(ភ្នំពេញ)៖ លោក George EDGAR ឯកអគ្គរដ្ឋទូតសហភាពអឺរ៉ុប បានថ្លែងថា បើតាមការព្យាករណ៍របស់ធនាគារពិភពលោក (World Bank) លើផលិតផលក្នុងស្រុកសរុប សម្រាប់ប្រជាជនកម្ពុជាម្នាក់ (ផ.ស.ស) នោះបង្ហាញថា ការអនុគ្រោះផ្នែកពាណិជ្ជកម្ម​ (EBA) ដែលសភាពាណិជ្ជអឺរ៉ុប ផ្តល់ឲ្យប្រទេសដែលមានការអភិវឌ្ឍតិចតួច គឺប្រទេសកម្ពុជា អាចទទួលបានការអនុគ្រោះពន្ធ រហូតដល់ឆ្នាំ២០២៧។

ធនាគារពិភពលោក នៅថ្ងៃទី០៤ ខែតុលានេះ បានចេញផ្សាយរបាយការណ៍សេដ្ឋកិច្ចមួយ ដោយបញ្ជាក់ថា សេដ្ឋកិច្ចរបស់កម្ពុជា នៅឆ្នាំ២០១៨នេះ នឹងមានកំណើត៧ភាគរយ ខណៈឆ្នាំ២០១៧ មានកំណើត៦.៩ភាគរយ ហើយផលិតផលក្នុងស្រុកសរុប សម្រាប់ប្រជាជនម្នាក់នៅឆ្នាំ២០១៧ មានចំនួន១,៣៧៣ដុល្លារអាមេរិក។

លោកឯកអគ្គរដ្ឋទូតសហភាពអឺរ៉ុប បានថ្លែងដូចនេះនាព្រឹកថ្ងៃទី៤ ខែតុលា ឆ្នាំ២០១៨នេះ ក្នុងឱកាសដែលលោកអញ្ជើញ ជាអធិបតីក្នុងវេទិកាសារព័ត៌មាន ក្រោមប្រធានបទ «ជំនួញ និងកិច្ចអភិវឌ្ឍន៍» ដែលបានធ្វើឡើងនៅសណ្ឌាគារសាន់វេ រាជធានីភ្នំពេញ។ ពិធីនេះ ក៏មានការចូលរួមពីលោក Tasilo Brinser អនុប្រធាននៃសភាសភាពាណិជ្ជកម្មអឺរ៉ុបប្រចាំនៅក​ម្ពុជា លោក ប៉ែន បូណា ប្រធានក្លឹបអ្នកកាសែតកម្ពុជា និង​អ្នកសារព័ត៌មានមកពីគ្រប់ស្ថាប័នជាច្រើននាក់ផងដែរ។

លោក George EDGAR បានថ្លែងថា EBA គឺជាការអនុគ្រោះផ្នែកពាណិជ្ជកម្ម​ ដែលសភាពាណិជ្ជអឺរ៉ុប ផ្តល់ទៅលើប្រទេស ​ដែលមានការអភិវឌ្ឍតិចតួច ហើយអ្វីដែល EBA ផ្តល់ជូន គឺការនាំទំនិញពីប្រទេស​ទាំងអស់នោះ ដោយមិនជាប់ពន្ធគយ​ និង​មិនជាប់ការកំណត់កូតា ហើយចំពោះប្រទេស​កម្ពុជា សភាពាណិជ្ជអឺរ៉ុប បានបញ្ចូលគ្រប់ទំនិញទាំងអស់ លើកលែងតែការនាំចេញអាវុធ។

លោកបានបញ្ជាក់ទៀតថា បើគិតពីវិធីសាស្ត្ររបស់ធនាគារពិភពលោក ​ដែលគេបានវាស់ផលិតផលក្នុងស្រុកសរុបប្រជាជនម្នាក់ៗ (ផ.ស.ស) គឺឃើញថា ចំពោះស្ថានភាពនៅក្នុងប្រទេស​កម្ពុជាចាប់តាំងពីឆ្នាំ២០១៦មក បានឆ្លងផុតពីស្ថានភាពកំណត់ហើយ មានន័យថា ​ប្រទេស​កម្ពុជា គឺបានឆ្លងផុតប្រទេស ​ដែលមានចំនូលទាប​​ ទៅជាប្រទេស​ដែលមានចំនូលមធ្យមកម្រិតទាប។

លោកបានបន្ថែមទៀតថា ប៉ុន្តែបើ​និយាយពីប្រទេស ​ដែលមានការអភិវឌ្ឍតិចតួច ជាការពិតវាជាការដាក់ចំណាត់ការ ដោយអង្គការសហប្រជាជាតិ​ ដែលគិតអំពី ផ.ស.ស ក្នុងប្រជាជនម្នាក់ ប៉ុន្តែបើគិតពីសន្ទុះនៃការអភិវឌ្ឍមនុស្សមានន័យថា គេគិតទៅលើប្រទេសមួយ នឹងអាចមានភាពរងគ្រោះកម្រិតណា ប្រសិនបើមានវិបត្តិហិរញ្ញាវត្ថុ? មានការកើតឡើងនៃគ្រោះធម្មជាតិ ប្រជាពលរដ្ឋអាចងើបផុតពីភាពក្រីក្រ ហើយអាចធ្លាក់ចុះមកភាពក្រីក្រវិញកម្រិតណា ដូចនេះគេវាស់វែងទៅលើភាពងាយរងគ្រោះទាំងអស់នោះ ហើយក៏គេគិតទៀតថា ប្រទេសនោះ​ផ្តោតទៅលើផលិតកម្មកសិកម្ម ឬប្រាក់ចំនូលសេដ្ឋកិច្ចរបស់ប្រជាពលរដ្ឋ ឡើងដល់កម្រិតមួយជាទីពេញចិត្ត។

