(ភ្នំពេញ)៖ លោក កៅ សុវណ្ណតារ៉ា​ អ្នកជំនាញផ្លូវចិត្ត និងជាសាស្ត្រាចារ្យចិត្តវិទ្យានៃសាលកវិទ្យាភូមិន្ទភ្នំពេញ​ បានឱ្យដឹងថា បើតាមការលើកឡើងរបស់អង្គការសុខភាពផ្លូវចិត្តពិភពលោក នៅឆ្នាំ២០១៧ បានឱ្យដឹងថា ដោយសារតែមានបញ្ហាផ្លូវចិត្តកើតឡើងទៅលើបុគ្គលិកនៅកន្លែងការងារ បានធ្វើឱ្យខាតបង់សេដ្ឋកិច្ចពិភពលោកប្រមាណ​ ១ទ្រីលានដុល្លារ (១,000,000,លានដុល្លារអាមេរិក) ក្នុងមួយឆ្នាំ ដូចនេះហើយដោយសារតែបញ្ហាផ្លូវចិត្ត គឺបានធ្វើឱ្យមានការខាតបង់យ៉ាងធ្ងន់ធ្ងរ ​សូមក្រសួងសុខាភិបាលត្រូវយកចិត្តទុកដាក់ឱ្យបានខ្លាំងទាក់ទងនឹង​បញ្ហានេះ។

លោកសាស្ត្រាចិត្តវិទ្យា បានលើកឡើងយ៉ាងដូចនេះ នាព្រឹកថ្ងៃទី២៥ ខែតុលា ឆ្នាំ២០១៨ ក្នុងឱកាសដែលលោកបានដឹកនាំនិស្សិតចិត្តវិទ្យានៃសាលកវិទ្យាភូមិន្ទភ្នំពេញ រៀបចំ ទិវាសុខភាពផ្លូវចិត្តពិភពលោក នៅក្នុងមជ្ឈមណ្ឌលសហប្រតិបត្តិការកម្ពុជា- កូរ៉េ ។ នៅក្នុងពិធីនោះផងដែរក៏មានការចូលរួម ពីបណ្តាអង្គការសុខភាពផ្លូវចិត្តចំនួន១៥អង្គការ រួមទាំងសាស្ត្រាចារ្យ និងនិស្សិត​ជាង ២,000នាក់ផងដែរ។

លោកសាស្ត្រាចារ្យ កៅ សុវណ្ណតារ៉ា បានឱ្យដឹងថា ការរៀបចំកម្មវិធីនេះឡើង​ ដើម្បីឱ្យមហាជនបានយល់ដឹង ជាពិសេសយុវជន បានយល់ច្បាស់ពីបញ្ហាផ្លូវចិត្ត ហើយតាមរយៈកាចូលរួមនេះ រំពឹងថា ​ពួកគាត់នឹងអាចផ្លាស់ប្តូរផ្នត់គំនិតរបស់ពួកគាត់ ហើយនឹងអាចទទួលបានចំណោះដឹងទាក់ទងនឹងបញ្ហាផ្លូវចិត្ត នឹងអាចដោះស្រាយបញ្ហាផ្លូវចិត្តដោយខ្លួនឯងបាន។ ការរៀបចំកម្មវិធីនេះឡើងគឺដោយមានការចូលរួមសហការណ៍ជាមួយ​អង្គការ ចំនួន១៥ រួមនឹងដេប៉ាតឺម៉ង់ចិត្តវិទ្យា ហើយអង្គការទាំងអស់នោះសុទ្ធតែមានការបង្ហាញពីបច្ចេកទេស និងវិធីសាស្ត្រក្នុងការព្យាបាល និងដោះស្រាយបញ្ហាផ្លូវចិត្តសាមញ្ញៗ ដោយខ្លួនឯងបាន។

