(ភ្នំពេញ)៖ កម្ពុជានឹងរៀបចំពិព័រណ៍កសិកម្ម ការចិញ្ចឹមសត្វ និងបសុសត្វរយៈពេល៣ថ្ងៃ។ ពិព័រណ៍នេះរៀបចំឡើង ចាប់ពីថ្ងៃទី០១-០៣ ខែវិច្ឆិកា ឆ្នាំ២០១៨។

ពិព័រណ៍សិកម្ម ការចិញ្ចឹមសត្វ និងបសុសត្វ រៀបចំឡើងដោយរំពឹងមានអ្នកចូលរួមទស្សនា៦ពាន់នាក់រួមមាន៖ កសិករ,​ ម្ចាស់រោងម៉ាស៊ីនកិនស្រូវ, អ្នកផលិតចំណីសត្វ, ពេទ្យសត្វ, អ្នកកែច្នៃ, និងអ្នកជំនួញច្រើនទៀត ដោយក្នុងនោះពួកគេនឹងមានឱកាសទស្សនាផលិតផលថ្មីៗ ជាមួយនិងបច្ចេកវិទ្យាចុងក្រោយបំផុត ពីក្រុមហ៊ុនអន្ដរជាតិធំៗរួមមាន៖ Lay Hong Berhad, Agco Gsi , Big Dutchman, Valli s.p.a, Nutricomm Asia Pte ltd, Gartech, Altuntas, Salmet, Prestige Feed Mills, Clearwater, National Renderers, Chin Chin, Suncue, Hunan Yingchun, Chanen Chemical , Henan Runhe, Jiangsu, Buhler, Agri-Master, Makita, C.P. Cambodia, Mong Riththy Group ជាដើម។ ​

យោងតាមរបាយការណ៍ ក្រសួងកសិកម្មរុក្ខាប្រមាញ់ និងនេសាទ (MAFF) ឱ្យដឹងថា ចាប់ពីឆ្នាំ២០១៦-២០២៤ តម្រូវការសាច់របស់កម្ពុជា នឹងកើនឡើងពី១៤.៦% ស្មើ២៨០,០០០-៣២៨,០៨៥តោនក្នុងមួយឆ្នាំៗ។ ការកើនឡើងនេះបានជួយជំរុញ ឲ្យប្រាក់ចំណូលកសិករ និងអ្នកផលិតមានការកើនឡើង។

លោក Richard Yew អនុប្រធានប្រចាំតំបន់ របស់ក្រុមហ៊ុន AMB Tarsus Events Group អ្នករៀបចំពិព័រណ៍ឲ្យដឹងថា «ខ្ញុំសូមលើកទឹកចិត្តដល់កសិករ​ ផ្នែកកសិកម្មបសុសត្វ, ចំណីសត្វ និងអ្នកផលិតសាច់ទាំងអស់ ចូលរួមទស្សនាពិព័រណ៍កសិកម្ម ការចិញ្ចឹមសត្វ និងបសុសត្វ Agrilivestock Camobdia 2018 ឲ្យបានគ្រប់គ្នា ដើម្បីទទួលបានព័ត៌មានថ្មីៗស្តីពី បច្ចេកវិជ្ជា និងការផ្គត់ផ្គង់ចុងក្រោយ និងចំណេះដឹងផ្សេងទៀត»។

សូមបញ្ជាក់ថា ពិព័រណ៍នេះ នឹងបង្ហាញពីផលិតផលពាក់ព័ន្ធ នឹងចំណីសត្វ និងសារធាតុបន្ថែម, ឧបករណ៍កិនស្រូវ ប្រព័ន្ធវេចខ្ចប់ និងប្រព័ន្ធបង្កបង្កើនផល ឧបករណ៍ផលិតកម្មបសុសត្វជាដើម។ នេះជាឱកាសល្អក្នុងការកសាង ទំនាក់ទំនងអាជីវកម្ម៕