(ភ្នំពេញ)៖ ក្រុមហ៊ុនថ្មីចំនួន៤ទៀតហើយ​​ ដែលបង្កើតរោងចក្រផលិតក្តារប៉ាកេ និងផលិតកាបូប មានទុនវិនិយោគ២៨.៥៩លានដុល្លារអាមេរិក និងបង្កើតការងារបាន១.២១៧កន្លែង ត្រូវបានក្រុមប្រឹក្សាអភិវឌ្ឍកម្ពុជា (CDC) អនុម័តឲ្យបើកដំណើរការ។

Facebook ផ្លូវការរបស់ CDC បានផ្សាយនៅថ្ងៃទី២២ ខែតុលា ឆ្នាំ២០១៨នេះថា តាមសំណើសុំវិនិយោគរបស់ក្រុមហ៊ុន គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញ «វិញ្ញាបនប័ត្រចុះបញ្ជីជាស្ថាពរ» ជូនដល់ក្រុមហ៊ុនដូចខាងក្រោម៖

១៖ ក្រុមហ៊ុន INVISTA DECOR CO.,LTD: គម្រោងបង្កើតរោងចក្រផលិតក្តារប៉ាកេ ក្តារបន្ទះ និងគ្រឿងសង្ហារឹម មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុ មានទុនវិនិយោគចំនួន ១.៥លានដុល្លារអាមេរិក និងអាចបង្កើតការងារបានចំនួន ១៣៥កន្លែង។

២៖ ក្រុមហ៊ុន GLORY ALLIANCE (CAMBODIA) CO.,LTD: គម្រោងបង្កើតរោងចក្រផលិត កាបូប និងវ៉ាលិស មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ ៥.៦៤លានដុល្លារអាមេរិក និងអាចបង្កើតការងារបានចំនួន ៣៨០កន្លែង។

៣៖ ក្រុមហ៊ុន CAMBODIAN TROPIC FLOORING CO.,LTD: គម្រោងបង្កើតរោងចក្រផលិតក្តារប៉ាកេ ក្តារបន្ទះ និងគ្រឿងសង្ហារឹម មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុ មានទុនវិនិយោគចំនួន ៦.៥លានដុល្លារអាមេរិក និងអាចបង្កើតការងារបានចំនួន ៥៤០កន្លែង។

៤៖ ក្រុមហ៊ុន COUGAR WOOD INDUSTRY CO.,LTD: គម្រោងបង្កើតរោងចក្រផលិតក្តារប៉ាកេ និងក្តារបន្ទះ មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ ១៤.៩៥លានដុល្លារអាមេរិក និងអាចបង្កើតការងារបានចំនួន ១៦២កន្លែង៕