(ស្វាយរៀង)៖ លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានលើកឡើងថា ទិវាមនុស្សចាស់កម្ពុជា និងទិវាមនុស្សចាស់អន្តរជាតិ០១ តុលា ត្រូវបានធ្វើឡើង ក្នុងគោលបំណងលើកកម្ពស់កិច្ចគាំពារមនុស្សចាស់ សំដៅលើការលើកស្ទួយសុខុមាលភាពមនុស្សចាស់ដល់ការឲ្យបានល្អប្រសើរ និងបង្ហាញឲ្យឃើញពីតួនាទីសំខាន់ៗរបស់មនុស្សចាស់ ក្នុងសង្គមជាតិ។
លោក វង សូត បានបន្ថែមថា «យើងទាំងអស់គ្នាបានដឹងហើយថា មនុស្សចាស់ជាបុព្វការីជន ដែលបានបង្កើតធនធានដ៏មានប្រយោជន៍ និងមានតួនាទីសំខាន់ណាស់ ក្នុងការកសាងគ្រួសារ សហគមន៍ ការអប់រំ ការផ្តល់នូវចំណេះដឹង ចំណេះធ្វើ វប្បធម៌ ប្រពៃណី ទំនៀមទំលាប់ និងបទពិសោធន៍យ៉ាងច្រើន ឥតគណនា សម្រាប់មនុស្សជំនាន់ក្រោយ។ ជាទូទៅមនុស្សចាស់ តែងតែយកវត្តអារាម ជាទីកន្លែងសម្រាប់ជួបជុំ និងស្នាក់អាស្រ័យ តាមលទ្ធភាពរបស់ក្រុមគ្រួសារនីមួយៗ»។
រដ្ឋមន្ត្រី វង សូត បញ្ជាក់ថា រយៈពេល៣ឆ្នាំចុងក្រោយនេះ ក្រសួងសង្គមកិច្ច បានបង្កើតសមាគមន៍មនុស្សចាស់ចំនួន១៦៤៦ឃុំ សង្កាត់ នៅទូទាំងរាជធានីខេត្ត ដែលក្នុងនោះរួមមាន ឆ្នាំ២០១៦ ចំនួន៣៩៤ឃុំ-សង្កាត់ ឆ្នាំ២០១៧ ចំនួន១២៤២ ឃុំ-សង្កាត់ និងឆ្នាំ២០១៨ បាន១០ឃុំ-សង្កាត់បន្ថែមទៀត។
ការលើកឡើងរបស់លោក វង សូត បានធ្វើឡើង នៅក្នុងពិធីអបអរសាទរខួបលើកទី២០ ទិវាមនុស្សចាស់កម្ពុជា និងទិវាមនុស្សចាស់អន្តរជាតិ០១ តុលាក្រោមប្រធានបទ «សមាគមន៍មនុស្សចាស់ជាយន្តការដ៏សំខាន់ ក្នុងការថែរក្សា វប្បធម៌ គ្រួសារ និងសង្គមជាតិ» រៀបចំឡើង នៅថ្ងៃទី០១ ខែតុលា ឆ្នាំ២០១៨នេះ នៅខេត្តស្វាយរៀង។
រដ្ឋមន្ត្រី វង សូត បានលើកឡើងថា វិស័យសង្គមកិច្ច អតីតយុទ្ធជន និងយុវនីតិសម្បទា ក៏បានសម្រេចនូវសមិទ្ធផលថ្មីៗជាច្រើន ដើម្បីចូលរួមចំណែក ក្នុងការអនុវត្ត គោលនយោបាយសង្គមកិច្ច សំដៅដល់ការបង្កើនសេវាសាធារណៈ ជួយដល់ក្រុមជនរងគ្រោះ និងងាយរងគ្រោះក្នុងសង្គម ក្នុងនោះការងារសុខុមាលភាពមនុស្សចាស់ ត្រូវបានលើកកម្ពស់ជាបន្តបន្ទាប់ ស្របតាមស្ថានភាពជាក់ស្តែងរបស់កម្ពុជា។
លោក វង សូត បានបន្ថែមថា លើសពីនេះទៅទៀត រាជរដ្ឋាភិបាល បានដាក់ចេញនូវគោលនយោបាយ លិខិតបទដ្ឋានគតិយុត្ត និងបានបង្កើត យុត្តការជាច្រើន ដើម្បីបង្កើនប្រសិទ្ធភាព នៃការផ្តល់របបគោលនយោបាយ សម្រាប់សេវាសង្គមកិច្ច ចំពោះជនចាស់ជរា។
បន្ថែមពីលើនេះ រដ្ឋមន្ត្រី វង សូត បានឲ្យដឹងថា ដើម្បីដោះស្រាយបញ្ហាមួយចំនួន រាជរាជដ្ឋាភិបាលអាណត្តិទី៦ បានដាក់ចេញនូវយុទ្ធសាស្រ្តចតុកោណដំណាក់កាលទី៤ ដើម្បីជំរុញការអនុវត្ត គោលនយោបាយជាតិសម្រាប់មនុស្សចាស់ តាមរយៈគណៈកម្មាធិការជាតិកម្ពុជា ដើម្បើមនុស្សចាស់ ដោយបន្តពង្រឹងសមាគមមនុស្សចាស់ នៅតាមឃុំ-សង្កាត់ ការជំរុញកម្មវិធីអភិវឌ្ឍន៍មនុស្សចាស់តាមសមាគមន៍ និងកម្មវិធីថែទាំមនុស្សចាស់តាមគ្រួសារឲ្យបានកាន់តែល្អប្រសើរ ជាពិសេសការជំរុញរៀបចំដំណើរការលើសេវាមនុស្សចាស់ជរា ដើម្បីបណ្តុះបណ្តាលភ្នាក់ងារថែទាំសេវាមនុស្សចាស់។
បើតាមការបញ្ជាក់ឲ្យដឹងពីលោក យៀប ម៉ាលីណូ ប្រធាននាយកដ្ឋានសុខមាលភាពជនពិការ នៅថ្ងៃដដែលនេះ ក្រសួងសង្គមកិច្ច បានបើកថវិការបបគោលនយោបាយជនពិការក្រីក្រ នៅតាមសហគមន៍ ជូនជនមានពិការភាពចំនួន៣៨៤នាក់ ក្នុងនោះ មានជនមានពិការភាពធ្ងន់ធ្ងរចំនួន១២៧៣នាក់ ម្នាក់ៗទទួលបានរបបគោលនយោបាយជនពិការក្រីក្រ នៅតាមសហគមន៍ចំនួន២៤ម៉ឺនរៀល។ ចំណែក ជនមានពិការភាពកម្រិតមធ្យមវិញ មានចំនួន៤២៥នាក់ ក្នុងម្នាក់ៗទទួលបានរបបគោលនយោបាយជនពិការក្រីក្រ នៅតាមសហគមន៍ ចំនួន១២ម៉ឺនរៀល។
លោក យៀប ម៉ាលីណូ បានបន្ថែមថា សម្រាប់ឆ្នាំ២០១៨នេះ ក្រសួងសង្គមកិច្ច បានបើករបបគោលនយោបាយជនពិការក្រីក្រ នៅតាមសហគមន៍ ចំនួន១៦៩៨នាក់(ទាំងជនមានពិការភាពធ្ងន់ធ្ងរ និងមធ្យម) នៅទូទាំងខេត្តស្វាយរៀង៕