លោកបានបញ្ជាក់ទៀតថា មូលហេតុដែលនាំឱ្យមានបញ្ហាផ្លូវចិត្ត មាន៣សំខាន់ៗ គឺ៖
*ទី១៖ កត្តាជីវសាស្ត្រ៖ ជាកត្តាដែលទទួលបានពីកំណើត បើយោងតាមការសិក្សា បានបង្ហាញថា ប្រសិនបើក្នុងគ្រួសារមានឱពុក ឫ ម្តាយ មានបញ្ហាផ្លូវចិត្ត អត្រាដែលអាចទទួលបានបញ្ហាផ្លូវចិត្ត មានរហូតទៅដល់ ៤០% ទៅ ៥០% ហើយប្រសិនបើនៅក្នុងគ្រួសារនោះមានទាំងឱពុក និង​ម្តាយ​ មានបញ្ហាផ្លូវចិត្ត កូនអាចប្រឈមនិងបញ្ហាផ្លូវចិត្តមានរហូតដល់៧០% ។
*ទី២៖ កត្តាចិត្តសាស្ត្រ៖ គឺពាក់ព័ន្ធទៅលើការគិត​របស់ខ្លួនឯង និងការឱ្យតម្លៃលើខ្លួនឯង ការប្រៀបធៀបខ្លួនឯង ជាមួយអ្នកដទៃច្រើនពេក ក៏អាចឱ្យគាត់មានបញ្ហាផ្លូវចិត្តផងដែរ​។
*ទី៣៖ កត្តាសង្គម ៖​ពាក់ព័ន្ធជាមួយនឹងសកម្មភាព និងស្ថានភាពនៅក្នុង​សង្គមរបស់គាត់ ពេលខ្លះដោយសារតែមានស្ថានភាពតានតឹងនៅក្នុងសង្គមច្រើន ជាក់ស្តែងដូចជា​នៅក្នុងគ្រួសាររបស់គាត់ ពោរពេញដោយអំពើហិង្សា កូននឹងទទួលរងបញ្ហាផ្លូវចិត្ត។

លោកសាស្ត្រាចារ្យ បានបញ្ជាក់ទៀតថា យើងអាចសម្គាល់អ្នកដែលមានបញ្ហាផ្លូវចិត្តបាន ដោយមើលទៅលើកត្តាខាងក្រៅដូចជា​ តើមានការផ្លាល់ប្តូរ និងប្រែប្រួលសកម្មភាពប្រចាំថ្ងៃដែរឫទេ? មានអារម្មណ៍ឆាប់មួម៉ៅ ឆាប់ខឹងប្លែកខុសពីមុន ចូលចិត្តនៅតែម្នាក់ឯងមិនចង់ជួបអ្នក​ដទៃ ហើយដើម្បីដឹងច្បាស់ថា បុគ្គលម្នាក់មានបញ្ហាផ្លូវចិត្ត និងអាចមានជម្ងឺផ្លូវចិត្តអ្វីមួយឱ្យបានច្បាស់នោះ លុះណាតែទៅជួបអ្នកជំនាញ ដើម្បីឱ្យគេបានធ្វើការវាស់វែងតាមបច្ចេកទេសរបស់អ្នកជំនាញផ្នែកផ្លូវចិត្ត។

លោកបានបញ្ជាក់ទៀត តាមរយៈរបាយការណ៍ដែលអ្នកចំនាញផ្លូវចិត្ត ធ្វើការសិក្សានៅឆ្នាំ២០១២ នៅទូទាំងប្រទេសកម្ពុជា​ មានអ្នកដែលមានជម្ងឺថប់បារម្មណ៍ចំនួន ២៧% អ្នកជម្ងឺធ្លាក់ទឹកចិត្តមាន ១៦.៣% និងអ្នកមានជម្ងឺបាក់ស្បាត​មាន ៧.៦% ។ នៅឆ្នាំ២០១៥ បានធ្វើការសិក្សាទៅលើនិស្សិតសាលកវិទ្យាល័យមួយ នៅក្នុងរាជធានីភ្នំពេញ ​រកឃើញថា មាន៦៣% មានបញ្ហាធ្លាក់ទឹកចិត្ត ៥៤%មានបញ្ហាថប់អារម្មណ៍។ នៅក្នុងឆ្នាំ២០១៨ អ្នកចិត្តសាស្ត្របានធ្វើកាសិក្សាមួយទៀត ទៅលើសិស្សវិទ្យាល័យចំនួនជាង ២០០នាក់ មានអ្នកធ្លាក់ទឹកចិត្តចំនួន ២៤.២% មានអ្នកថប់អារម្មណ៍ចំនួន ២៣.៧% ចំណុចទាំងអស់នេះហើយបានបញ្ជាក់ឱ្យឃើញថា បញ្ហាផ្លូវចិត្ត គឺមានទៅលើគ្រប់វ័យទាំងអស់​ មិនថាអ្នកមាន ឫអ្នកក្រឡើយ។

