(កំពង់ស្ពឺ)៖ មានករណីភ្លើងឆក់កម្មករការិនីម្នាក់ ឈ្មោះ រឿន ស្រីលីន អាយុ១៩ឆ្នាំ មានទីលំនៅភូមិទី៤ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ បណ្ដាលឲ្យសន្លប់ ប៉ុន្ដែភ្លាមៗខាងថៅកែរោងចក្រ មិនបានខ្នះខ្នែង បញ្ជូនជនរងគ្រោះទៅព្យាបាលទេ តែត្រូវបានកម្មករដូចគ្នា ជួយបញ្ជូនជនរងគ្រោះ ទៅមន្ទីរពេទ្យបង្អែកខេត្ត។
បើយោងតាមរបាយការណ៍របស់សមត្ថកិច្ច ដែលបណ្ដាញព័ត៌មាន Fresh News ទទួលបាននៅថ្ងៃនេះ បានបញ្ជាក់ថា ហេតុការណ៍នេះ បានកើតឡើងនៅវេលាម៉ោង០៦៖៤០នាទីព្រឹក ថ្ងៃទី២៧ ខែតុលា ឆ្នាំ២០១៨នេះ នៅចំណុចរោងចក្រកាត់ដេរសំលៀកបំពាក់ អេស យ័ន ខេមបូឌា ខូអិលធីឌី ស្ថិតនៅភូមិក្រាំងពលទេព សង្កាត់រកាធំ ក្រុងច្បារមន ខេត្តកំពង់ស្ពឺ។
ប្រភពពីសមត្ថកិច្ចបានឲ្យដឹងថា ម្ចាស់រោងចក្រហាក់មិនយកចិត្តទុកដាក់ លើកម្មករ-កម្មាការិនីរបស់ខ្លួន ដែលរងគ្រោះការងារទេ មិនតែប៉ុណ្ណោះព្យាយាម មិនឲ្យសមត្ថកិច្ចចូលពិនិត្យថែមទៀត។
សមត្ថកិច្ចដដែលបានបញ្ជាក់ថា មូលហេតុដែលថៅកែរោងចក្រចងបំបិទភស្តុតាង មិនចង់ឲ្យសមត្ថកិច្ចដឹង ព្រោះថាការឆក់នោះ គឺឆក់ជាមួយ និងម៉ាស៊ីនដេរ មិនមែនឆក់កន្លែងផ្សេង ដូច្នេះហើយបើឆក់ ជាមួយម៉ាស៊ីនដេរ គឺត្រូវមានការទទួលខុសទាំងបច្ចេកទេស និងអាយុជីវិតកម្មករ។ មិនតែប៉ុណ្ណោះហ៊ានទុកអ្នករងគ្រោះចោល តែបានកម្មករដូចគ្នាបញ្ជូនជនរងគ្រោះទៅមន្ទីរពេទ្យ ដោយមិនមានថៅកែណាអើពើជួយឡើយ៕
