(ភ្នំពេញ)៖ ក្រុមអតីតសិស្សានុសិស្សសាលាមធ្យមសិក្សាកម្រិត២បឹងត្របែកជាច្រើននាក់ ជំនាន់ឆ្នាំ១៩៨៦ និងឆ្នាំ១៩៨៧ បានបង្ហាញពីការរឹតចំណងមិត្តភាពជាមួយគ្នាឲ្យកាន់តែរឹងមាំ ហើយរួមគ្នារំលឹកគុណគ្រូជារៀងរាល់ឆ្នាំ ដើម្បីសម្តែងការដឹងគុណចំពោះលោកគ្រូអ្នកគ្រូ ដែលបានបង្ហាត់បង្រៀនកន្លងមក។
ក្រុមអតីតសិស្សានុសិស្សសាលាមធ្យមសិក្សាកម្រិត២បឹងត្របែកជំនាន់ឆ្នាំ១៩៨៦ និងឆ្នាំ១៩៨៧ ជិត១០០នាក់ បានជួបជុំគ្នាសម្តែងការដឹកគុណចំពោះលោកគ្រូអ្នក គ្រូផង និងបង្ហាញពីការនឹករលឹកគ្នាទៅវិញទៅមកបន្ទាប់ពីបានបែកគ្នាជាច្រើនឆ្នាំកន្លងទៅ។
ក្នុងឱកាសជួបជុំគ្នាដ៏សប្បាយរីករាយ កាលពីរាត្រីថ្ងៃទី២៦ ខែតុលា លោក វង្ស ប៊ុនន្ទា្រវុធ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានរតនាគារជាតិ និងជាអតីតសិស្សានុសិស្ស សាលាមធ្យមសិក្សាកម្រិត២បឹងត្របែក ជំនាន់ឆ្នាំ១៩៨៦ បានឲ្យដឹងថា ការជួបជុំគ្នានាពេលនេះបានផ្តល់ឱកាសដល់ក្រុមអតីតសិស្សទាំងអស់នេះ បានជួបជុំគ្នាសម្ដែងនូវការតបស្នងចំពោះគុណូបការៈ លោកគ្រូអ្នកគ្រូដែលបានបង្ហាត់បង្រៀនមិត្តគ្រប់ជំនាន់ ឲ្យក្លាយជាពលរដ្ឋ ជាឪពុកម្តាយល្អ ពិសេសមានចំណេះដឹងជាមូលដ្ឋានគ្រឹះឈោងទៅចាប់យកជំនាញវិជ្ជាជីវៈដើម្បីមានចំណេះដឹងគ្រប់គ្រាន់ ធ្វើការងារបំរើជាតិមាតុភូមិ។
លោកបានបញ្ជាក់ថា រយៈពេលជាង៣០ឆ្នាំហើយ ដែលលោកគ្រូអ្នកគ្រូធ្លាប់បានបង្រៀន ហើយក៏បានបែកពីលោកគ្រូអ្នកគ្រូ និងមិត្តភត្តិរួមជំនាញផងដែរ ដើម្បីទៅបំពេញការងាររៀងៗខ្លួន ដូច្នេះក្រុមអតីតសិស្សានុសិស្សទំាងអស់នេះ មិនអាចបំភ្លេចការនឹករលឹកគ្នា និងគុណបំណាច់របស់លោកគ្រូអ្នកគ្រូបានឡើយ។
លោក លុន ឆេងកៃ ប្រធានគណៈកម្មការជាតិរៀបចំការបោះឆ្នោត រាជធានីភ្នំពេញ ដែលជា អតីតនាយកសាលាមធ្យមសិក្សាកម្រិត២បឹងត្របែក បានសម្តែងការកោតសរសើរចំពោះសកម្មភាព របស់ក្រុមអតីតសិស្សទំាងនេះ គឺជាសកម្មភាពដ៏គំរូសម្រាប់សិស្សានុសិស្ស ជំនាញក្រោយទៀតឲ្យចេះស្រលាញ់គ្នារាប់អានគ្នា និងការដឹងគុណចំពោះលោក គ្រូអ្នកគ្រូដែលខិតខំបណ្តុះបណ្តាលនាពេលកន្លងមក។
សូមបញ្ជាក់ថា នេះគឺលើកទី២ ដែលក្រុមអតីតសិស្សសាលាមធ្យមសិក្សាកម្រិត២បឹងត្របែកជំនាន់ឆ្នាំ១៩៨៦ និងឆ្នាំ១៩៨៧ បានរៀបចំកម្មវិធីជួបជុំគ្នាបង្ហាញពីការនឹករលឹកគ្នាទៅវិញទៅមក រួមទំាងរំលឹកគុណគ្រូផ្តល់ប្រាក់ឧបត្ថម្ភមួយចំនួនជូនដល់លោកគ្រូ អ្នកគ្រូដែលបានចូលនិវត្តន៍ដើម្បីជួយសម្រាលការលំបាកក្នុងជីវភាពបានមួយកម្រិតផងដែរ៕
