(ភ្នំពេញ)៖ ក្រុមប្រឹក្សាសកម្មភាពជនពិការ នៅថ្ងៃទី១៨ ខែតុលា ឆ្នាំ២០១៨ បានរៀបចំបើកកិច្ចពិភាក្សាបញ្ចេញមតិយោបល់ពីក្រសួង-ស្ថាប័នពាក់ព័ន្ធជាច្រើនស្តីពីសេចក្តីព្រាងរបាយការណ៍ដំបូង នៃការអនុវត្តអនុសញ្ញាស្តីពីសិទ្ធិជនពិការ ឆ្នាំ២០១៣- ២០១៨ នៅទីស្តីការក្រសួងសង្គមកិច្ច អតីតយុទ្ធជន និងយុវនីតិសម្បទា។
នៅក្នុងកិច្ចពិភាក្សានោះ ក៏មានការជជែកបញ្ចេញមតិយោបល់ទៅវិញទៅមកជាមួយក្រសួង-ស្ថាប័នពាក់ព័ន្ធជាច្រើន ក្នុងគោលបំណងធ្វើយ៉ាងណា ឲ្យរបាយការណ៍ស្តីពី« ការអនុវត្តអនុសញ្ញាស្តីពីសិទ្ធិជនពិការ» ឲ្យគ្រប់ជ្រុងជ្រោយ និងមានគុណតម្លៃ អាចចចូលរួមជួយដល់វិស័យពិការភាព នៅកម្ពុជាបាន។
នៅក្នុងឱកាសនោះ លោក វង សូត ប្រធានក្រុមប្រឹក្សាសកម្មភាពជនពិការ រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា បានលើកឡើងថា កិច្ចប្រជុំនេះ នឹងចូលរួមចំណែក យ៉ាងសំខាន់ ក្នុងការទទួលមតិយោបល់ក្រសួង ស្ថាប័នពាក់ព័ន្ធនានា ដើម្បីឲ្យរបាយការណ៍ មានលក្ខណៈ គ្រប់ជ្រុងជ្រោយ និងអាចទទួលយកបាន ពីគ្រប់ភាគីពាក់ព័ន្ធ។
លោក វង សូត បានបន្ថែមថា រាជរដ្ឋាភិបាល បានយល់ច្បាស់ពីតម្រូវការ បញ្ហាប្រឈមនានារបស់ជនមានពិការភាព ឈរលើមូលហេត និងស្មារតី ទទួលខុសត្រូវ រាជរដ្ឋាភិបាលបានដាក់ចេញនូវចក្ខុវិស័យរយៈពេលវែងសម្រាប់អភិវឌ្ឍន៍វិស័យពិការភាព ដែលជាផ្នែកមួយនៃប្រព័ន្ធគាំពារសង្គម។
បន្ថែមពីលើនេះ លោក ឯម ច័ន្ទមករា អគ្គលេខាធិការក្រុមប្រឹក្សាសកម្មភាពជនពិការ បានឲ្យដឹងថា អនុសញ្ញាស្តីពីសិទ្ធិជនពិការ គឺជាបទដ្ឋានគតិយុត្តិមួយដ៏មានសារៈសំខាន់ដែលទាក់ទងនឹងវិស័យពិការភាពនៅកម្ពុជា និងផ្សារភ្ជាប់ព្រះរាជាណាចក្រកម្ពុជា ជាមួយបណ្តាប្រទេសនានាលើសកលលោក តាមរយៈការឯកភាពផ្តល់សច្ចាប័នដើម្បីចូលរដ្ឋភាគីនៃអនុសញ្ញាស្តីពីសិទ្ធិជនពិការ។
លោក ឯម ច័ន្ទមករា បន្តថា ក្រុមប្រឹក្សាសកម្មភាពជនពិការ បានរៀបចំរបាយការណ៍ជាតិស្តីពីការអនុវត្ត អនុសញ្ញាស្តីពីសិទ្ធិជនពិការ ដើម្បីឆ្លងកិច្ចប្រជុំពេញអង្គគណៈរដ្ឋមន្រ្តី មុនបញ្ចូនរបាយការណ៍ទៅអង្គការសហប្រជាជាតិ។
អគ្គលេខាធិការក្រុមប្រឹក្សាសកម្មភាពជនពិការរូបនេះ បានបន្ថែមថា កម្ពុជា បានអនុម័តយល់ព្រមជាភាគីនៃអនុសញ្ញាអង្គការសហប្រជាជាតិស្តីពីសិទ្ធិជនពិការ ដែលរដ្ឋសភាបានអនុម័តកាលពីថ្ងៃទី១០ ខែសីហា ឆ្នាំ២០១២ នាសម័យប្រជុំរដ្ឋសភាលើកទី៤ នីតិកាលទី៤ និងព្រឹទ្ធសភាបានយល់ព្រមតាមទម្រង់ និងគតិនៃច្បាប់ទាំងស្រុង ដោយគ្មានការកែប្រែអ្វីឡើយ កាលពីថ្ងៃទី០៥ ខែកញ្ញា ឆ្នាំ២០១២ នាសម័យប្រជុំវិសាមញ្ញា នីតិកាលទី៣ ។ ជាមួយគ្នានោះ អគ្គលេខាធិការដ្ឋានអង្គការសហប្រជាជាតិ បានទទួលស្គាល់ការផ្តល់សច្ចាប័នជាផ្លូវការដល់កម្ពុជា នៅថ្ងៃទី២០ ខែកញ្ញា ឆ្នាំ២០១២ និងចូលជាធរមាន៣០ថ្ងៃក្រោយពីការតម្កល់ទុកលិខិតទុបករណ៍ ពោលគឺថ្ងៃទី១៩ ខែកញ្ញា ឆ្នាំ២០១៧។
អនុសញ្ញាស្តីពីសិទ្ធិជនពិការ មាន៥០មាត្រា ដែលមាត្រាភាគច្រើនស្របគ្នាទាំងស្រុង ជាមួយច្បាប់ស្តិពីកិច្ចការពារ និងលើកកម្ពស់ជនពិការ។
អនុសញ្ញាស្តីពីសិទ្ធិជនពិការ មាន៥០មាត្រា បានចែងឡើងក្នុងគោលបំណង លើកស្ទួយ ការពារ និងធានាជនពិការទទួលបានសិទ្ធិពេញលេញនូវសិទ្ធិមនុស្ស និងសេរីភាពជាសាវន្តទាំងអស់ ដើម្បីលើកស្ទួយការគោរពសេចក្តីថ្លៃថ្នូរដែលមានពីកំណើតមករបស់ជនមានពិការភាព៕
