(ព្រះវិហារ)៖ កម្លាំងនគរបាលប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តព្រះវិហារ នៅថ្ងៃទី៣០ ខែតុលា ឆ្នាំ២០១៨នេះ បានសម្រេចបញ្ជូនខ្លួនជនសង្ស័យម្នាក់ ទៅកាន់សាលាដំបូងខេត្ត ដើម្បីចាត់ការទៅតាមនីតិវិធីច្បាប់ បន្ទាប់ពីធ្វើសកម្មភាពចាប់រំលោភក្មេងស្រីម្នាក់ បានសម្រេចរហូតដល់៣ដង។
លោកវរសេនីយ៍ទោ គង់ គា ប្រធានការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តព្រះវិហារ បានឲ្យដឹងថា លោក សឿ សារ៉ាន់ អាយុ៤៩ឆ្នាំ មុខរបរកសិករ រស់នៅភូមិត្រពាំងទន្ទឹម ឃុំរមទម ស្រុករវៀង ខេត្តព្រះវិហារ ត្រូវជាឪពុកក្មេងស្រីរងគ្រោះ បានដាក់ពាក្យប្តឹងឈ្មោះ អឿ អាត អាយុ៤៧ឆ្នាំ មុខរបរកសិករ ដោយបានរំលោភកូនស្រីរបស់គាត់ឈ្មោះ ស.ស.ន អាយុ១៤ឆ្នាំ រហូតបានសម្រេចជាច្រើនដង។
តាមចម្លើយក្មេងស្រីរងគ្រោះ បានរៀបរាប់់ប្រាប់សមត្ថកិច្ចថា ជនសង្ស័យបានចាប់រំលោភនាង៣ដងមកហើយតែនាងមិនចាំថ្ងៃខែទេ។
នាងបានរៀបរាប់ថា នៅខែតុលា ឆ្នាំ២០១៨ ពេលដែលនាងទៅរកអុស ស្រាប់តែជនសង្ស័យបានចាប់រំលោភនាងបានម្តង ដោយចាប់ផ្តួលទៅលើដី រួចយកកៅអៀកបិទមាត់ និងចាប់ចងជើង។ លើកទី២ រំលោភក្រោយផ្ទះក្រោមដើមអំពិល និងលើកទី៣ ពេលនាងកំពុងតែដាំបាយក្នុងផ្ទះម្នាក់ឯង។ ក្មេងស្រីរងគ្រោះបានបន្តថា ពេលធ្វើសកម្មភាពរំលោភរួចម្តងៗ ជនសង្ស័យតែងគំរាមនាងមិនឲ្យនិយាយ ប្រាប់អ្នកណា បើហ៊ាននិយាយប្រាប់ គេនឹងសម្លាប់ចោល។
ចំណែកជនសង្ស័យបានសារភាពនៅចំពោះមុខសមត្ថកិច្ចថា ខ្លួនពិតជាបានរំលោភសេពសន្ថវៈលើក្មេងស្រីរងគ្រោះពិតប្រាកដមែន។ ផ្អែកតាមចម្លើយរបស់ក្មេងស្រីរងគ្រោះ និងចម្លើយសារភាពរបស់ជនសង្ស័យ សមត្ថកិច្ចបានបញ្ជាក់ថា សកម្មភាព និងទង្វើដែលជនសង្ស័យ បានប្រព្រឹត្តទៅលើជនរងគ្រោះ បទល្មើសនេះមានចែង និងផ្តន្ទាទោសដោយមាត្រា២៣៩ និងមាត្រា២៤១ ក្នុងក្រមព្រហ្មទណ្ឌ នៃព្រះរាជាណាចក្រកម្ពុជា៕
