(ភ្នំពេញ)៖ ក្រុមហ៊ុន SoundsKool (សោនស្គូល) បានបើកសម្ពោធសាលារៀនតូរ្យតន្ដ្រី និងហាងលក់ឧបករណ៍តន្ដ្រីសាខាថ្មីក្នុងរាជធានីភ្នំពេញ មួយកន្លែងទៀតហើយ នៅសង្កាត់ទូលទំពូង ខណ្ឌចំការមន ស្ថិតនៅផ្លូវ១៣៥ កែវផ្លូវ៤៥៦ បន្ទាប់ពីទទូលបានការគាំទ្រច្រើនពីយុវវ័យ ដែលនិយមចង់រៀនតូរ្យតន្ដ្រី ពិសេសគឺកូនខ្មែរតែម្ដង។
កញ្ញា សុខា លីកា តំណាងចែកចាយក្រុមហ៊ុន SoundsKool បានបញ្ជាក់ថា សាលាតូរ្យតន្ដ្រី និងហាងលក់ឧបករណ៍តន្ដ្រីរបស់ខ្លួន បានបើកសាខាទី១ តាំងពីឆ្នាំ២០១៤ នៅជិតសាលាស៊ីសុវត្ថិ តែការចាប់អារម្មណ៍រៀន និងប្រើប្រាស់ឧបករណ៍ភាគច្រើន គឺបរទេសមិនសូវមានកូនខ្មែរទេ ទើបតែមួយរយៈពេលចុងក្រោយ មានបងប្អូន ពិសេសមិត្តៗយុវវ័យខ្មែរជាច្រើន បានចាប់អារម្មណ៍រៀន និងទិញឧបករណ៍តន្ដ្រីទៅប្រើប្រាស់ ដែលជាហេតុនាំឱ្យ SoundsKool ពង្រីកសាខាថ្មីតែម្ដង។
ដោយឡែកលោក ហ្កាប៊ី ហ្វាចា នាយកគ្រប់គ្រងក្រុមហ៊ុន SoundsKool បានសម្ដែងការសប្បាយចិត្តជាខ្លាំង ក្រោយបានពង្រីកសាខាថ្មី មកទួលទំពូង ដើម្បីបម្រើអារម្មណ៍ និងធ្វើឱ្យមានការរួបរួមតាមរយៈតន្ត្រី ស្របពេលទីតាំងថ្មីនេះ មានសក្ដានុពលសម្រាប់ក្រុមហ៊ុនខ្លួន ដោយសារទីនេះ មានសាលារៀន និងគ្រួសារវ័យក្មេងជាច្រើន។ ដូច្នេះពួកគេអាចសិក្សាបន្ថែម ជាមួយនឹងការរៀនតូរ្យតន្ដ្រី ជាមួយអ្នកជំនាញតូរ្យតន្ដ្រី និងឧបករណ៍តន្ដ្រីទំនើប ពិសេសក៏មានការផលិតនូវបទចម្រៀង Original Song ជាច្រើនផងដែរ។
ជាមួយគ្នានេះផងដែរ កញ្ញា អេវី អេវែនស៍ អ្នកសម្របសម្រួលកម្មវិធី SoundsKool ក៏បានសម្ដែងនូវការសប្បាយរីករាយ ក្រោយពេលឃើញការអប់រំមុខវិជ្ជាតូរ្យតន្ដ្រី កំពុងមានការកើនឡើង និងមានការចាប់អារម្មណ៍ខ្លាំងក្នុងប្រទេសកម្ពុជា។ ហេតុនេះកញ្ញា រំពឹងថា ការពង្រីកសាខាថ្មី នឹងរួមចំណែកជួយដល់សិល្បករជំនាន់ក្រោយ ក្នុងការបង្កើនសមត្ថភាព ក៏ដូចជាផ្ដល់ឱកាសដល់យុវវ័យ ក្រោយទំនេរពីការសិក្សាចំណេះដឹងទូទៅ មករៀនតូរ្យតន្ដ្រី ដើម្បីចៀសឆ្ងាយពីការយកពេលវេលាប្រព្រឹត្តអំពើសង្គមមិនទទួលស្គាល់ផ្សេងៗជាដើម។
កញ្ញា អេវី អេវែនស៍ បានថ្លែងយ៉ាងដូច្នេះ៖ «ខ្ញុំស្រឡាញ់ការពិតដែលថា ការអប់រំមុខវិជ្ជាតូរ្យតន្ត្រីកំពុងតែកើនឡើង និងចាប់អារម្មណ៍ខ្លាំងនៅក្នុងប្រទេសកម្ពុជា ហើយតាមរយៈ SoundsKool ខ្ញុំនឹងអាចរួមចំណែកជួយដល់សិល្បករជំនាន់ក្រោយ»។
សាលាតូរ្យតន្ត្រី ទន្ទឹងរង់ចាំដើម្បីណែនាំកម្មវិធីថ្មីរបស់យើងទៅឱ្យអាណាព្យាបាល និងកូនៗរបស់ពួកគាត់នៅថ្ងៃខាងមុខ។ ក្រុមហ៊ុន SoundsKool ត្រូវបានបើកដំណើរការតាំងពីឆ្នាំ២០១៤ នៅភ្នំពេញ (ផ្លូវលេខ178 សាលាស៊ីសុវត្ថិ) និងជាក្រុមហ៊ុនតូរ្យតន្ត្រី មួយឈានមុខគេនៅកម្ពុជា។ ក្រុមហ៊ុនបាននាំមុខគេក្នុងការលក់រាយឧបករណ៍តន្ត្រីម៉ាកល្បីៗដូចជា៖ ហ្វេនឌ័រ (Fender) រ៉ូលេនដ៍ (Roland) អេរៀ (Aria) ខនន៍-សេលម័រ (Conn-Selmer)ជាដើម ហើយ SoundsKool ក៏ជាសាលាអប់រំផ្នែកតន្ត្រី ដែលឈានមុខគេនៅកម្ពុជា ដែលទទួលបានវិញ្ញាបនបត្រថ្នាក់អន្តរជាតិផងដែរ។
គួរបញ្ជាក់ថា SoundsKool គឺជាក្រុមប៊ុនបុត្រសម្ព័ន្ធមួយរបស់ក្រុមហ៊ុន អាយ អេស អាយ គ្រុប ហើយតាមគម្រោងក្នុងឆ្នាំ២០១៨ នេះ ក្រុមហ៊ុននឹងកំពុងសិក្សាពីគម្រោងពង្រីកសាខាជាច្រើនទៀត នៅរាជធានីភ្នំពេញ និងខេត្តសៀមរាប៕
