(វ៉ាស៉ីនតោន)៖ កញ្ចប់គួរសង្ស័យជាបន្តបន្ទាប់ ដែលមានផ្ទុកនូវគ្រឿងផ្ទុះកែច្នៃ ដូចទៅនឹងកញ្ចប់ដែលថ្មីៗនេះ ត្រូវបានផ្ញើទៅកាន់​ផ្ទះ ​និងការិយាល័យនៃអ្នកនយោបាយល្បីៗនៃ គណបក្សប្រជាធិបតេយ្យអាមេរិកនោះ ត្រូវអាជ្ញាធរស្ទាក់បាននិងរកឃើញថា មាន​អាស័យដ្ឋានផ្ញើទៅកាន់​អតីតអនុប្រធានាធិបតីអាមេរិក លោក Joe Biden និងលោក Robert De Niro ដែលជាតារាសម្តែងជើងចាស់​ក៏ដូចជាអ្នករិះគន់ម្នាក់របស់លោក ដូណាល់ ត្រាំ។ នេះបើតាមការដកស្រង់ការផ្សាយចេញពីស្ថានីយទូរទស្សន៍ CNN នៅយប់ថ្ងៃ​ព្រហស្បតិ៍ ទី២៥ ខែតុលា ឆ្នាំ២០១៨។

កន្លងទៅថ្មីៗនេះ បើតាមប៉ូលិសអាមេរិក គោលដៅផ្ញើនៃកញ្ចប់គ្រាប់បែក​ច្នៃដូចៗគ្នា​ទាំងនេះ​ មានដូចជា​អតីតប្រធានាធិបតី​អាមេរិក​លោក បារ៉ាក់ អូបាម៉ា អតីតប្រធានាធិបតី​អាមេរិក លោក ប៊ីល គ្លីនតុន និងភរិយា​របស់លោក គឺលោកស្រី ហ៊ីលឡារី គ្លីនតុន មហាសេដ្ឋី​ដែលជាម្ចាស់ជំនួយដ៏ធំនៃគណបក្ស​ប្រជាធិបតេយ្យ លោក ចន សូរ៉ូស (George Soros) សមាជិកសភាបក្ស​ប្រជាធិបតេយ្យ​លោកស្រី ដិបប៊ី វ៉ាស្ស៊ឺម៉ាន់ ស្កាល់ស៍ (Debbie Wasserman Schultz) រួមទាំងការិយាល័យសារព័ត៌មាន CNN ក្នុងទីក្រុង​ញូយ៉ក។

ដោយឡែក ថ្លែងក្នុងសន្និសីទសារព័ត៌មាន​នៅឯនាយកដ្ឋានប៉ូលិស​នៃទីក្រុងញូយ៉ក អភិបាលក្រុង​ញូយ៉ក លោក បៀល ដឺ ប្លាស៊ីយ៉ូ (Bill De Blasio) ក៏បានចាត់​ទុកផងដែរថា សកម្មភាពទាំងនេះ​គឺជាទង្វើភេរវកម្មយ៉ាង​ច្បាស់ក្រឡែត និង​ជា​ការ​បំភិតបំភ័យ​មេដឹកនាំ​អាមេរិក​ តាមរយៈសកម្មភាព​ហិង្សា។

គួរបញ្ជាក់ថា មកទល់នឹងពេលនេះ​មិនមានការបញ្ជាក់​លម្អិត ពីហេតុការណ៍នេះ​នៅឡើយ​នោះទេ ខណៈការស៊ើប​អង្កេតកំពុងធ្វើ​ឡើង។ ក៏ប៉ុន្តែ អ្វីដែល​គេដឹងគេថា ការផ្ញើកញ្ចប់គ្រាប់ច្នៃ​ទៅកាន់អ្នកនយោបាយ​បក្សប្រជាធិបតេយ្យ កើតមានឡើង​នៅចំពេល សហរដ្ឋអាមេរិក​កំពុងត្រៀមរៀបចំ​ការបោះឆ្នោត​សភាពាក់កណ្ដាល​អាណត្តិ ដែលនឹងប្រព្រឹត្ត​ទៅនៅថ្ងៃទី០៦ ខែវិច្ឆិកា​ខាងមុខនេះ៕