(ពោធិ៍សាត់)៖ អភិបាលខេត្តពោធិ៍សាត់ លោក ម៉ៅ ធនិន កាលពីរសៀលថ្ងៃទី១៧ ខែតុលា ឆ្នាំ២០១៨ម្សិលមិញ បានថ្លែងថា «លោកគ្រូ អ្នកគ្រូ គឺជាគ្រួសារគំរូ ជាឪពុកម្តាយទី២ ជាពុម្ព និងជាថ្នាលបណ្តុះបណ្តាលនូវធនធានមនុស្ស ប្រកបដោយគុណភាព និងប្រសិទ្ធភាព សម្រាប់ការស្តារ និងអភិវឌ្ឍន៍ប្រទេសជាតិ ឲ្យមានការរីកចម្រើន ដូច្នេះគប្បីយកចិត្តទុកដាក់ មានឆន្ទះក្នុងការបំពេញការងារ មានសាមគ្គីភាពផ្ទៃក្នុងល្អ ធ្វើយ៉ាងណាកុំឲ្យពុកម៉ែបងប្អូននៅក្នុងមូលដ្ឋាន មានការខកចិត្តមកលើយើង»។
លោកអភិបាលខេត្ត បានថ្លែងបែបនេះ ក្នុងឱកាសចុះសំណេះសំណាល និងដោះស្រាយកង្វះខាត់សិក្សា ជូនលោកគ្រូអ្នកគ្រូ និងសិស្សានុសិស្ស អនុវិទ្យាល័យ និងបឋមសិក្សាបាកាន ដោយបានការនិមន្ត និងអញ្ជើញចូលរួម ពីព្រះតេជគុណ ឡាយ កន ចៅអធិការវត្តបាកាន លោកប្រធានមន្ទីរអប់រំខេត្ត ប្រធានមន្ទីរធម្មការ ប្រធានការិយាល័យអប់រំស្រុក លោកគ្រូ អ្នកគ្រូ និងប្រជាពលរដ្ឋជិត១០០នាក់។
លោក ម៉ៅ ធនិន បានថ្លែងឲ្យដឹងថា ការចុះជួបសំណេះសំណាលនាពេលនេះ ដោយសារតែប្រជាពលរដ្ឋ មានការសរសើរមិនដាច់ពីមាត់ពីគម្រូដឹកនាំរបស់លោកគ្រូ អ្នកគ្រូ នៃសាលានេះ ក្នុងការយកចិត្តទុកដាក់បណ្តុះបណ្តាលកូនក្មួយៗសិស្សានុសិស្ស ជាពិសេសមានព្រះតេជគុណ ជាចៅអធិការវត្តបាកាន ដែលជាឳពុកជាម្តាយ នៅជាប់ទីនេះស្រាប់។
ស្របនឹងការខំប្រឹងប្រែងរបស់យើងទាំងអស់គ្នា លោកគ្រូ អ្នកគ្រូទាំងអស់ ត្រូវអប់រំកុមារឲ្យក្លាយជាទំពាំងស្នងប្ញស្សីដ៏ល្អ ជៀសវាងការប្រើប្រាស់គ្រឿងញៀន គ្រឿងស្រវឹង និងអំពើអបាយមុខផ្សេងៗ ត្រូវធ្វើជាគ្រួសារគំរូ ជាឳពុកម្តាយទី២ ជាពុម្ព និងជាថ្នាលបណ្តុះបណ្តាលនូវធនធានមនុស្ស ប្រកបដោយគុណភាព និងប្រសិទ្ធភាព សម្រាប់ការស្តារ និងអភិវឌ្ឍន៍ប្រទេសជាតិ ឲ្យមានការរីកចម្រើន។ ជាពិសេសត្រូវខិតខំបន្តការអភិវឌ្ឍន៍ខ្លួន ដោយកសាងសមត្ថភាពតាមជំហានៗ និងត្រូវប្រកាន់ភ្ជាប់ក្រមសីលធម៌វិជ្ជាជីវៈជាគ្រូបង្រៀន។
ជាមួយគ្នានោះ លោកអភិបាលខេត្តបានប្រាប់ពីគម្រោងត្រៀមប្រារព្ធពិធីប្រណាំងទូកខ្នាតអន្តរជាតិ ដែលពុំធ្លាប់មានទាល់តែសោះ ក្នុងខេត្តពោធិ៍សាត់ នាថ្ងៃទី១៩ ដល់២០ ខែវិច្ឆិកា ឆ្នាំ២០១៨ខាងមុខ នៅតាមដងស្ទឹងពោធិ៍សាត់ ទល់មុខផ្លូវចូលវត្តពាលញែក ដើម្បីអមអរសាទរ ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ដែលទាំងនេះបានកើតមានឡើង ដោយសារតែប្រទេសមានសុខសន្តិភាព មានការអភិវឌ្ឍ ក្រោមការដឹកនាំដ៏ប៉ិនប្រសព្វ ពីសំណាក់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា។
នាឱកាសនោះ លោក ម៉ៅ ធនិន បានទទួលដោះស្រាយសំណូមពររបស់លោកគ្រូ អ្នកគ្រូ ដោយជួយទិញដីពង្រីកបរិវេណសាលា ចាក់ដីក្នុងសាលា២០ឡាន ផ្តល់តុគ្រូសិស្សបន្ថែម ផ្តល់កង្ហារ១២គ្រឿង ផ្តល់បន្ទប់ទឹក៤បន្ទប់ ព្រមទាំងពិសាអាហារសម្រន់ប្រកបដោយភាពស្និទស្នាលក្រៃលែង៕
