(ភ្នំពេញ)៖ ពិតជាល្អបំផុតសម្រាប់សិស្សនិស្សិត ដែលទើបប្រលងមធ្យមសិក្សាទុតិយភូមិ ជាមួយកម្មវិធីអាហារូបករណ៍ពីសាលា ACE ដែលនឹងផ្ដល់អាហារូបករណ៍រហូតដល់១០០ភាគរយ ( ACE Inspiring Excellence Scholarships)។

កម្មវិធីអាហារូបករណ៍នេះ មានគោលបំណងពង្រឹងជំនាញភាសាអង់គ្លេស, ជំនាញទន់, ជំនាញផ្នែកសិក្សាធិការ និងចំណេះដឹងសាកល ដល់សិស្សានុសិស្ស ដែលទើបបញ្ចប់ថ្នាក់វិទ្យាល័យ ដើម្បីឲ្យពួកគេអាចបន្តភាពជោគជ័យ នៅថ្នាក់ឧត្តមសិក្សានៅក្នុងប្រទេស ឬនៅបរទេស។

អាហារូបករណ៍១០០កន្លែង សម្រាប់ការសិក្សាភាសាអង់គ្លេស ក្រៅម៉ោងនៅសាលា ACE រយៈពេល១ឆ្នាំទាំងនេះគឺ បន្ថែមលើ១០០កន្លែង កាលពីឆ្នាំកន្លងទៅ។ ជ័យលាភីអាហារូបរណ៍ នឹងចាប់ផ្តើមចូលរៀនពីខែមករា ឆ្នាំ២០១៩តទៅ។ សិស្សានុសិស្សដែលទើបប្រលងបញ្ចប់ សញ្ញាបត្រមធ្យមសិក្សាទុតិយភូមិក្នុងឆ្នាំ២០១៨ ចាប់អារម្មរណ៍អាចដាក់ពាក្យសុំអាហារូបករណ៍ ចាប់ពីថ្ងៃនេះរហូតដល់ថ្ងៃទី៣១ ខែតុលា ឆ្នាំ២០១៨។

សូមជម្រាបថា កម្មវិធីអាហារូបករណ៏​ ACE Inspiring Excellence Scholarships ត្រូវបានបង្កើតឡើងដោយក្រសួងអប់រំ យុវជន និងកីឡា និងសាលា ACE តាំងពីឆ្នាំ២០១៧ ដោយមានការគាំទ្រពី IDP Education ដែលជាស្ថាប័នឈានមុខគេក្នុងពិភពលោក លើវិស័យអប់រំជាលក្ខណៈអន្តរជាតិ និងការបញ្ជូនសិស្សនិស្សិតទៅសិក្សានៅបរទេស។

សម្រាប់ព័ត៌មានលម្អិត នៃព័ត៌មាននៃការដាក់ពាក្យសូមចូលទៅកាន់៖ scholarship.acecambodia.org៕