខ្ពស់ពីដី រនាប និងជញ្ជាំងក្តារ ប្រក់ស័ង្កសី ដែលត្រូវបានចំណាយថវិកាក្នុងការសាងសង់អស់ទឹកប្រាក់ចំនួន ៦,៨៩០,០០០ រៀល ដែលជាអំណោយរបស់សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា ប្រធានសមាគមអតីតយុទ្ធជនកម្ពុជា។
អំណោយនេះធ្វើឡើង តាមរយៈលោកទេសរដ្ឋមន្រ្តី គន់ គីម អគ្គលេខាធិការសមាគមអតីតយុទ្ធជនកម្ពុជា ជូនលោកនាយចំណង់ ប៊ុន សៅ អាយុ៥៦ឆ្នាំ ចូលបម្រើក្នុងជួរកងទ័ពនៅឆ្នាំ១៩៨១ នៅអង្គភាពយោធាស្រុកបារាយណ៍ ខេត្តកំពង់ធំ ហើយត្រូវរបួសពិការនៅឆ្នាំ១៩៨៦ នៅសមរភូមិអូរសាលា ច្រាំងក្រហម ក្នុងបេសកកម្ម នៅលើទឹកដីឃុំកំពង់ស្វាយ ស្រុកកំពង់ស្វាយ ខេត្តកំពង់ធំ។
នាយចំណង់ ប៊ុន សៅ មានកូននៅក្នុងចំនួន៤នាក់ បច្ចុប្បន្នរស់នៅភូមិត្នោតជុំ ឃុំត្នោតជុំ ស្រុកបារាយណ៍ ខេត្តកំពង់ធំ។
ក្នុងឱកាសសំណេះសំណាលជាមួយប្រជាពលរដ្ឋ និងប្រគល់ផ្ទះនៅពេលនេះ លោកឧត្តមសេនីយ៍ទោ សោម ស៊ុន មេបញ្ជាការរងយោធភូមិភាគទី៤ មេបញ្ជាការតំបន់ប្រតិបត្តិការសឹករងកំពង់ធំ ប្រធានសមាគមអតីតយុទ្ធជនកម្ពុជាខេត្ត និងក្រុមការងារ រួមគ្នាជាមួយព្រះសង្ឃ និងសប្បុរសជនបានឧបត្ថម្ភជូនគាត់បន្ថែមទៀតរួមមាន៖ អង្ករចំនួន៥០គីឡូក្រាម, មីយើងចំនួន៣កេស, ទឹកត្រីទឹកស៊ីអ៊ីវចំនួន២យួរ, ទឹកបរិសុទ្ធចំនួន១កេស, ថវិកាចំនួន៦០០,០០០រៀល និងសម្ភារសម្រាប់ប្រើប្រាស់មួយចំនួនទៀត៕
