(ភ្នំពេញ)៖ ប្រមុខនៃរាជរដ្ឋាភិបាលកម្ពុជា សម្ដេចតេជោ ហ៊ុន សែន តាមរយៈទំព័រ Facebook នៅរសៀលថ្ងៃទី១១ ខែតុលា ឆ្នាំ២០១៨នេះ បានសម្ដែងនូវការអបអរសាទរដល់កីឡាការិនីប៉េតង់កម្ពុជា គឺ កែ ឡេង និង អ៊ុក ស្រីមុំ ដែលបានដណ្ដើម​មេដាយមាស​១គ្រឿង នៅក្នុងការប្រកួតកីឡាប៉េតង់ជ្រើសរើសជើងឯក កម្រិតពិភពលោក នៅប្រទេសបារាំង។

សម្ដេចតេជោ ហ៊ុន សែន បានបញ្ជាក់យ៉ាងដូច្នេះថា «​អបអរសារទរកីឡាប៉េតង់កម្ពុ​ជា ឈ្នះមេដាយមាសពិភពលោកនៅបារាំង។ កម្ពុជារីករាយអបអរសាទរ ចំពោះវីរកីឡាការិនី កែ ឡេង និង អ៊ុក ស្រីមុំ ដែលទទួលបានមេដាយមាស​១គ្រឿង នៅក្នុងការប្រកួតកីឡាប៉េតង់ជ្រើសរើសជើងឯក កម្រិតពិភពលោក នៅប្រទេសបារាំង»។

​សូមជម្រាបថា វីរកីឡាការិនី កែ ឡេង និង អ៊ុក ស្រីមុំ ដណ្ដើមបានមេដាយមាសខាងលើ លើវិញ្ញាសាវាយគូនារី ២នាក់ទល់នឹង ២នាក់ ហើយនេះគឺជាវិញ្ញាសាទី១ ដែលកីឡាការិនីឆ្នើមរបស់កម្ពុជាទាំងពីរ ទើបបញ្ចប់ការប្រកួត ខណៈសល់ ២វិញ្ញាសាទៀត ត្រូវបន្ដប្រកួតនាថ្ងៃបន្ទាប់ គឺវិញ្ញាសា ៣នាក់ទល់នឹង ៣នាក់ និងវិញ្ញាសាឯកត្តជន។ រីឯផ្នែកបុរស ក៏ដូចគ្នាដែរ ប៉ុន្ដែការចាប់ផ្ដើមជាមួយវិញ្ញាសាដំបូង គឺវិញ្ញាសាវាយគូបុរស ២នាក់ទល់នឹង២នាក់ មិនទទួលបានលទ្ធផលល្អនោះទេ។

លោក អ៊ឹម ផាត គ្រូបង្វឹកក្រុមកីឡាប៉េតង់ជម្រើសជាតិបុរសកម្ពុជា បានបញ្ជាក់បន្ថែមថា ការប្រកួតជ្រើសរើសជើងឯកកម្រិតពិភពលោកនេះ គឺរៀបចំមានលក្ខណៈពិសេស ខុសប្លែកពីការប្រកួតជើងឯកពិភពលោកផ្លូវការ ដោយម្ចាស់ផ្ទះបារាំង ដែលជាប្រទេសស្ថាបនិកកីឡាប៉េតង់នេះ បានផ្ដួចផ្ដើមរៀបចំព្រឹត្តិការណ៍នេះឡើង ដោយអញ្ជើញតែប្រទេសខ្លាំងៗប្រចាំតំបន់នីមួយៗ ទៅចូលរួមប្រកួតប៉ុណ្ណោះ ក្នុងនោះក៏មានវត្តមានប្រទេសកម្ពុជាផងដែរ ស្របពេលកម្ពុជា បានបញ្ជូនកីឡាករ-កីឡាការិនី ៦រូបទៅចូលរួម ក្រោមការដឹកនាំរបស់លោក អ៊ិន គឹមស្រ៊ុន អគ្គលេខាធិការសហព័ន្ធកីឡាប៉េតង់កម្ពុជា៕