(ភ្នំពេញ)៖ គិតត្រឹមល្ងាចថ្ងៃទី២៥ ខែតុលា ឆ្នាំ២០១៨ បេក្ខនារីបវរកញ្ញាកម្ពុជា គឺកញ្ញា ឌី លីកា (Dy Lika) ជាប់ឈ្មោះក្នុងបញ្ជី TOP 5 ក្នុងកម្មវិធីបវរកញ្ញាអន្តរជាតិ ២០១៨ ឬ Miss Grand International 2018 ឈានទៅដល់ការប្រកួតវគ្គផ្តាច់ព្រ័ត្រ ដែលនឹងត្រូវប្រកាសលទ្ធផល នៅរាត្រីនេះ។

យោងតាមចំណាត់ថ្នាក់លើទំព័រ Facebook «Miss Grand International»​ ត្រូវបានផ្សាយរយៈពេលប៉ុន្មានម៉ោងមុននេះ បានឲ្យដឹងថា បវរកញ្ញាដែលបានជាប់ចំនួន៥នាក់ តាមលំដាប់ពីលេខ១ ដល់លេខ៥ រួមមាន៖ បវរកញ្ញាកម្ពុជា, បវរកញ្ញាវៀតណាម, បវរកញ្ញា Guadeloupe, បវរកញ្ញាផារ៉ាហ្កាយ, និងបវរកញ្ញាប៉េរូ។

បវរកញ្ញាទាំង៥នាក់នេះ នឹងត្រូវបញ្ជូនទៅចៅក្រមកិត្តិយស ដើម្បីឲ្យពួកគាត់សម្រេចចិត្តជ្រើសរើសយកបវរកញ្ញ​ឯក នៅក្នុងរាត្រីនេះ ដើម្បីប្រកាសលទ្ធផលតែម្តង។ សូមមហាគ្រួសារខ្មែរ រង់ចាំតាមដានទាំងអស់គ្នា ថាតើបវរកញ្ញាកម្ពុជាអាចគ្រងជើង​ឯក ក្នុងកម្មវិធីអន្តរជាតិមួយនេះ បានដែរឬទេ៕