លោកសាស្ត្រាចារ្យ ក៏បានសំនូមពរដល់រដ្ឋាភិបាល ជាពិសេសក្រសួងសុខាភិបាល សូមយកចិត្តទុកដាក់ទៅលើសុខភាពផ្លូវចិត្តជាសំខាន់ ព្រោះបើតាមអង្គការសុខភាពពិភពលោកបានបញ្ជាក់ថា យើអាចកំណត់ថា បុគ្គលម្នាក់មានសុខភាពល្អ លុះត្រាតែមានកត្តាសំខាន់ៗ ៣ គឺ កត្តាសុខភាពផ្លូវកាយល្អ សុខភាពផ្លូវចិត្តល្អ និងសុខុមាលភាពសង្គមល្អ ដូចនេះសូមក្រសួងយកចិត្តទុកដាក់ ទាំងផ្លូវកាយ និងផ្លូវចិត្ត បើមានតែសុខភាពផ្លូវកាយល្អ និងផ្លូវចិត្តមិនល្អ ក៏មិនអាចបំពេញការងារបានល្អដែរ។

ជាក់ស្តែងបើតាមការលើកឡើងរបស់អង្គការសុខភាពផ្លូវចិត្តពិភពលោក នៅឆ្នាំ២០១៧ បានឱ្យដឹងថា ដោយសារតែមានបញ្ហាផ្លូវចិត្តកើតឡើងទៅលើបុគ្គលិក នៅកន្លែងការងារ បានធ្វើឱ្យខាតបង់សេដ្ឋកិច្ចពិភពលោកប្រមាណ ១ទ្រីលានដុល្លារ ក្នុងមួយឆ្នាំ ដូចនេះហើយដោយសារតែបញ្ហាផ្លូវចិត្ត គឺបានធ្វើឱ្យមានការខាតបង់យ៉ាងធ្ងន់ធ្ងរ ​សូមក្រសួងសុខាភិបាល ត្រូវយកចិត្តទុកដាក់ឱ្យបានខ្លាំងទាក់ទង និង​បញ្ហានេះ ហើយសូមឱ្យមានអ្នកជំនាញចិត្តសាស្ត្រ ធ្វើការនៅតាមមន្ទីពេទ្យផងដែរ ដោយសារតែនៅតាមមន្ទីពេទ្យ មានតែគ្រូពេទ្យព្យាបាលជម្ងឺផ្លូវកាយ ប៉ុន្តែមិនមានគ្រូពេទ្យព្យាបាលជម្ងឺផ្លូវចិត្តនោះទេ។

លោកសាស្ត្រាចារ្យ ក៏បានសំណូមពរឱ្យយុវវ័យទាំងអស់​ ប្រសិនបើដឹងថា ​ខ្លួនឯងមានបញ្ហាផ្លូវចិត្ត ហើយមិនអាចដោះស្រាយដោយខ្លួនឯងបាន សូមកុំមានភាពអៀនខ្មាសអៀន ក្នុងការទៅរកអ្នកជំនាញដើម្បីដោះស្រាយ និងព្យាបាលបញ្ហាផ្លូវចិត្ត «ព្រោះជម្ងឺផ្លូវចិត្តគឺអាចព្យាបាលបាន» អ្នកជំនាញនឹងអាចជួយឱ្យមានភាពល្អប្រសើរបាន។ ចំពោះមាតា បិតា ​ប្រសិនបើដឹងថា នៅក្នុងគ្រួសារមានសមាជិកណាម្នាក់មានបញ្ហាផ្លូវចិត្ត សូមកុំស្តីបន្ទោស ទៅលើកពួកគាត់ តែត្រូវតែជម្រុញគាត់ឱ្យទៅរកអ្នកជំនាញ​​ ឱ្យជួយក្នុងការដោះស្រាយ​បញ្ហារបស់គាត់​ ប្រសិនបើមិនទៅរកអ្នកជំនាញនោះទេ បញ្ហារបស់គាត់នឹងកាន់តែធ្ងន់ធ្ងរជាក់ជាមិនខាន​៕