(សៀមរាប)៖ នាយឧត្តមសេនីយ៍ មាស សុភា ទេសរដ្ឋមន្ត្រីទទួលបន្ទុកកិច្ចការមីន គ្រាប់មិនទាន់ផ្ទុះ និងការងារវិស្វកម្មកងយោធពលខេមរភូមិន្ទ បានអះអាងថា អង្គភាពស៊ីម៉ាក់ នៅពេលខាងមុខនឹងរៀបចំវិទ្យាស្ថានដោះមីនកម្រិតជាតិមួយ ដើម្បីផ្ទេរចំណេះដឹងទាំងអស់ដែលធ្លាប់មានពីមុនមក ទៅអ្នកជំនាន់ក្រោយ។
ការថ្លែងបែបនេះរបស់ទេសរដ្ឋមន្ដ្រី មាស សុភា ធ្វើឡើងនៅព្រឹកថ្ងៃទី២៥ ខែតុលា ឆ្នាំ២០១៨នេះ ខណៈដែលលោក អមដំណើរដោយលោក ហេង រតនា អគ្គនាយកស៊ីម៉ាក់ និងមន្ត្រីជាច្រើនរូបទៀត ចុះជួបសំណេះសំណាលសួរសុខទុក្ខ ជាមួយមន្ត្រី បុគ្គលិករបស់កងឯកភាពកំចាត់មីនទី៤ ដែលកំពុងធ្វើសកម្មភាពរុករកមីននៅខេត្តសៀមរាប។
លោកទេសរដ្ឋមន្ត្រី មាស សុភា ក៏បានថ្លែងនូវការកោតសរសើរដល់បុគ្គលិក និងមន្ត្រីទាំងអស់ នៃកងកម្លាំងស៊ីម៉ាក់ ក្នុងកងឯកភាពកំចាត់មីនទី៤ទាំងអស់ ដែលបានខិតខំបំពេញភារកិច្ចបានយ៉ាងល្អប្រសើរដោយបានឆ្លងកាត់ឧបសគ្គជាច្រើន ដោយពុំខ្លាចនឿយហត់។
បើតាមការឲ្យដឹងពី លោកប្រធានកងឯកភាពកំចាត់មីនទី៤ ខេត្តសៀមរាប បានបញ្ជាក់ថា កងឯកភាពកំចាត់មីនទី៤ កំពុងគ្រប់គ្រងសត្វកណ្តុរហិតមីន ចំនួន២២ក្បាល ដែលកំពុងប្រតិបត្តិការរុករកគ្រាប់មីននៅក្នុងតំបន់គ្រប់គ្រង និងក៏មានប្រើម៉ាស៊ីនរុករកទំនើបរបស់ប្រទេសជប៉ុនផងដែរ។
លោកបន្តថា នៅក្នុងខែវិច្ឆិកា ឬខែធ្នូឆ្នាំ២០១៨ខាងមុខនេះ កងភាពនឹងពង្រាយសត្វកណ្តុរហិតរុករកគ្រាប់មីននេះ ទៅកាន់ខេត្តព្រះវិហារ ដើម្បីជាជំនួយដល់កងកម្លាំងស៊ីម៉ាក់នៅខេត្តនោះ ក្នុងការធ្វើសកម្មាពបោសសំអាតគ្រាប់មីន ដែលកប់នៅក្នុងដីជាបន្តទៀត៕
