(ពោធិ៍សាត់)៖ រថយន្តទេសចរណ៍ដឹកអ្នកដំណើរ របស់ក្រុមហ៊ុនកាពីតូល បានបើកបុកម៉ូតូបណ្តាលឲ្យរងរបួសធ្ងន់ក្មេងស្រីម្នាក់ អ្នកបើកបររត់គេចខ្លួនបាត់ មិនទទួលខុសត្រូវ។
ហេតុការណ៍នេះ បានកើតឡើងនៅវេលាម៉ោង១០៖៥០នាទីព្រឹក ថ្ងៃទី៣០ ខែតុលា ឆ្នាំ២០១៨ នៅលើផ្លូវជាតិលេខ៥ ចន្លោះគីឡូម៉ែត្រលេខ ១៧១,១៧២ ស្ថិតនៅភូមិត្រាំ ឃុំត្នោតជុំ ស្រុកក្រគរ ខេត្តពោធិ៍សាត់។
លោក ឯម រុន អធិការនគរបាលស្រុកក្រគរ បានឲ្យដឹងភ្លាមៗនេះថា គ្រោះថ្នាក់ចរាចរណ៍ខាងលើ បង្ករដោយរថយន្តម៉ាក HYUNDAI ពាក់ផ្លាកលេខ ភ្នំពេញ 3B-6062 ពណ៌ក្រហមលាយស ធ្វើចរាចរណ៍ពីកើតពីលិច។ លុះមកដល់ចំណុចកើតហេតុ បានបុកម៉ូតូម៉ាកគុប ៩០ ផ្លាកលេខ ត5057ភ.ព1 ពណ៌ខៀវលាយស ធ្វើចរាចរណ៍ពីកើតទៅលិច ស្របទិសគ្នា បើកបរដោយឈ្មោះ អូន អូម៉ា អាយុ១៦ឆ្នាំ ភេទស្រី រស់នៅភូមិថ្មី ឃុំត្នោតជុំ ស្រុកក្រគរ ខេត្តពោធិ៍សាត់ បណ្តាលឲ្យរងរបួសធ្ងន់ បញ្ជូនទៅសង្គ្រោះព្យាបាលនៅមន្ទីរពេទ្យបង្អែកស្រុកក្រគរ។
បន្ទាប់ពីបង្កគ្រោះថ្នាក់ចរាចរណ៍ហើយនោះ អ្នកបើកបររថយន្តរបស់ក្រុមហ៊ុនកាពីតូល បានរត់គេចខ្លួនបាត់ មិនទទួលខុសត្រូវឡើយ។ បច្ចុប្បន្នវត្ថុតាងរថយន្ត និងម៉ូតូ បានយកមករក្សាទុកនៅអធិការដ្ឋាននគរបាលស្រុកក្រគរ ជាបណ្តោះអាសន្ន រង់ចាំដោះស្រាយតាមនីតិវិធី៕
http://www.freshnewsasia.com/index.php/en/localnews/103344-2018-10-30-08-30-52.html