ដូច្នេះហើយការដាក់កម្រិតរបស់ UN គេនឹងធ្វើការកែសម្រួលរយៈពេល៣ឆ្នាំម្តង ហើយដើម្បីឱ្យប្រទេស​កម្ពុជា ចេញផុតពីប្រទេស ដែលមានការអភិវឌ្ឍតិចតួច​ទាល់តែប្រទេស​កម្ពុជា ឈានទៅដល់មួយកម្រិតទៀតជាប់ៗគ្នា២ដង ដែលម្តងមានរយៈពេល៣ឆ្នាំ មានន័យថា ៦ឆ្នាំទៀត គឺនៅឆ្នាំ២០២៤ ប្រទេសកម្ពុជាងើបចេញពីការអភិវឌ្ឍតិចតួចហើយ ពេលនោះ EBA និងផ្តល់រយៈពេលអនុគ្រោះ៣ឆ្នាំបន្ថែមទៀត ដូចនេះទាល់តែឆ្នាំ២០២៧ ទើបប្រទេស​កម្ពុជា អាចនឹងត្រូវដកចេញពី EBA បើគិតពីលក្ខណៈទ្រឹស្តីនេះ ដូចនេះសម្រាប់ប្រទេសកម្ពុជា និងបន្តការអនុគ្រោះពន្ធ មានរយៈពេលច្រើនឆ្នាំទៀត។

លោកបន្តថា សព្វថ្ងៃនេះ ទំនិញនៅក្នុងប្រទេស​កម្ពុជា បាននាំយកទៅអឺរ៉ុប ដោយពុំមានជាប់ពន្ធគយ, ជាប់កូតានោះទេ ដូចនេះហើយមានន័យថា ទំនិញនៅក្នុងប្រទេសកម្ពុជា មានភាព​ប្រកួតប្រជែងខ្លាំង ជាងទំនិញពីប្រទេសផ្សេងទៀត ដែលងើបចេញពីប្រទេស ដែលមានការអភិវឌ្ឍតិចតួច ព្រោះប្រទេស​ទាំងអស់នោះ ត្រូវគោរពតាមគោលការមួយចំនួន ដូចជាត្រូវជាប់ពន្ធគយ និងជាប់កូតាជាដើម។

លោក Tasilo Brinser បានឱ្យដឹងថា ក្រុមហ៊ុនអឺរ៉ុបមានវត្តមាននៅកម្ពុជា ជាយូរឆ្នាំមកហើយ ហើយសហភាពអឺរ៉ុប បានធ្វើការងារជាមួយរដ្ឋាភិបាលកម្ពុជា ដើម្បីលើកកម្ពស់នៅកំណើនសេដ្ឋកិច្ច ហើយវាពិតជាមានសារៈសំខាន់ណាស់ ដែលសាធារណជនទូទៅ បានដឹងអំពីអ្វីដែលសហភាពអឺរ៉ុប បាន​កំពុងធ្វើនៅកម្ពុជា និងការប្តេជ្ញាចិត្តរបស់សហភាពអឺរ៉ុប ក្នុងការជួយដល់ប្រទេស​កម្ពុជា។

​លោកបានបញ្ជាក់ទៀតថា​ «យើងបានផ្សព្វផ្សាយច្រើនណាស់ ដើម្បីទាក់ទាញ ការវិនិយោគពីអឺរ៉ុប​មកប្រទេស​កម្ពុជា ដោយបានរៀបចំជាកម្មវិធីផ្សព្វផ្សាយព័ត៌មាន នៅអឺរ៉ុប​ដូចជា ការរៀបចំជាពិព័រណ៍ពាណិជ្ជកម្ម បានផ្តល់ព័ត៌មានដល់អ្នកវិយោគទុននៅអឺរ៉ុប ដែលមានគោលបំណងមកវិយោគនៅប្រទេស​កម្ពុជា ដោយបានរៀបចំជាគេហទំព័រ ហើយក៏បានផ្សព្វផ្សាយ ពីឱកាសវិនិយោគនៅប្រទេស​កម្ពុជា​ តាមរយៈសភាពណិជ្ជកម្ម ជាបណ្តាញរបស់សភាពាណិជ្ជកម្មអឺរ៉ុបផងដែរ ដើម្បី​ឱ្យពួកគេបានដឹងពីព័ត៌មាន និងសក្តានុពលនៅក្នុងប្រទេស​កម្ពុជា»៕