(ពោធិ៍សាត់)៖ កម្លាំងនគរបាលស្រុកបាកាន ខេត្តពោធិ៍សាត់ សហការជាមួយកម្លាំងប៉ុស្តិ៍ខ្នារទទឹង បានបន្តសកម្មភាពក្នុងការស្រាវជ្រាវ រហូតឈានដល់ការបង្ក្រាបឃាត់ខ្លួន ជាក់ស្ដែងជនសង្ស័យប្រើប្រាស់ រក្សាទុក និងជួញដូរថ្នាំញៀនម្នាក់ ដកហូតបានថ្នាំញៀនចំនួន៦កញ្ចប់តូច រួមនឹងវត្ថុតាង។

លោកវរសេនីយ៍ត្រី យ៉ែម យឿន អធិការរងនគរបាលស្រុកបាកាន បានឲ្យដឹងថា ប្រតិបត្តិការខាងលើធ្វើឡើងកាលពីវេលាម៉ោង១២៖១៥នាទី ត្រង់ចំណុចផ្ទះរបស់ឈ្មោះ ហ៊ុ ហំ អាយុ៣៦ឆ្នាំ ដែលជាជនសង្ស័យ រស់នៅភូមិផ្ទះស្លា ឃុំខ្នារទទឹង ស្រុកបាកាន ខេត្តពោធិ៍សាត់។

លោកអធិការរងបន្តថា នៅក្នុងកិច្ចប្រតិបត្តិការបង្ក្រាបជនសង្ស័យប្រើប្រាស់ រក្សាទុក និងជួញដូរថ្នាំញៀនខាងលើនេះ កម្លាំងនគរបាល បានដកហូតបាន ម្សៅក្រាមព័ណ៌សថ្លាចំនួន០៦កញ្ចប់តូច ប្រដាប់ជក់១កំប្លេរ ទូរស័ព្ទNokia ១គ្រឿង ប៉ារី១កញ្ចប់ ដែលកេះ១ និងលុយខ្មែរ៥ម៉ឺន២ពាន់រៀល។

បច្ចុប្បន្ន ជនសង្ស័យដែលបង្ក្រាបឃាត់ខ្លួនបានជាក់ស្ដែងខាងលើ រួមជាមួយវត្ថុតាងពាក់ព័ន្ធ ត្រូវនាំមកឃុំខ្លួនបណ្ដោះអាសន្ន នៅអធិការដ្ឋាននគរបាលស្រុកក្រគរ ដើម្បីកសាងសំណុំរឿង បញ្ជូនបន្តចាត់ការតាមនិតិវិធី៕