(ភ្នំពេញ)៖ កម្លាំងនគរបាលប៉ុស្ដិ៍រដ្ឋបាលទឹកល្អក់ទី១ នៃអធិការដ្ឋាននគរបាលខណ្ឌទួលគោក សហការជាមួយកម្លាំងនគរបាលប៉ុស្តិ៍រដ្ឋបាលស្ទឹងមានជ័យទី១ បានឃាត់ខ្លូនជនសង្ស័យ២នាក់ ជាបន្ដបន្ទាប់ ក្រោយធ្វើសកម្មភាពឆក់ទូរស័ព្ទដៃពីជនរងគ្រោះ នៅមុខហាង PARK CAFE ទីតាំងផ្ទះលេខ៧០១ ផ្លូវលេខ១២៨ កែងផ្លូវលេខ២៥៧ ក្រុមទី៣៧ ភូមិ១០ សង្កាត់ទឹកល្អក់ទី១។
អធិការរងនគរបាលខណ្ឌទួលគោក លោក ស៊ឹម ពិសិដ្ឋ បានឲ្យដឹងថា ហេតុការណ៍ឆក់នេះកើតឡើងនៅយប់ថ្ងៃទី២៥ ខែតុលា ឆ្នាំ២០១៨ ដោយភ្លាមនោះ កម្លាំងនគរបាល ក្រោមការបញ្ជាផ្ទាល់ពីលោក សុខ ហេង បានឃាត់ខ្លួនជនសង្ស័យម្នាក់ឈ្មោះ កែវ ភារាជ្យ ហៅរាជ្យ អាយុ១៧ឆ្នាំ ជាអ្នកបើកម៉ូតូ និងចាប់យកវត្ថុតាងម៉ូតូម៉ាក Honda C125 ស៊េរី2013 ពណ៌ខ្មៅពាក់ស្លាកលេខ ភ្នំពេញ1BT-9725 ចំណែកបក្សពួកឈ្មោះ សុខ រ៉ាម៉ន ហៅម៉ន អាយុប្រហែល១៩ឆ្នាំ ជាអ្នកអង្គុយក្រោយ ធ្វើសកម្មភាពឆក់បាន យកទូរស័ព្ទដៃរបស់ជនរងគ្រោះគេចខ្លួនបាត់។
រហូតមកដល់វេលម៉ោង១១ព្រឹក ថ្ងៃទី២៦ ខែតុលា ឆ្នាំ២០១៨នេះ កម្លាំងផ្នែកព្រហ្មទណ្ឌ នៃអធិការដ្ឋា នគរបាលខណ្ឌទួលគោក បានធ្វើការស្រាវជ្រាវ ឈានទៅដល់ការឃាត់ខ្លួនជនសង្ស័យម្នាក់ទៀត ឈ្មោះ សុខ រ៉ាម៉ន ជាអ្នកអង្គុយក្រោយធ្វើសកម្មភាពឆក់ ឃាត់ខ្លួននៅចំណុចផ្ទះជួល ផ្លូវបេតុង ក្រុមទី៣ ភូមិអ័រគីដេ សង្កាត់អូបែកក្អម ខណ្ឌសែនសុខ និងចាប់យកវត្ថុតាងទូរស័ព្ទដៃជនរងគ្រោះមកវិញ រួចបញ្ជូនយកមកកាន់អធិការដ្ឋាននគរបាលខណ្ឌទួលគោក ចាត់ការតាមនីវិធីច្បាប់។ ក្នុងនោះ ទូរស័ព្ទដៃមួយគ្រឿងម៉ាក VIVO V11 ពណ៌ខ្មៅ (ជារបស់ជនរងគ្រោះដែលជនសង្ស័យឆក់យកទៅ) បានធ្វើការប្រគល់ជូនជនរងគ្រោះវិញ តាមការស្នើសុំដោយមានការឯកភាពពីលោក ចែ សុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ។
បច្ចុប្បន្នជនសង្ស័យខាងលើកំពុងឃាត់ខ្លួនជាបណ្តោះអាសន្ន នៅអធិការដ្ឋាននគរបាលខណ្ឌទួលគោក ដើម្បីសាកសួរ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមផ្លូវច្បាប់៕
