(ភ្នំពេញ)៖ លោក នៃ គង់ ដែលត្រូវជាកូនជំនួសមុខឲ្យអ្នកម្តាយ បងប្អូនក្រុមគ្រួសារនៃសព លោក នៃ ប៉េណា បានថ្លែងអំណរអរគុណយ៉ាងជ្រាលជ្រៅ បំផុតជូនចំពោះថ្នាក់ដឹកនាំកំពូលៗ នៃរាជរដ្ឋាភិបាលកម្ពុជា លោក លោកស្រី អ្នកនាងកញ្ញា និងញាតិមិត្តទាំងអស់ ដែលបានចំណាយពេលវេលា អញ្ជើញចូលរួមរំលែកទុក្ខគ្រួសារលោក។
លោក នៃ គង់ និងក្រុមគួសារ សូមជូនពរថ្នាក់ដឹកនាំកំពូលៗ នៃរាជរដ្ឋាភិបាល លោក លោកស្រី អ្នកនាងកញ្ញា និងញាតិមិត្តទាំងអស់ ជួបតែសេចក្តីសុខ និងពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លៀតឡើយ។
សូមបញ្ជាក់ថា លោក នៃ ប៉េណា ជាឥស្សរជនជាន់ខ្ពស់មួយរូបរបស់កម្ពុជា បានទទួលមរណភាព ដោយរោគាពាធ នាវេលាម៉ោង១៖០០នាទីរសៀល ថ្ងៃទី២៩ ខែកញ្ញា ឆ្នាំ២០១៨ ក្នុងជន្មាយុ៧៤ឆ្នាំ។
សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី០៣ ខែតុលា ឆ្នាំ២០១៨ ក៏បានអញ្ជើញចូលរួមក្នុងពិធីបូជាសព លោក នៃ ប៉េណា អនុប្រធានទី១ ព្រឹទ្ធសភាផងដែរ។
សម្តេចតេជោ នាយករដ្ឋមន្ត្រី និងមន្ត្រីនៃរាជរដ្ឋាភិបាលទាំងអស់ បានសម្តែងនូវសមានទុក្ខដ៏ក្តុកក្តួល សោកស្តាយ អាឡោះអាល័យជាទីបំផុត និងសូមចូលរួមរំលែកទុក្ខជាមួយក្រុមគ្រួសារនៃសព។ សម្តេចតេជោ ហ៊ុន សែន ចាត់ទុកថា មរណភាពរបស់ លោក នៃ ប៉េណា គឺជាការបាត់បង់កុលបុត្រខ្មែរដ៏ឆ្នើមមួយរូប ពោរពេញដោយឆន្ទៈមនសិការ ក្នុងការបម្រើបុព្វហេតុជាតិ សាសនា ព្រះមហាក្សត្រ គ្រប់កាលៈទេសៈ៕
